Řexdayem n rrusul 2

1 Umi kemmřen wussan ař Řɛid n Xemsin n Wussan, tuɣa aten marra jmiɛ munen. 2 X ict n řɣefřet yusa-dd ijj n zzhir zeg ujenna, igga axmi d asemmiḍ ijehden aṭṭas, iccur marra taddart mani tuɣa qqimen. 3 Uca ḍharen asen-dd iřsawen am n tmessi nni ittemsebḍan, arsin x kuř ijjen zzaysen, 4 u marra nitni dewřen ccuren s Arruḥ Iqeddsen, bdan ad ssiwřen s ijj n yiřes nneɣni am mammec d asen iwca Arruḥ ad zzaysen neṭqen. 5 Tuɣa ttɣiman di Urcalim iryazen nni ittegʷeden AREBBI, Udayen zi marra řegnus sadu ujenna. 6 Umi ikkar zzhir-a, imun marra řgens dinni uca tbehten, minzi kuř ijj tuɣa ittesřa asen ssawařen s yiřsawen nsen ifarzen. 7 Dehcen, tbehten marra, nnan jar asen: “Ma war ǧin marra ina inni din issawařen d Ijaliliyyen? 8 Mammec d asen nesřa neccin, kuř ijj zzaysen, ssawařen s yiřes i zi dd-netwaxřeq? 9 Ipartiyyen d Imidiyyen d Iɛilamiyyen d imezdaɣ n Misuputamya, tenni d tammurt jar tnayen n iɣezran, d Wudayen d inni zi Kappadukiya, inni dd-yusin zi jjwayeh n Punṭus d Asiya, 10 zi jjwayeh n Frixiya, Pamfiliya d Miṣra u zi jjwayeh n Libiya ɣar Qayrawan, uřa d inni dd-yusin zi Ruma, am Udayen am yinni idewřen d imɛacaren n ddin n Wudayen, 11 innidd-yusin zi Krita u zi Ɛarabiyya, aqa neccin nesřa asen ssawařen s yiřes nneɣ x řeɛjayeb imeqqranen n AREBBI!" 12 Marra tbehten uca nnan ijj i wenneɣni: “Min ixs ad yini man aya?" 13 Maca inneɣni sthezzan zzaysen, nnan: “Nitni swin binu n jdid.” Abarreḥ n Buṭrus i řɣaci 14 Awarni as ikkar Cimɛun Buṭrus, ak-d ḥiṭac n rrusul. Netta issgeɛɛed tmijja nnes, inna asen: “Kenniw, a iryazen d Udayen u marra imezdaɣ n Urcalim, ittxeṣṣa ad snem aya, sřem ɣar wawařen inu! 15 Iwdan-a war scaren ca am mammec d awem ittɣiř, minzi aqa-tt d tasaɛɛet d třata n wass. 16 Maca aya min ittwannan zeg unabi Yuwil: 17 ‘Ad yiři deg wussan ineggura, iqqar AREBBI, aqa ad farrɣeɣ Arruḥ inu x marra ddat. Ad nebban iḥenjiren nwem d tḥenjirin nwem, ibřiɣen nwem ad twařan iweḥḥan, uca imeqqranen nwem ad arjan tirja. 18 Uřa x imsexxaren inu u x tiyya inu ad farrɣeɣ Arruḥ inu deg wussan nni, uca ad nebban. 19 Ad wceɣ lmuɛjizat deg ujenna uřa d řeɛřamat x temmurt: idammen d tmessi d řefwar n ddexxan. 20 Ad tedweř tfuct ɣar taǧest, d tziri ɣar idammen, qbeř dd ɣa yas wass imɣaren iɛuǧen n SIDI. 21 Uca ad yiři, aqa marra wi ɣa iřaɣan x Yisem n SIDI, ad ittwassenjem!’ 22 A iryazen, ayt n Israil, sřem awařen-a: Yasuɛ Nnaṣiri, aqa-t d Bnadem i d awem dd-ittwasscanen zi AREBBI s tmegga timeqqranin d řeɛřamat d lmuɛjizat i yegga AREBBI s ufus nnes di řwesṭ nwem, am mammec tessnem kenniw, 23 aqa Wanita, wenni ittwaḥuzen i man aya i Netta ɛlaḥsab tussna n AREBBI qbeř u ɛlaḥsab řxaḍar nnes, aqa kenniw tsellmem t deg ifassen n iɛeffanen u tṣellbem t u tenɣim t. 24 Maca issnekkar i-t-i-dd AREBBI uca issarxu iseɣwan n řaxart, maɣar war izemmar ad ittwaṭṭef di řaxart. 