2 Timutiyu 1

1 Bulus, rrasul n Yasuɛ Lmasiḥ ɛlaḥsab řxaḍar n AREBBI, ɛlaḥsab lwaɛd n Tudart i din iǧan di Yasuɛ Lmasiḥ. 2 I Timutiyu, mmi iɛizzen: arḍa d arreḥmet d řehna zi AREBBI, Babatneɣ, u zi Yasuɛ Lmasiḥ, Siditneɣ. Acejjeɛ i Timutiyu 3 Necc ttqadiɣ AREBBI wenni umi ɛebdeɣ am řejdud inu s tnefsect tezdeg, am ttidareɣ cek břa qeṭṭu di tẓaǧitin inu ass d ǧiřet. 4 Weḥḥceɣ ad cek ẓareɣ, xmi ttfekkareɣ deg imeṭṭawen nnec u ttwaccureɣ s řefraḥet, 5 umi ttidareɣ di l’iman nnec břa nnifaq, l’iman nni tuɣa izeddɣen amezwar di ḥennac Luwis u deg yemmac Uniki, uca, aqa ssneɣ nican belli izdeɣ dayek ɛawed. 6 S uyenni ssɛeqřeɣ cek ad tessekkared tawhibt n AREBBI tenni dayek s webrid n wesrusi n ifassen inu xak. 7 Minzi AREBBI war d aneɣ iwci arruḥ n řɛurret, maca arruḥ n jjehd d tayri d utebbet. 8 S uya war ttseḍḥi ca ḥima ad tewced cchadet x Siditneɣ, u war ttseḍḥi zzayi necc, wenni d ameḥbus nnes, maca ksim marra řɣar di ṭṭweɛ n L’Injil s jjehd n AREBBI, 9 wenni aqa iwca aneɣ Tudart uca iřaɣa aneɣ-dd s třaɣit iqeddsen, war iǧi ɛlaḥsab řexdayem nneɣ, maca ɛlaḥsab řxaḍar nnes d arḍa nni i d aneɣ immewcen di Yasuɛ Lmasiḥ qbeř řweqt n zzmanat. 10 Aqa arḍa-ya ittwasseḍhar řexxu s uxecci n wenni d aneɣ itticen Tudart, Yasuɛ Lmasiḥ, wenni tuɣa ibeḍřen řmewt uca isseḍhar Tudart war ifennin s L’Injil. 11 Zzayes ttwassgeɛɛdeɣ necc d ambarreḥ d rrasul d umseřmad n řegnus. 12 X ssibbet-a ɛawed ksiɣ armeḥ u war ttseḍḥiɣ ca, minzi ssneɣ man wen i zi ttamneɣ uca aqa ttwassqenɛeɣ belli Netta aqa ɣares ṣṣulṭa, maḥend ad iḥḍa i necc aḍman inu ař ass nni. 13 Ejj ad ɣarek iqqim lmital n wawařen iṣeḥḥen i zzayi tesřid s l’iman d tayri i iǧan di Yasuɛ Lmasiḥ. 14 Ḥḍa aḍman aṣebḥan i d ac ittwawekkřen s Arruḥ Iqeddsen nni dayneɣ izeddɣen. 15 Aqa tessned belli marra inni iǧan di Asiya jjin ayi, zzaysen Fixilus d Hirmuxinis. 16 Ad yarzef Siditneɣ s arreḥmet di taddart n Unisifurus, minzi tuɣa issareyyeḥ ayi aṭṭas n twařawin uca war iseḍḥi ca zi ssnaseř n tmeḥbast inu. 17 Maɣar řami dd-yusa ɣar Ruma, tuɣa yarezzu xafi s cḍaret aṭṭas uca yufa ayi. 18 Ad as iwc Siditneɣ, aqa ad yaf arreḥmet ɣar Siditneɣ deg wass nni. Uca mecḥař isexxar ayi di Afasus, cek tessned ktar.