إِزهِّيذنْ 51

1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 أَڒَامِي إِ غَارسْ د-يُوسَا ؤُنَابِي نَاثَانْ، أَوَارْنِي ڒَامِي يُوذفْ ذَاوُوذْ خْ بَاثْ-شَابَاعْ. 3 حِينّْ خَافِي، أَ أَربِّي، عْلَاحْسَابْ ثَامخْسِيوْثْ نّشْ إِشوَّارنْ. مْسحْ إِخطَّانْ إِنُو عْلَاحْسَابْ أَفيّضْ ن أَرّحْمثْ نّشْ. 4 سِّيرْذْ ڒْمُوعْصِييّثْ إِنُو زَّايِي مَارَّا، سِيزْذڭْ أَيِي زِي دّنْبْ إِنُو، 5 مَاغَارْ نشّْ سّْنغْ إِخطَّانْ إِنُو، دّنْبْ إِنُو ڒبْذَا إِبدّْ أَيِي-د غَارْ ثِيطَّاوِينْ. 6 أَكِيذكْ، أَكِيذكْ وَاهَا إِ خْضِيغْ، ڭِّيغْ مِينْ إِدْجَانْ ذ أَعفَّانْ جَارْ ثِيطَّاوِينْ نّشْ، أَڒَامِي شكْ ثْسڭّْذذْ ذڭْ وَاوَاڒنْ نّشْ، ثصْفِيذْ ذِي ڒحْكَامَاثْ نّشْ. 7 خْزَارْ، تّْوَاخڒْقغْ-د ذِي دّْنُوبْ، ذِي دّْنُوبْ ثكْسِي أَيِي يمَّا. 8 خْزَارْ، شكْ ثتّخْسذْ ثِيذتّْ ذِي ذَاخڒْ، ذِي ثْنُوفّْرَا ثسّْشَانذْ أَيِي ثِيغِيثْ. 9 كْسِي خَافِي دّْنُوبْ س ثْعلْدْجثْ، خنِّي أَذْ ذوْڒغْ قُّورغْ، سِيرْذْ أَيِي، خنِّي أَذْ ذوْڒغْ ذ أَشمْڒَاڒْ خْ وذْفڒْ. 10 أَرّْ أَيِي أَذْ سْڒغْ أَرْشُوقْ ذ ڒفْرَاحثْ، حِيمَا إِغْسَانْ نِّي ثْڒبْزذْ شكْ، أَذْ شضْهنْ س ڒفْرَاحثْ. 11 سْنُوفَّارْ ؤُذمْ نّشْ زَّاثْ إِ دّْنُوبْ إِنُو، مْسحْ إِ مَارَّا ڒْمُوعْصِييّثْ إِنُو. 12 خْڒقْ-د ذَايِي ؤُڒْ إِزْذِيڭْ، أَ أَربِّي، جدّذْ ذِي ذَاخڒْ إِنُو إِجّْ ن أَرُّوحْ إِمثْننْ. 13 وَارْ ذ أَيِي نطَّارْ زڭْ وُوذمْ نّشْ، وَارْ زَّايِي تّكّسْ أَرُّوحْ إِقدّْسنْ نّشْ. 14 أوْشْ أَيِي عَاوذْ ڒفْرَاحثْ ن ؤُسنْجمْ نّشْ، ؤُڒَا ذ إِجّْ ن بُوحْبڒْ أَمْسعَّافْ إِ كِيذِي غَا إِبدّنْ. 15 خنِّي أَذْ سّْغَارغْ إِبْرِيذنْ نّشْ إِ يِينِّي خَاكْ إِعدَّانْ، حِيمَا أَذْ غَاركْ د -عقْبنْ إِمذْنَابْ. 16 فكّْ أَيِي زڭْ ؤُمَارْوَاسْ ن إِذَامّنْ، أَ أَربِّي، أَربِّي ن ؤُسنْجمْ إِنُو، خنِّي أَذْ إِسْڒوْڒِيوْ إِڒسْ إِنُو خْ ثْسڭْذَا نّشْ. 17 أَرْزمْ أَيِي إِينْشِيشنْ إِنُو، أَ سِيذِي إِنُو، خنِّي أَذْ إِبَارّحْ ؤُقمُّومْ إِنُو س شَّانْ نّشْ، 18 مَاغَارْ وَارْ ذ أَكْ ثشْقِي ثْغَارْصْثْ، إِڒِي وْشِيغْ أَشْ ت، ثَاغَارْصْثْ ن وشْمَاضْ وَارْ ذ أَشْ د-ثتِّيسْ خْ ڒْخَاضَارْ. 19 ثِيغَارْصَا ن أَربِّي أَقَا أَثنْثْ ذ إِجّْ ن بُوحْبڒْ يَارژْ، إِجّْ ن وُوڒْ إِدّزْ وَارْ ث ثسّحْقَارِيذْ، أَ أَربِّي! 20 أڭّْ ڒْخَارْ إِ صِيهْيُونْ عْلَاحْسَابْ أَرْضَا نّشْ، بْنَا ڒحْيُوضْ ن ؤُرْشَالِيمْ! 21 خنِّي أَذْ ثَارْضِيذْ ذِي ثْغَارْصَا ن ڒْمُوعْصِييّثْ، ذِي ثْغَارْصْثْ ن وشْمَاضْ إِكمّْڒنْ. خنِّي أَذْ قدّْمنْ إِفُونَاسنْ إِمژْيَاننْ خْ ؤُعَالْطَارْ نّشْ،