25 Minzi Dawud inna xas: ‘Tuɣa ttwařiɣ Sidi zzati di kuř amur, aqa-t x yefus inu, ḥima war ttmeyyiřeɣ. 26 S uya ifarreh uř inu uřa d asemɣar inu ifeyyeḍ s řefraḥet, uřa d arrimet inu ad yareyyeḥ x usitem wanita, 27 minzi war tᵉttejjid řeɛmar inu di řaxart, uřa war tᵉttejjid Amsizdeg nnec ad ikiccu. 28 Cek tessecned ayi abrid n Tudart, Cek ad ayi teccured s řefraḥet di lḥaḍar nnec.’ 29 A iryazen tawmat, aqa teɛdeř ayi ad awem ssiwřeɣ s bṭayṭay x arrays n řejdud nneɣ Dawud, wenni aqa immut, ittwanḍeř, uca anḍeř nnes aqa-t ɣarneɣ ař ass-a. 30 Maɣar netta tuɣa d anabi, issen belli AREBBI ijjuǧ as s ict n tjaǧit: ‘Ad ssɣimeɣ ijjen zi řɣiǧet n tɛeddist nnec x řkursi n řɛarc nnes.’ 31 Ammu tuɣa netta izwar iẓra uca issiweř x tnukra n Lmasiḥ, belli war ittwajji ca di řaxart uca arrimet nnes war tᵉttaci akiccu. 32 Yasuɛ wanita aqa issnekkar i-t-i-dd AREBBI u neccin marra d řechud nnes. 33 Netta ittwassgeɛɛed ař afus afusi n AREBBI uca iṭṭef lwaɛd n Arruḥ Iqeddsen zi Babas. Aqa ifarreɣ tawhibt-a řexxu am mammec tᵉttwařam u tᵉttesřam. 34 Dawud maca war igeɛɛed ca ɣar ijenwan, maɣar inna: ‘SIDI inna i Sidi inu: Qqim x yefus inu, 35 ař d ɣa ggeɣ řɛedyan nnec d tanebdat sadu iḍaren nnec.’ 36 Ad tessen marra taddart n Israil nican, belli AREBBI igga Yasuɛ wanita, wenni tṣellbem kenniw, d SIDI d Lmasiḥ." 37 Řami sřin man aya, tudef asen deg wuř nsen daxeř, nnan i Cimɛun u i rrusul nneɣni: “Min ɣa negg, a tawmat nneɣ?" 38 Inna asen Cimɛun: “Tubem, ejj kuř ijjen zzaywem ad ittwasseɣḍeṣ s Yisem n SIDI Yasuɛ i weɣfar n ddnub, uca ad tqebřem tawhibt n Arruḥ Iqeddsen. 39 Minzi lwaɛd i kenniw u i tarwa nwem u i marra inni iǧan ɣar řaggʷaj, inni x i d ɣa iřaɣa AREBBI nneɣ." 40 Uca s wawařen nneɣni aṭṭas tuɣa isseqneɛ u iɛřem asen, inna: “Nejmem zi taṣiřet-a ifarɣen." 41 Tuɣa jar asen inni iwejden ad qebřen awař nnes uca ttwassɣeḍṣen nitni. Mmarnin-dd deg wass nni ɛřaḥař teřt-ařaf n řeɛmur. Tamesmunt n yenni yumnen di Lmasiḥ 42 Nitni qqimen ṣbaren di tɣuri n rrusul u carrcen di tẓaǧit u di tareẓẓit n weɣrum n nniɛmet. 43 Kuř ijjen tudef i-t tiggʷudi uca msarent lmuɛjizat d řeɛřamat aṭṭas s ifassen n rrusul di Urcalim. 44 Marra inni yumnen tuɣa aten munen jmiɛ, u marra min ɣarsen tuɣa icarc. 45 Inni ɣar iǧa wagřa tuɣa zznuzan man aya uca beṭṭan arbeḥ ɛlaḥsab min iḥdaj kuř ijj. 46 Tuɣa ttmunen kuř ass di Zzawect Tameqqrant s dmam d ijjen, ttareẓẓan aɣrum di tudrin, ksin macca nsen s řefraḥet u s wuř iṣfa, 47 am ssemɣaran di AREBBI u tuɣa ttwassɛizzen ɣar marra iwdan. Kuř ass tuɣa Siditneɣ yarenni ɣar tmesmunt inni iwḍen ɣar Tudart.