إِزْڒِي خْ إِزْڒَانْ 5

1 “نشّْ ؤُسِيغْ-د غَارْ وحْوِيشْ إِنُو، أَ ؤُتْشْمَا، أَ ثَاسْڒِيثْ إِنُو، ڒقْضغْ مِيرُّو إِنُو أَكْ-ذ بَالْسَامْ. إِنُو، شِّيغْ أَغْرُومْ ن ثْزِيزْوَا أَكْ-ذ ثَامّنْثْ إِنُو، سْوِيغْ بِينُو إِنُو ذ ؤُغِي إِنُو. إِمدُّوكَّاڒْ، أشّمْ، سْومْ، سْشَارمْ، أَ إِمْعِيزّنْ!” ثَاسْڒِيثْ ثْزهْزَا أَذْ ثَارْزمْ إِ يسْڒِي 2 “نشّْ طّْسغْ، مَاشَا ؤُڒْ إِنُو إِفَاقْ. أَقَا ذَا ثْمِيجَّا ن لِّيفْ إِنُو، ونِّي إِسّْقَارْقْبنْ: ‘أَرْزمْ أَيِي، أَ ؤُتْشْمَا، ثَامدُّوكّتْشْ إِنُو، ثَاذْبِيرْثْ إِنُو، أَ كُوڒْشِي إِنُو، مَاغَارْ أَزدْجِيفْ إِنُو إِشُّورْ س نّْذَا، إِمُوزَارنْ إِنُو شُّورنْ س ثُوذِّيمِينْ ن دْجِيڒثْ!’ 3 أَقَا كّْسغْ أَرُّوضْ إِنُو، مَامّشْ إِ ث غَا يَارْضغْ عَاوذْ؟ إِضَارنْ سِّيرْذغْ ثنْ، مَا أَذْ ثنْ سّْخمْجغْ عَاوذْ؟ 4 لِّيفْ إِنُو إِسّكّْ-د أَفُوسْ نّسْ زڭْ ؤُنُوقِّيبْ ن ثوَّارْثْ، ؤُشَا إِنْهزّْ وُوڒْ إِنُو زَّايسْ. 5 نشّْ بدّغْ حِيمَا أَذْ أَرْزْمغْ إِ لِّيفْ إِنُو، إِفَاسّنْ إِنُو ؤُذُومنْ س مِيرُّو، زڭْ إِضوْضَانْ إِنُو إِسِّيزّڒْ مِيرُّو خْ إِفَاسّنْ ن زّكْرُونْ. 6 نشّْ أَرْزْمغْ إِ لِّيفْ إِنُو، مَاشَا لِّيفْ إِنُو ثُوغَا يُويُورْ، إِعْذُو. إِفّغْ ڒعْمَارْ إِنُو ؤُمِي ثُوغَا إِسَّاوَاڒْ! نشّْ أَرْزُوغْ خَاسْ، مَاشَا وَارْ ث ؤُفِيغْ. نشّْ ڒَاغِيغْ أَسْ، نتَّا وَارْ خَافِي د-يَارِّي. 7 ؤُفِينْ أَيِي إِعسَّاسنْ غَارْ ونّضْ نْسنْ ذِي ثنْذِينْثْ، نِيثْنِي وْثِينْ أَيِي، يزْمنْ أَيِي، أَقنْذُورْ إِنُو كّْسنْ أَيِي ث إِعسَّاسنْ ن ڒحْيُوضْ.” إِزْڒِي ن ثسْڒِيثْ أَكْ-ذ يسِّيسْ ن ؤُرْشَالِيمْ 8 “نشّْ أَذْ كنِّينْثْ سّْجَادْجَاغْ، أَ يسِّيسْ ن ؤُرْشَالِيمْ، مَاڒَا كنِّينْثْ ثُوفِينْثْ لِّيفْ إِنُو، مِينْ ذ أَسْ غَا ثِينِينْثْ؟ أَقَا ثسّحْڒشْ أَيِي ثَايْرِي." 9 “مِينْ غَارسْ غَارْ لِّيفْ نّمْ كْثَارْ خْ لِّيفْ نّغْنِي، أَ شمْ إِ ذِي إِدْجَا وَاژْرِي قَاعْ زِي ثمْغَارِينْ؟ مِينْ غَارسْ غَارْ لِّيفْ نّمْ كْثَارْ خْ إِنّغْنِي، أَقَا شمْ أَمُّو إِ ذ أَنغْ ثسّْجَادْجَاذْ؟" 10 “لِّيفْ إِنُو ذ أَشمْڒَاڒْ إِتِّيسِّيقنْ ذ أَزڭّْوَاغْ أَمْ إِذَامّنْ، إِتّْبَانْ أَمْ ؤُبَانْذُو سنّجْ خْعشْرَا ن ڒُوڒُوفْ. 11 أَزدْجِيفْ نّسْ ذ ؤُرغْ إِقُّورْ إِصْفَانْ، إِمُوزَارنْ ن ؤُشُوَّافْ نّسْ ذ ثِيوْرِيرِينْ إِتّڭّنْ أَمْ ڒمْوَاجْ، ذ إِبَارْشَاننْ أَمْ يِيبَاغْڒِيونْ. 12 ثِيطَّاوِينْ نّسْ ڭِّينْثْ أَمْ ثذْبِيرِينْ غَارْ ثْسدْجْيَاوِينْ ن وَامَانْ، عُومّنْثْ ذڭْ ؤُغِي، قِّيمنْثْ ذِي ثْشُويَارْ نْسنْ أَمْ إِژْرَا إِغْڒَانْ. 13 إِمڭِّيزنْ نّسْ ڭِّينْ أَمْ يِيحْوِيشنْ ن ڒعْطُورْ، شُّورنْ س ڒعْشُوبْ إِتّْفُوحنْ، إِينْشِيشنْ نّسْ أَمْ ثْلِيلِّيشِينْ، تُّوذُومنْ س مِيرُّو إِفسْينْ. 14 إِغَادْجنْ نّسْ أَمْ يِيقضْبَانْ ن وُورغْ، عمَّارنْثْ س إِژْرَا ن ثخْرِيسُولِيثْ، أَعذِّيسْ نّسْ إِڭَّا أَمْ ڒْعَاجْ إِتِّيسِّيقنْ، ڒحّْفنْ ث س ثْيَاقُوثِينْ ن صَافِّيرْ. 15 إِمسْضَانْ نّسْ ذ إِپِيلَارنْ ن ڒْمَارْمُورْ، خْ ذْسُوسَا ن وُورغْ إِتّْوَاصفَّانْ. إِبَانْ-د نتَّا أَمْ لُوبْنَانْ، إِتّْوَافَارْزْ أَمْ ثْشجَّارْثْ ن ثنْڭلْثْ. 16 أَنغْ نّسْ إِشُّورْ س ثَاژْيُوذِي، مَارَّا إِ غَارسْ إِشُووَّارْ. وَا ذ لِّيفْ إِنُو، وَا ذ أَمدُّوكّڒْ إِنُو، أَ كنِّينْثْ يسِّيسْ ن ؤُرْشَالِيمْ!"