إِزهِّيذنْ 96

1 غنّْجمْ إِ سِيذِي إِجّْ ن يزْڒِي أَمَايْنُو، غنّْجمْ إِ سِيذِي، مَارَّا ثَامُّورْثْ! 2 غنّْجمْ إِ سِيذِي، بَارْكمْ إِسمْ نّسْ، بشَّارمْ إِ ؤُسنْجمْ نّسْ أَسّْ خْ وَاسّْ. 3 بَارّْحمْ أَعُودْجِي نّسْ جَارْ ڒڭْنُوسْ، ڒعْجَايبْ نّسْ جَارْ مَارَّا ڒڭْنُوسْ. 4 مَاغَارْ سِيذِي ذ أَمقّْرَانْ، إِسّْذَاحدْجْ أَسمْغَارْ أَطَّاسْ، نتَّا ذ أَمْسَاڭّْوذْ مَاهُو مَارَّا إِربِّيثنْ. 5 مِينْزِي مَارَّا إِربِّيثنْ ن ڒڭْنُوسْ أَقَا أَثنْ ذ لْ-أَصْنَامْ، مَاشَا سِيذِي إِڭَّا إِجنْوَانْ. 6 ثِيسِّيقْثْ ذ ڒْعزّْ دْجَانْ زَّاثْ إِ وُوذمْ نّسْ، جّهْذْ ذ وَاژْرِي أَقَا أَثنْ ذِي زَّاوشْثْ نّسْ إِقدّْسنْ. 7 وْشمْ إِ سِيذِي، أَ، ثِيقبَّاڒْ ن ڒڭْنُوسْ، وْشمْ إِ سِيذِي أَعُودْجِي ذ جّهْذْ. 8 وْشمْ إِ سِيذِي أَعُودْجِي ن يِيسمْ نّسْ، أَوْيمْ-د ثَاوْهِيبْثْ، أَسمْ-د غَارْ ڒمْرَاحَاثْ نّسْ، 9 بنْذقْ زَّاثْ إِ سِيذِي س ؤُشوَّارْ إِقدّْسنْ، أَرْجِيجمْ زَّاثْ إِ وُوذمْ نّسْ، أَ مَارَّا ثَامُّورْثْ! 10 إِنِيمْ جَارْ ڒڭْنُوسْ: “سِيذِي إِحكّمْ!” نِيشَانْ، ڒخُّو دُّونشْثْ ثْبدّْ ثمْثنْ، وَارْ تّنْهزِّي عَاذْ. نتَّا أَذْ إِحْكمْ ڒڭْنُوسْ س ڒْحقّْ. 11 أجّْ إِجنْوَانْ أَذْ فَارْحنْ ؤُ ثَامُّورْثْ أَذْ ثَارْشقْ، أجّْ أَذْ إِزْهَارْ ڒبْحَارْ ذ ؤُعمَّارْ نّسْ، 12 أجّْ أَذْ إِسْڒِيوْڒِيوْ ييَّارْ س ڒفْرَاحثْ س مَارَّا مِينْ ذَايسْ، خنِّي أَذْ سْڒِيوْڒِيونْثْ مَارَّا ثْشجُّورَا ن وزْغَارْ 13 زَّاثْ إِ وُوذمْ ن سِيذِي، مَاغَارْ نتَّا أَذْ د-يَاسْ، مَاغَارْ نتَّا أَذْ د-يَاسْ حِيمَا أَذْ إِشَارّعْ ثَامُّورْثْ. نتَّا أَذْ إِشَارّعْ دُّونشْثْ س ثْسڭْذَا ؤُ ڒڭْنُوسْ س ڒْحقّْ نّسْ.