Ayub 22

1 Xenni yarra-dd Ilifaz, wenni dd-yusin zi Tayman, inna: 2 Ma izemmar bnadem ad infeɛ Arebbi? Wenni iggin s řeɛqeř ineffeɛ mɣir i yixef nnes. 3 Ma aqa-t d lfayda i Umzemmar x kuřci aqa cek tseggded, niɣ d řefḍeř mařa cek teggured deg ibriden nnec s řeṣfayet? 4 Ma iwti i cek zi ssibbet n tiggʷudi nnec zzayes, niɣ ad yadef akidek ɣar taddart n ccreɛ? 5 Ma war teǧi tuɛeffna nnec d tameqqrant, u řmuɛṣiyyat nnec ma war ǧint nhřa asbeddi? 6 Maɣar tḥewwsed ddiyyet zeg aytmac baṭeř, tekksed arruḍ i yinni s drus n werruḍ waha. 7 Wenni yuḥřen war d as tewcid ad isu, wenni iǧuzen tqeḍɛed as aɣrum. 8 Maca mařa din aryaz s uɣiř ijhed, xenni tammurt aqa-tt i wanita, ad dayes izdeɣ ca n weryaz n ccan. 9 Tijjař tsekked tent s ifassen xwan, iɣaǧen n uyujiř ttwařebzen. 10 X uya nnḍent ac řefxux, uca tewḍad-dd xak tiggʷudi. 11 Niɣ war tᵉttwiřid taǧest, d řḥemřet n waman nni cek yedřin? 12 Ma war iǧi Arebbi yuɛřa deg ujenna? Xzar itran nni iǧan sennej qaɛ, mammec ɛuǧen! 13 Maca teqqared: ‘Min issen Arebbi? Ma izemmar ad iḥkem nican zeg useynu ibbumbsen? 14 Iseynuten d ařeḥḥef i Netta ařami war ittwiři, u x řqubbet n ujenna iggur Netta.’ 15 Ma texsed ad teḍfareḍ amesruq n wecḥař uya, amesruq nni kkin yeryazen iccuren s řmuɛṣiyyet, 16 inni ittwakksen am war dd-yiwiḍ ɛad řmijař nsen, umi tfeyyeḍ řḥemřet dsas nsen, 17 inni innan i Arebbi: ‘Aggʷej xaneɣ!’ Min izemmar Umzemmar x kuřci ad yegg ɛad i nitni? 18 Iwa, waxxa Netta iccur tudrin nsen s řxar! Ccwar n iɛeffanen iggʷej xafi. 19 Ẓrin tt imseggaden uca farḥen, amezdag istehza zzaysen. 20 ‘Aɣrim nneɣ ittwakeḥḥeḍ u min zzaysen iqqimen tecca i-t tmessi.’ 21 Qqen ɣares, ad ɣarek tiři řhudnet, S uya ad ɣarek dd-yas min iṣebḥen. 22 Ksi xenni taɣuri zeg uqemmum nnes, egg awařen nnes deg wuř nnec. 23 Mařa tdewřed-dd ɣar Umzemmar x kuřci, ad tᵉttwassbedded. Siggʷej min war iseggden x tqiḍunin nnec. 24 Sars ureɣ iqquren deg ucař, ureɣ zi Ufir jar iẓra n tɣezratin. 25 xenni Amzemmar x kuřci ad yiři amecnaw ureɣ iqquren nnec, amecnaw idurar yuɛřan n nnuqart i cek! 26 Maɣar xenni ad tfarḥeḍ zeg Umzemmar x kuřci, ad tessgeɛɛded aɣembub nnec ɣar Arebbi. 27 Ad as tᵉttared s tẓaǧit yuǧɣen u Netta ad ac iseř, u cek ad tkemmřed lwuɛud nnec. 28 Mařa tekksed awař, xenni ad ac dd-teffeɣ tmesřact, u tafawt ad tareɣ deg ibriden nnec. 29 Mařa ssehwan nitni ijjen, ad tinid: ‘Sgeɛɛed azeǧif nnec!’, Netta ad issenjem wenni isshekkwan tiṭṭawin nnes. 30 Netta ad issenjem wenni war iǧin břa řɛib, minzi netta ad injem s tezdugi n ifassen nnec!