أَسَارْڭبْ 18

1 أَوَارْنِي أَسْ ژْرِيغْ إِجّْ ن لْمَالَاكْ نّغْنِي إِهكّْوَا-د زڭْ ؤُجنَّا، غَارسْ صُّولْطَا ثَامقّْرَانْثْ، ؤُشَا طّْيَا ن ؤُعُودْجِي نّسْ ثڭَّا ثَافَاوْثْ كُوڒْشِي إِ ثمُّورْثْ. 2 نتَّا إِڒَاغَا س ثْمِيجَّا ثجْهذْ، إِقَّارْ: “أَقَا ثوْضَا، ثوْضَا ثنْذِينْثْ ثَامقّْرَانْثْ بَابِيلْ، ثذْوڒْ ذ ثَازذِّيغْثْ إِ شّْوَاطنْ ذ ڒحْبسْ إِ كُوڒْ ڒَارْيَاحْ أَمنْڭُوسْ أَمنْعِي، 3 مِينْزِي ثسّْخدْجضْ بِينُو ن فَارْقْ-شّْغڒْ نّسْ إِ مَارَّا ڒڭْنُوسْ، ؤُ مِينْزِي إِجدْجِيذنْ ن ثمُّورْثْ أَقَا سّْفسْذنْ إِخفْ نْسنْ زَّايسْ، ؤُ مِينْزِي إِسبَّابنْ ن ثمُّورْثْ ذوْڒنْ ذ ثْوَاجَّارْ س جّهْذْ ن ؤُطمّسْ نّسْ ن وَاڭْرَا." 4 ؤُشَا سْڒِيغْ إِ ثْمِيجَّا نّغْنِي ثْڒَاغَا-د زڭْ ؤُجنَّا: “فّغْ زَّايسْ، أَ ڒْڭنْسْ إِنُو، حِيمَا وَارْ تِّيڒِينْ دّْنُوبْ نّسْ خْ يِيرِي نّشْ ؤُشَا وَارْ ثْكسِّيذْ زِي جّْرَايحْ نّسْ، 5 مِينْزِي دّْنُوبْ نّسْ أَقَا إِوْضنْ غَارْ ؤُجنَّا، ؤُشَا أَربِّي أَقَا إِعْقڒْ خْ ڒْمُوعْصِييّثْ نّسْ. 6 أَرّمْ-د خَاسْ أَمْ مَامّشْ د-ثَارَّا نتَّاثْ، أَرّمْ-د خَاسْ س ؤُضفُّوسْ عْلَاحْسَابْ ڒخْذَايمْ نّسْ، خدْجضْ أَسْ س ؤُضفُّوسْ ذڭْ ؤُغَارَّافْ نِّي ثُوغَا ثْخدْجضْ نتَّاثْ. 7 خڒْفمْ أَسْ-د أَعدّبْ ذ وشْضَانْ أَنشْثْ ثُوغَا نتَّاثْ ثسّْعُودْجِي ؤُ ثسّْڭعّذْ إِخفْ نّسْ مِينْزِي ثنَّا ذڭْ وُوڒْ نّسْ: ‘أَقَا قِّيمغْ أَمْ ثْجدْجِيذْثْ، وَارْ دْجِيغْ ذ ثَاجَّاتْشْ، ؤُشَا أَشْضَانْ وَارْ ث ژَترّغْ شَا!’ 8 س ؤُينِّي ذڭْ إِجّْ ن وَاسّْ أَذْ خَاسْ وْضَانْثْ مَارَّا جّْرَايحْ نّسْ: ڒْموْثْ، أَشْضَانْ ذ ڒَاژْ، ؤُشَا أَذْ ثتّْوَاشْمضْ ذِي ثْمسِّي، مِينْزِي سِيذِي، ذ ونِّي خَاسْ إِ غَا إِحكْمنْ، أَقَا إِجْهذْ. 