1 Itissalunikiyyen 5

1 Maca zi jjihet n zzmanat d tsaɛɛetin, a aytma, aqa nhřa ma ad awem dd-ariɣ. 2 Kenniw simant nwem tessnem nican aqa ass n Siditneɣ ad dd-yas am uceffar di ǧiřet. 3 Xmi ɣa inin nitni: ‘Aqa řehna d řhudnet!’, řexdenni ad xasen ikk wareyyeb deɣya, am ttekken řewjeɛ n tarut x temɣart tenni s ddeyset, uca war din mani ɣa yarewřen. 4 Maca kenniw, a aytma, war teǧim ca di taǧest maḥend ad xawem-dd iwḍa wass nni am uceffar, 5 maɣar kenniw marra d tarwa n tfawt d tarwa n wass, war teǧim ca n ǧiřet niɣ n taǧest. 6 S uyenni ittxeṣṣa aneɣ war nᵉtteṭṭeṣ am wenneɣni, maca ad niři nfaq, neḥḍa, 7 minzi inni ittᵉṭṭṣen, aqa ttᵉṭṭṣen di ǧiřet, u inni ittɣellan, aqa ttɣellan s ǧiřet, 8 maca ejj aneɣ, neccin i yeǧan d iḥenjiren n wass, ad niři neḥḍa deg ixariṣṣen nneɣ, ad nḥezzem idmaren nneɣ s warruḍ n wuzzař n l’iman d tayri, u ad nessars lkask n usitem n Tudart x uzeǧif. 9 Minzi AREBBI war d aneɣ yeggi i weɣḍab, maca ḥima ad neṭṭef Tudart di Siditneɣ Yasuɛ Lmasiḥ, 10 wenni xaneɣ immuten, ḥima neccin, ma nfaq niɣ neṭṭeṣ, ad kides neddar. 11 S uyenni ggem uř deg wayawya, bnam ijjen wenneɣni am t teggim ɛawed. Awař ɣar uneggaru d useǧem 12 Maca nettar zzaywem, a aytma, ad tessnem inni itteggen tizemmar aṭṭas jar awem d inni xawem iǧan di Siditneɣ d inni kenniw isseřmaden, 13 maḥend ad ttweqqaren zzaywem umi d asen tᵉttemmřem tayri s ufeyyeḍ uca ad teḥḍam řehna akidsen zi ssibbet n řxedmet nsen. 14 Neɛřem awem, a aytma, ad tseggmem inni dd-iffɣen zeg webrid, ggem uř deg inni war ɣarsen teǧi teryast, arbum ddqeř n yinni iḍeɛfen, iřim d iṣebbaren ak-d marra. 15 Ḥḍam maḥend uřa d ijj war ittentiqim řɣar s řɣar, maca arzum řebda min iṣebḥen ak-d wayawya uca i kuřci. 16 Farḥem řebda, 17 ẓẓaǧem břa qeṭṭu, 18 qadem di marra timesřayin, minzi d man aya min ixs AREBBI di Yasuɛ Lmasiḥ i kenniw. 19 War ssxessyem ca Arruḥ, 20 war sseḥqaram awařen n nnubuwat, 21 weznem qaɛ min iǧan uca ṭṭfem ɣar min iṣebḥen. 22 Aggʷejem x marra min iǧan ddab n tuɛeffna. 23 Iři ad kenniw issqeddes AREBBI n řehna marra uca ad iḥḍa marra arruḥ d řeɛmar d arrimet nwem břa řɛib ař tawasit n Siditneɣ Yasuɛ Lmasiḥ. 24 Aqa d Wenni xawem dd-ittřaɣan d amtiqqi, aqa Netta ad t igg. 25 A aytma, ksim aneɣ řmeɛruf ɛawed. 26 Seǧmem x wawmaten nneɣ s usudem iqeddsen. 27 Necc ssjuǧeɣ kenniw deg wudem n Siditneɣ maḥend ad tɣarem tabrat-a i marra awmaten imqeddasen. 28 Arḍa n Siditneɣ Yasuɛ Lmasiḥ ad kiwem yiři.