Ayub 8

1 Xas uca yarra-dd Bildad, wenni dd-yusin zi Cuḥa, inna: 2 Mecḥař i ɣa tekked tessawařed ammu, ad iřin wawařen n uqemmum nnec amecnaw asemmiḍ n tharyaḍt. 3 Ma ad issfarɣ Arebbi tasɣart, niɣ ad issfarɣ Umzemmar x kuřci tasegda? 4 Mařa akides xḍan iḥenjiren nnec, aqa issekk i-ten deg ufus n uxeṭṭu nsen. 5 Mařa cek tarezzud Arebbi s jjehd, tᵉttzawged aḥinni ɣar Umzemmar x kuřci, 6 mařa teǧid d amezdag u tseggmed, xenni ad ac iwca taynit nican, ad iɛdeř tazeddiɣt nnec i cek. 7 Waxxa tamezwarut nnec ad tiři d tuqřič, taneggarut nnec ad tiři temɣar aṭṭas. 8 Wah, seqsa xenni ɣar jjiř iɛdun, ḥekkar di řejdud nsen. 9 Maɣar neccin n iḍennaḍ waha, war nessin walu, maɣar ussan nneɣ x temmurt am tiři. 10 Ma war cek sseřmiden nitni, ma war ɣarek ssiwiřen, ma war dd-ssuffuɣen awařen zeg wuř nsen? 11 Ma iɣemmi uɣanim n papirus břa ssebxet, ma imeqqar uɣanim ɣar tma n iɣzar břa aman? 12 Xmi ittnewwar, war imjar ɛad, ittaẓeɣ qbeř marra arbiɛ nneɣni. 13 Ammu i ǧan imesraq n marra inni ittun Arebbi, řayas n umnafeq ad ifna. 14 Min xef iɛemmed, ad ittwaqḍeɛ, min xef ittcař, ad dd-iban d axmař n qundɛa. 15 Ad isenned x taddart nnes, maca war tᵉttbeddi, ad dayes icebbar, maca war tᵉttɣimi tbedd. 16 Netta d aziza di tfawt n tfuct, řefruɛ nnes imeẓyanen ttbezzaɛen x weḥwic nnes. 17 Iẓewran nnes mmuden ixef nsen x ijj n uɛurric n yeẓra, ittarja ict n taddart n yeẓra i yixef nnes. 18 Mařa Netta iqeǧeɛ i-t zeg wemcan nnes, ad t inkar wemcan nni, ad yini: ‘Ɛemmarṣ war cek ẓriɣ!’ 19 Xzar, ta teǧa d řefraḥet n webrid n tudart nnes u inneɣni ad ɣemyen zeg ucař. 20 Xzar, Arebbi war ineṭṭar wenni ikemřen maca war ittic afus i iɛeffanen. 21 Ɛad ad iccur aqemmum nnec s tḍeḥḥact, u iyencicen nnec s usřiwřew. 22 Imecrah nnec ad yarḍen řefḍiḥet u aqiḍun n iɛeffanen war ittiři ɛad.