إِزهِّيذنْ 29

1 أَزهّذْ ن ذَاوُوذْ. وْشمْ إِ سِيذِي، أَرَّاوْ ن إِربِّيثنْ، وْشمْ إِ سِيذِي أَعُودْجِي ذ ثْزمَّارْ. 2 وْشمْ إِ سِيذِي أَعُودْجِي ن يِيسمْ نّسْ، بنْذْقمْ زَّاثْ إِ سِيذِي ذِي ڒْعزّْ ن زَّاوشْثْ إِقدّْسنْ. 3 ثْمِيجَّا ن سِيذِي ثدَّارْضحْ ثِيوَا إِ وَامَانْ، أَربِّي ن ؤُعُودْجِي إِسّْهمْهمْ، سِيذِي، خْ وَامَانْ أَطَّاسْ. 4 ثْمِيجَّا ن سِيذِي ثشُّورْ س جّهْذْ، ثْمِيجَّا ن سِيذِي ثشُّورْ س ڒْعزّْ. 5 ثْمِيجَّا ن سِيذِي ثتَّارژَّا ثِيشجُّورَا ن ثْنڭْلِينْ، سِيذِي إِتَّارژَّا ثِينڭْلِينْ ن لُوبْنَانْ. 6 يَارَّا إِ-ثنْ أَذْ نڭْزنْ أَمْ ؤُعجْمِي، أَذْرَارْ ن لُوبْنَانْ ذ وذْرَارْ ن سِيرْيُونْ، أَمْ ؤُمژْيَانْ ن إِغَايْضْ ن ڒخْڒَا أَكْ-ذ وَاشَّاونْ ذ إِزِيرَارنْ. 7 ثْمِيجَّا ن سِيذِي ثْنقّشْ إِشعَّاڒنْ ن ثْمسِّي. 8 ثْمِيجَّا ن سِيذِي ثَارَّا ڒخْڒَا إِتَّارْجِيجِي، سِيذِي يَارَّا ڒخْڒَا ن قَاذَاشْ إِتَّارْجِيجِي. 9 ثْمِيجَّا ن سِيذِي ثَارَّا ثُوذَاذِينْ تَّارْونْثْ، نتَّا إِتّْعَارَّا إِزغْرَانْ، مَاشَا ذِي زَّاوشْثْ نّسْ ثَامقّْرَانْثْ مَارَّا ثسَّاوَاڒْ خْ ؤُعُودْجِي نّسْ. 10 سِيذِي ثُوغَا إِتّْغِيمَا أَمْ ڒْقَاضِي غَارْ سّحْڒثْ ن وَامَانْ، سِيذِي إِتّْغِيمَا أَمْ ؤُجدْجِيذْ إِ ڒبْذَا. 11 سِيذِي أَذْ إِوْشْ جّهْذْ إِ ڒْڭنْسْ نّسْ، سِيذِي أَذْ إِبَاركْ ڒْڭنْسْ نّسْ س ڒهْنَا.