9 إِجدْجِيذنْ ن ثمُّورْثْ، إِنِّي كِيذسْ إِڭِّينْ فَارْقْ-شّْغڒْ ؤُ سّْڭعّْذنْ إِخفْ نْسنْ، أَذْ خَاسْ رُونْ، أَذْ خَاسْ وْثنْ أَڭجْذُورْ خْمِي غَا ژَترنْ دّخَّانْ ن ثْمسِّي نّسْ. 10 نِيثْنِي أَذْ قِّيمنْ بدّنْ غَارْ ڒَاڭّْوَاجْ زِي ثڭّْوُوذِي ن ؤُعدّبْ نّسْ، قَّارنْ: ‘ؤُشْثْ، ؤُشْثْ، ؤُشْثْ، خَامْ، أَ ثَانْذِينْثْ ثَامقّْرَانْثْ، بَابِيلْ، ثَانْذِينْثْ إِجهْذنْ، مِينْزِي أَقَا يُوسَا-د ڒْحُوكْمْ نّمْ ذڭْ إِشْثْ ن ثْسَاعّثْ!’ “ 11 إِسبَّابنْ ن ثمُّورْثْ أَذْ خَاسْ رُونْ، أَذْ شضْننْ، مِينْزِي ؤُڒَا ذ إِجّْ وَارْ إِسِّيغْ عَاذْ سّڒْعثْ نْسنْ: 12 سّڒْعثْ ن وُورغْ ذ نُّوقَارْثْ ذ يژْرَا يِيغْڒَانْ ذ ثْيَاقُوثِينْ ذ ڒقْطنْ ذ أَرْجُووَانِي ذ ڒحْرِيرْ أَزڭّْوَاغْ إِحذْقنْ ذ عْڒَامْ كُوڒْ أَكشُّوضْ إِتّْفُوحنْ ذ عْڒَامْ كُوڒْ ڒقْشُوعْ زِي ڒْعَاجْ ذ عْڒَامْ كُوڒْ ڒقْشُوعْ زڭْ ؤُكشُّوضْ إِغْڒَانْ ذ نّْحَاسْ ذ وُوزَّاڒْ ذ ڒْمَارْمُورْ 13 ذ ڒْقَارْفَا ذ ڒبْخُورْ ذ مِيرُّو ذ جَّاوِي ذ بِينُو ذ زّشْثْ ن زِّيثُونْ ذ أَرنْ ن سّْمِيذْ ذ وُودْجِي ذ ييْسَانْ ذ إِكَارُّوثنْ ؤُڒَا ذ أَرِّيمَاثْ ذ ڒعْمُورْ ن إِوْذَانْ. 14 أَقَا ڒْغِيدْجثْ إِ ذِي ثُوغَا إِتّْمژْرِي ڒعْمَارْ نّمْ، أَقَا ثِيڭّْوجْ خَامْ، ؤُڒَا ذ مَارَّا مِينْ ثُوغَا غَارمْ ذ أَڭْڒَا ذ مِينْ إِتِّيسِّيقنْ، أَقَا إِودَّارْ، وَارْ ث ثْژَارّذْعمَّارْصْ عَاذْ. 15 إِسبَّابنْ ن ڒحْوَايجْ-أَ، إِنِّي إِذوْڒنْ زَّايْسنْثْ ذ ثْوَاجَّارْ، وَارْ ثنْثْ تِّيفنْ عَاذْ، ؤُشَا أَذْ قِّيمنْ غَارْ ڒَاڭّْوَاجْ زِي ثڭّْوُوذِي ن ؤُعدّبْ نّسْ، أَمْ تّْرُونْ ؤُ أَمْ شطّْننْ، 16 أَذْ إِنِينْ: “ؤُشْثْ، ؤُشْثْ خَامْ، أَ شمْ، ثَانْذِينْثْ ثَامقّْرَانْثْ إِ يَارْضنْ ڒقْطنْ ذ أَرْجُووَانِي ذ أَزڭّْوَاغْ إِحذْقنْ إِقّنْ س وُورغْ ذ يژْرَا إِغْڒَانْ ذ ثْيَاقُوثِينْ، 17 س مِينْزِي ذڭْ إِشْثْ ن ثْسَاعّثْ أَقَا إِودَّارْ وَاڭْڒَا أَمقّْرَانْ نِّي!” مَارَّا إِنِّي إِندّْهنْ إِغَارُّوبَا ذ مَارَّا إِنِّي إِتّكّنْ خْ ڒبْحَارْ ذڭْ إِغَارُّوبَا ذ مَارَّا إِبحْرِييّنْ ذ مَارَّا إِنِّي إِتّْسبَّابنْ ذِي ڒبْحَارْ قِّيمنْ بدّنْ غَارْ ڒَاڭّْوَاجْ. 