إِزهِّيذنْ 75

1 إِ ؤُمقّْرَانْ ن إِمغْنَاجنْ. ‘وَارْ تَّاردّدْجْ!’ أَزهّذْ ن أَسَافْ. إِزْڒِي. 2 نشِّينْ نتّْقَاذَا شكْ، أَ أَربِّي، نتّْقَاذَا! أَقَا إِسمْ نّشْ يُوذسْ، أَقَا لْمُوعْجِيزَاثْ نّشْ سَّاوَاڒنْ خْ مَانْ أَيَا. 3 مَاغَارْ نشّْ أَذْ خْضَارغْ ڒْحَاڒْ إِتّْوَاڭّنْ، أَذْ ڭّغْ شّْرعْ س ڒْحقّْ. 4 ثَامُّورْثْ أَكْ-ذ مَارَّا إِمزْذَاغْ نّسْ ثفْسِييْ، مَاشَا نشّْ سّْمتّْنغْ إِبِيلَارنْ نّسْ. سِيلَاهْ. 5 نشّْ نِّيغْ إِ إِبُوهَاڒِييّنْ: “وَارْ تّڭّْوذمْ شَا!"، إِ إِعفَّاننْ: “وَارْ سّْڭعَّاذمْ إِشّْ نْومْ! 6 وَارْ سّْڭعَّاذمْ إِشّْ نْومْ أَمُّو سنّجْ، وَارْ سَّاوَاڒمْ س نّْفَاخثْ!" 7 مَاغَارْ أَسْڭعّذْ وَارْ د-إِتَّاسْ زِي شَّارْقْ، نِيغْ زِي ڒْغَارْبْ ؤُڒَا زِي ڒخْڒَا. 8 مَاغَارْ أَربِّي ذ ڒْقَاضِي. نتَّا إِسّهكّْوَا إِجّنْ ؤُ إِسّْڭعَّاذْ ونّغْنِي. 9 مَاغَارْ أَقَا ذِينْ إِجّْ ن ڒْكَاسْ ذڭْ ؤُفُوسْ ن سِيذِي، بِينُو إِتّڭّْ كُوفُّو، إِتّْوَاخدْجَاضْ مَارَّا. نتَّا إِتّْكبَّا زَّايسْ. مَارَّا إِعفَّاننْ ن ثمُّورْثْ أَذْ ژمّنْ ؤُڒَا ذ ڒخْمِيرَا نّسْ ؤُمِي زَّايسْ إِ غَا سْونْ. 10 نشّْ أَذْ ث بَارّْحغْ إِ ڒبْذَا قَاعْ، أَذْ زهّْذغْ إِ أَربِّي ن يَاعْقُوبْ. 11 نشّْ أَذْ زذْمغْ مَارَّا أَشَّاونْ ن إِعفَّاننْ، أَشَّاونْ ن إِمْسڭَّاذنْ أَذْ تّْوَاسّْڭعّْذنْ.