Ayub 28

1 S tidett, aqa din amcan mani tᵉttwaf nnuqart, uřa din amcan i wureɣ mani t ssizdigen. 2 Uzzař ttawyen t-i-dd zeg ucař u zeg weẓru ssfessyen nnḥas. 3 Igga bnadem qeṭṭu i taǧest, netta yarezzu di mkuř amcan mani ma, x weẓru i dd-itteffɣen zi tubbarcent d tiři n řmewt. 4 Yarzem ijj n wexjiḍ břa i ɣa yiři ḥed akides. Ttwattun zeg iḍaren n yinni sennej nsen, uyřen ttraḥen tasen-dd břa i ɣa yarra asen-dd ḥed řbař. 5 Itteffeɣ-dd weɣrum zi temmurt, am swadday nnes marra axmi s tmessi inneqřeb. 6 Iẓra nnes d amcan mani ttafen ṣaffir, dayes i teǧa uřa d taɛejjact n wureɣ. 7 Ajḍiḍ ittkeccaḍen war issin amesruq i ɣares iǧan, tiṭṭ n ujḍid amessɣuy amuqḍiɛ n tiṭṭawin ɛemmarṣ war t teḥḍi. 8 Iyraden imeẓyanen ineffxen war dayes uyuren, uřa d ayrad izehharen war t ittcuqi. 9 Maca bnadem isarreḥ afus nnes ɣar sseǧaḥ iqesḥen, issneqřab idurar kuřci. 10 Di řejruf iqqaz iɣezran, tiṭṭ nnes tᵉttwařa marra min iɣřan. 11 Iḥewweq i iɣezran ařami aman war qqimen tteffɣen-dd, min dayes inuffaren ittawyi t-i-dd ɣar tfawt. 12 Tiɣit maca, mani tᵉttwaf? U mani teǧa tzeddiɣt n řefhamet? 13 Bnadem war issin řqimet nnes, war tᵉttwif tiɣit di temmurt n yinni iddaren. 14 Aman ihewřen qqaren: ‘Dayneɣ war teǧi ca!’, řebḥar iqqar: ‘Ɣari war da teǧi ca!’ 15 War izemmar ad immewc wureɣ iqquren deg wemcan nnes, ssum nnes war zemmaren ad t weznen s nnuqart. 16 War zemmaren ad weznen ssum nnes s wureɣ iɣřan zi Ufir, s weẓru n uniks iɣřan d ṣaffir aziza. 17 War zemmaren ad mmquddan řqimet nnes ak-d wureɣ niɣ kristal, niɣ ad tt beddřen s ict n řqecɛet n wureɣ ittwaṣeffan. 18 War tteɛqiřen ɛad x tyaqutin d weẓru n ukristal, maɣar twafit n tiɣit tuɛɛřa x twafit n řmarjan. 19 Řeɛqiq azeggwaɣ zi Kuc war dayes yarwis, war tzemmar ad tᵉttwawzen tiɣit s wureɣ iṣfan iɣřan. 20 Manis dd-tusa xenni tiɣit u mani teǧa tzeddiɣt n řefhamet? 21 Aqa-tt tnuffar x tiṭṭawin n marra min iddaren, tᵉttwařeḥḥef x ijḍaḍ n ujenna. 22 Ahellek d řmewt qqaren: ‘S imezzuɣen nneɣ nesřa xas řexbar!’ 23 AREBBI ifehhem abrid nnes, Netta issen tazeddiɣt nnes, 24 maɣar ittwařa ař tineggura n temmurt, iẓarr marra min iǧan sadu ijenwan. 25 Umi igga i usemmiḍ jjehd nnes, umi iɛbar řeɛbar n waman, 26 umi igga i wenẓar qeṭṭu, ijj n webrid i wassam n wajjajen, 27 xenni iẓra i-tt, issargeb i-tt, uca issbedd i-tt deg wemcan nnes uca ibeqqec dayes, 28 uca inna i bnadem: ‘Xzar, tiggʷudi zi Sidi d tiɣit, abeɛɛed x min iǧan d aɛeffan, d řefhamet.’