18 نِيثْنِي سْغُويّنْ ؤُمِي ژْرِينْ دّخَّانْ ن ثْمسِّي نّسْ، نَّانْ: “وِي إِزمَّارنْ أَذْ إِمْقُودَّا أَكْ-ذ ثنْذِينْثْ-أَ ثَامقّْرَانْثْ؟" 19 سُّويُوسنْ ؤُشَاڒْ خْ إِزدْجِيفنْ نْسنْ ؤُشَا سْغُوينْ، أَمْ تّْرُونْ ؤُ أَمْ تّشْضِيننْ، نَّانْ: “ؤُشْثْ، ؤُشْثْ خَامْ، أَ شمْ، ثَانْذِينْثْ ثَامقّْرَانْثْ نِّي ذِي ذوْڒنْ ذ ثْوَاجَّارْ مَارَّا إِنِّي غَارْ إِدْجَا إِغَارُّوبَا ذِي ڒبْحَارْ، س ؤُبَارُّو ن وَاڭْڒَا نّسْ، مِينْزِي ذڭْ إِشْثْ ن ثْسَاعّثْ ثْودَّارْ!" 20 “فَارْحثْ زَّايسْ، أَ أَجنَّا، ؤُ كنِّيوْ، أَ إِمْقدَّاسنْ ذ رُّوسُولْ ذ إِنَابِييّنْ، مِينْزِي أَربِّي أَقَا إِسُّوفّغْ-د ڒحْكَامثْ نّسْ خَاسْ!" 21 ؤُشَا إِجّْ زِي لْمَالَاكَاثْ نِّي إِسّْڭعّذْ إِجّْ ن وژْرُو أَمقّْرَانْ أَنشْثْ ن ثصْضَارْثْ ن ثْسِيرْثْ، إِنْضَارْ إِ-ث ذِي ڒبْحَارْ، إِقَّارْ: “أَمُّو س جّهْذْ أَذْ ثمّنْضَارْ ثَانْذِينْثْ ثَامقّْرَانْثْ بَابِيلْ ؤُشَا وَارْ ثتّْوِيفِي عَاذْعمَّارْصْ! 22 ڒْحسّْ ن لهَارْپَا ذ ؤُسُوضِي ذڭْ ؤُيِيشّْ ن إِشَارِّي، ذ ڒْحسّْ ن عْڒَامْ كُوڒْ أَغنّجْ ؤُ ن يِينِّي إِتّْسُوضنْ ذِي ڒْبُوقْ، وَارْ إِتّْوَاسڒْ عَاذْ ذَايمْ. 23 عمَّارْصْ أَذْ ذَايمْ ثتّْوَاژَارْ عَاذْ طّْيَا ن ڒفْنَارْ، ؤُشَا ؤُڒَا ذ ڒْحسّْ ن وسْڒِي ذ ڒْحسّْ ن ثسْڒِيثْ وَارْ إِتّْوَاسڒْ عَاذْ ذَايمْ. إِسبَّابنْ نّمْ ثُوغَا أَثنْ ذ إِمقّْرَاننْ ن ثمُّورْثْ، مِينْزِي س ثْسحَّارْثْ نّمْ، أَقَا ثْخذْعذْ ڒڭْنُوسْ مَارَّا. 24 أَقَا إِتّْوَافْ ذَايمْ إِذَامّنْ ن إِنَابِييّنْ ذ إِمْقدَّاسنْ، إِنِّي إِتّْوَانْغنْ ذِي ثمُّورْثْ."