Ayub 4

1 Xenni yarra-dd Ilifaz, wenni dd-yusin zi Tayman, inna: 2 Mařa ḥed yarzu maḥend ad kik issiweř, ma war tᵉttwaceḍned qaɛ s man aya? Maca man wen izemmaren ad issbedd řhard nnes? 3 Xzar, tessɣared aṭṭas n iwdan u ifassen yarxun tessmeḥḍed i-ten. 4 Wenni inqarḍen, tessbedded i-t s wawař nnec, u ifadden ifecřen tewcid asen jjehd ɛawed. 5 Maca řexxu imsar aya i cek, tᵉttwaceḍned qaɛ, řexxu iřqef i cek aya uca tarejfed. 6 Ma war teǧi tiggʷudi zi Arebbi d řaman nnec u řeṣfayet n ibriden nnec d řayas nnec? 7 Xemm maca! Man wen ittwahellken am iǧa d amezdag u mani ttwateḥḥan inni igguren nican? 8 Ẓriɣ aqa inni icarrzen ddeǧ d yinni izarrɛen řeɣben, ad t mjaren ɛawed. 9 Ad hellken zeg usuḍi n nnefs n Arebbi, ad fnan s usuḍi zeg wenzaren nnes. 10 Zzhir n weyrad d tmijja n yizem ameẓyan ad ttwassbedden u tiɣmas n wayraden imeẓyanen ad ttwarẓant. 11 Ad ihellek wayrad, minzi war yufi zzardet, tarwa n tayradt ad ttwabezzɛen. 12 Di tnuffra yiweḍ ayi-dd ijj n wawař, amezzuɣ inu iṭṭef zzayes řeḥmis, 13 am tuɣa ɣarrqeɣ deg ixarriṣen issiggʷiden zeg iweḥḥan n ǧiřet, řami dd-iwḍa yiḍeṣ yuǧɣen x iwdan. 14 Teřqef ayi tiggʷudi d tarjijit, marra iɣsan inu nnxeřɛen. 15 Ijj n buḥbeř iḥrara x uɣembub inu, issbedd acuwwaf di arrimet inu. 16 Netta ibedd, maca war ɛqiřeɣ x tefras nnes. Ijj n waddud ibedd zzat i tiṭṭawin inu. Xenni sřiɣ i tmijja tᵉttemtim, teqqar: 17 ‘Ma izemmar ijj n bnadem ad yiři isegged x Arebbi? Ma izemmar ijj n weryaz ad yiři iṣfa x Wenni t iggin?’ 18 Xzar, war ittciři uřa x imsexxaren nnes, igga řɛib ́ɛad ak-d lmalakat nnes umi weddarent. 19 Mahu inni izeddɣen di tudrin n ucař, inni ɣar teǧa tɛejjajt d dsas nsen. Aqa ad ttwařebzen amezwar x tcinda. 20 Zi tuffut n ṣṣbeḥ ař tameddit ad ttwafartken. Břa i iwca bnadem taynit i man aya, ad fnan i řebda. 21 Ma war dd-tᵉttwaqřeɛ ɣarsen tesɣunt n uqiḍun nsen n arrimet? Ad mmten, maca war iǧi di tiɣit.