إِزهِّيذنْ 41

1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 سّعْذْ ن ونِّي إِفهّْمنْ إِ ؤُمَارْخُو. سِيذِي أَذْ ث إِفكّْ ذڭْ وَاسّْ ن ڒْغَارْ. 3 سِيذِي ڭُّورْ أَذْ ث إِحْضَا، أَذْ ث يجّْ أَذْ إِدَّارْ، نتَّا أَذْ يَارّْ مژْرِي ذِي ثمُّورْثْ. وَارْ ث تّْسلَّامْ شَا غَارْ مِينْ ذِينْ إِدْجَانْ ذِي ڒعْمَارْ ن ڒْعذْيَانْ نّسْ. 4 سِيذِي أَذْ كِيذسْ إِبدّْ ذِي ثَاسُّوثْ ن ڒهْڒَاشْ. شكْ ثتّْبدّْڒذْ مَارَّا ڒشْثُو نّسْ ؤُمِي إِهدْجشْ. 5 نشّْ نِّيغْ: “أَ سِيذِي، حِينّْ خَافِي، سْڭنْفَا ڒعْمَارْ إِنُو، مَاغَارْ خْضِيغْ أَكِيذكْ." 6 ڒْعذْيَانْ إِنُو سَّاوَاڒنْ خَافِي س ڒْغَارْ: “مڒْمِي إِ غَا إِمّثْ ؤُ أَذْ إِتّْوَاكّسْ إِسمْ نّسْ؟" 7 مَاڒَا يُوسَا-د حذْ مَاحنْذْ أَذْ أَيِي إِژَارْ، إِسَّاوَاڒْ ذِي ڒْبَاطڒْ. ؤُڒْ نّسْ إِسّْمُونْ غَارسْ ڒْغشّْ، خنِّي إِتّفّغْ غَارْ بَارَّا، إِسَّاوَاڒْ. 8 مَارَّا إِنِّي ذ أَيِي إِشَارّْهنْ تّمْثَامنْ خَافِي جْمِيعْ، أَقَا أَثنْ تّْخَارِّيصنْ ذَايِي، مَاحنْذْ أَذْ أَيِي ڭّنْ ڒْغَارْ. 9 إِڒْقفْ إِ-ث أَشْثَابْ أَبَارْشَانْ ؤُ ونِّي د-إِوْضَانْ أَمُّو، وَارْ د-إِتّكَّارْ عَاذْ. 10 ؤُڒَا ذ أَرْيَازْ وِي أَكْ-ذ دَّارغْ ذِي ڒهْنَا، ونِّي ذِي تِّيقّغْ، ونِّي إِشّنْ أَغْرُومْ إِنُو، أَقَا إِسّمْغَارْ خَافِي أَنِيرْزْ نّسْ. 11 مَاشَا شكْ، أَ سِيذِي، حِينّْ خَافِي، سْنكَّارْ أَيِي-د، خنِّي نشّْ أَذْ ثنْ خدْجْصغْ. 12 س مَانْ أَيَا أَذْ سّْنغْ أَقَا ؤُسِيغْ أَشْ-د خْ ڒْخَاضَارْ، مَاحنْذْ ڒعْذُو إِنُو وَارْ خَافِي إِتّْذُوقّزْ س ؤُسْڒِيوْڒوْ. 13 ؤُ خَافِي، أَقَا شكْ تِّيشذْ أَيِي أَفُوسْ س وَاوَاڒْ نّكْ خْ ڒكْمَارثْ إِنُو، ثسّْبدّذْ أَيِي زَّاثْ إِ وُوذمْ نّشْ إِ ڒبْذَا. 14 أَذْ إِتّْوَابَاركْ سِيذِي، أَربِّي ن إِسْرَائِيل، زِي ڒبْذَا أَڒْ إِ ڒبْذَا! أَمِينْ، وَاهْ، أَمِينْ!