Ḥizqiyal 30

1 Yusa-dd ɣari wawař n SIDI, inna: 2 “A mmis n bnadem, nabb uca ini: ‘Ammu i iqqar Sidi inu, SIDI: Rum! Ayyehhat x wass nni! 3 Minzi yudes i yeǧa wass nni, yudes i yeǧa wass i SIDI, ass n iseynuten. Ad yiři d tasaɛɛet n řegnus. 4 Ad dd-yas ssif di Miṣra. Ad yiři warjef ameqqran di temmurt n Kuc, xmi ɣa wḍan inni ittwassnuqqben di Miṣra, minzi ad awyen afeyyeḍ n wagřa nnes, ad areddǧen dsusa nnes. 5 Kuc d Fuṭ d Lud d ɛřam kuř ibarraniyyen, d Kub d ayt n temmurt n Řɛahd ad kisen wḍan s ssif.’" 6 “Ammu i iqqar SIDI: ‘Inni ittcařen x Miṣra ad wḍan u nnfaxet n ṣṣulṭa nnes ad tɣarq. Zi Majdal ař Aswan ad wḍan s ssif di temmurt!’, ammu i iqqar Sidi inu, SIDI. 7 ‘Nitni ad ttwaredǧen di řwesṭ n temmura ittwaredǧent u tineddam nnes ad iřint di řwesṭ n tneddam nneɣni ittwaxarrben. 8 Xenni ad ssnen belli Necc d SIDI, xmi ɣa ssarɣeɣ timessi di Miṣra uca marra inni tt ittɛawanen ad ttwarẓen. 9 Deg wass nni ad ffɣen ireqqasen s tɣarruba zi zzat n wudem inu, maḥend ad ssiggʷeden Kuc wenni umi ittɣiř aqa netta di řaman. Ad daysen yiři warjef ameqqran, amecnaw deg wass nni n Miṣra, maɣar xzar, ad dd-yas!’" 10 “Ammu i iqqar Sidi inu, SIDI: ‘Necc ad ssbeddeɣ řɣaci inhewřen n Miṣra s ufus n Nabuxadraṣṣar, ajeǧid n Babil. 11 Netta d řgens nnes akides, imsaggʷaden qaɛ n řegnus ad dd-asen ḥima ad teḥḥan tammurt. Nitni ad ssuffɣen řesyuf nsen ḍidd i Miṣra uca ad ccuren tammurt s yinni ittwassnuqqben. 12 Necc ad ssiẓɣeɣ iɣezran uca ad zzenzeɣ tammurt i iɛeffanen u Necc ad areddǧeɣ tammurt d marra min dayes s ufus n ibarraniyyen. Necc, SIDI, wenni innan aya.’" 13 “Ammu i iqqar Sidi inu, SIDI: ‘Necc ad areddǧeɣ imeyḍa n l’aṣnam uca ad qḍiɣ x l’aṣnam zi Nuf. War ittɣimi ɛad uřa d ijj n řḥakem zi Miṣra. Necc ad ssidfeɣ řɛurret di temmurt n Miṣra. 14 Necc ad areddǧeɣ Fatrus u ad ssarɣeɣ Ṣuɛan u ad awyeɣ řeḥkamat inu di Nu. 15 Necc ad ssfarɣeɣ asɛar inu x Sin, lburj n Miṣra, ad qeḍɛeɣ řɣaci inhewřen n Nu. 16 Necc ad ssidfeɣ timessi ɣar Miṣra, Sin ad tefsi s řeḥriq, tammurt n Nu ad tᵉttwafeǧeq u Nuf ad tiři di řeḥṣaret kuř ass. 17 Iḥudriyyen zi Awan d Fibista ad wḍan s ssif u timɣarin ad uyurent di tmeḥbast. 18 Ass ad ittbarcen di Taḥfaḥis xmi ɣa yarẓeɣ Necc azayřu n Miṣra, u ad as ssbeddeɣ nnfaxet n jjehd nnes dinni. Ijj n useynu ad tt issdurri uca yessis ad uyurent di tmeḥbast. 19 Necc ad ssiwḍeɣ řeḥkamat x Misřa u nitni ad ssnen belli Necc d SIDI.’” Řḥukm x Firɛun d uzzuzar n řgens nnes 20 Deg useggʷas wiss ḥiṭac, deg uyur amezwaru, deg wass wiss sebɛa n uyur imsar belli yusa-dd ɣari wawař n SIDI, inna: 21 “‘A mmis n bnadem, Necc arẓiɣ aɣiř n firɛun, ajeǧid n Miṣra. Xzar, war t ijebbar uřa d ijjen maḥend ad ittwassgenfa, war t ttennḍen s bindat ařami zzaysent t ɣa ssjehden, ḥima ad iṭṭef ssif ɛawed!’ 22 S uya, ammu i iqqar Sidi inu, SIDI: ‘Xzar, Necc x firɛun, ajeǧid n Miṣřa, u Necc ad arẓeɣ iɣaǧen nnes, am uɣiř ijehden ɛad am wenni ittwarẓin. Necc ad arreɣ ssif nnes ad iwḍa zeg ufus nnes. 23 Necc ad zuzzareɣ Imiṣriyyen jar řegnus u ad ten bezzɛeɣ x temmura. 24 Necc ad ssjehdeɣ iɣaǧen n ujeǧid n Babil uca ad wceɣ ssif inu deg ufus nnes, maca iɣaǧen n firɛun ad ten arẓeɣ, ařami i ɣa isɣuy am isɣuyyu wenni issnuqben. 25 Wah Necc ad ssjehdeɣ iɣaǧen n ujeǧid n Babil, maca iɣaǧen n firɛun ad wḍan. Xenni ad ssnen belli Necc d SIDI, xmi ɣa ggeɣ ssif inu deg ufus n ujeǧid n Babil u netta ad t isswiẓẓeḍ x temmurt n Miṣra. 26 Necc ad zuzzareɣ Imiṣriyyen jar řegnus, ad ten bezzɛeɣ x temmura. Ammu i ɣa ssnen belli Necc d SIDI.’"