Yacuwa 12

1 Ina d ijeǧiden n temmurt, inni x ɣeřben ayt n Israil uca xenni ṭṭfen nitni tammurt nsen d řwart, aɣirin i L’Urdun zi manis i d tneqqar tfuct, zi teɣzart n Arnun ař idurar n Ḥirmun d marra Řewḍa di ccarq. 2 Ɣar umezwaru nsen, Siḥun, ajeǧid n Imuriyyen, wenni tuɣa izeddɣen di Ḥacbun, netta iḥkem x jjwayeh zi Ɛaruɛir i iǧan ɣar tma n teɣzart n Arnun, ař řwesṭ n teɣzart, u x wezyen n Jilɛad ař tiɣzart n Yabbuq, aqa-t d aymir n ayt n Ɛammun, 3 u x Řewḍa ař řebḥar n Kinnarut di ccarq u ař řebḥar n Řewḍa, Řebḥar Ameǧaḥ, di ccarq, abrid n Bayt-Yacimut, u zi ljanub ař swadday i teysarin n Fisja. 4 Xenni tammurt n Ɛuj, ajeǧid n Bacan, wenni iǧan zi min iqqimen zeg Irafawiyyen, jwaheř i tuɣa izeddɣen di Ɛactarut d Idraɛi. 5 Netta iḥkem x idurar n Ḥirmun, x Salxa u x marra Bacan ař weymir n Ijacuriyyen d Imaɛkiyyen u x wezyen n Jilɛad ař tammurt n Siḥun, ajeǧid n Ḥacbun. 6 Musa, amsexxar n SIDI, ak-d ayt n Israil, wtin ten u Musa, amsexxar n SIDI, tuɣa iwca tammurt nni d řwart i Irubiniyyen d Ijadiyyen u i wezyen n teqbič n Manassa. 7 Ina d ijeǧiden n temmurt inni x iɣřeb Yacuwa d ayt n Israil, ɣar ujemmaḍ n L’Urdun di lɣarb, zi Baɛl-Jad di teysart n Lubnan ař adrar aqeccar wenni issgeɛɛden ɣar Saɛir. Uca Yacuwa iwca i-tt d řwart i tqebbař n Israil ɛlaḥsab tirbiɛin nsen, 8 Di Temmurt n Idurar u di Temmurt Iwaṭan u di Řewḍa u di teysarin u di řexřa u di Temmurt n Ljanub: Iḥittiyyen, Imuriyyen, ayt n Kenɛan, Ifariziyyen, Iḥiwiyyen d Iyabusiyyen. 9 Ajeǧid n Ariḥa: d ijj. Ajeǧid n Ɛay i iǧan ɣar uɣezdis n Bayt-Il: d ijj. 10 Ajeǧid n Urcalim: d ijj. Ajeǧid n Ḥabrun: d ijj. 11 Ajeǧid n Yarmut: d ijj. Ajeǧid n Laxic: d ijj. 12 Ajeǧid n Ɛajlun: d ijj. Ajeǧid n Jazar: d ijj. 13 Ajeǧid n Dabir: d ijj. Ajeǧid n Jadar: d ijj. 14 Ajeǧid n Ḥurma: d ijj. Ajeǧid n Ɛarad: d ijj. 15 Ajeǧid n Libna: d ijj. Ajeǧid n Ɛadullam: d ijj. 16 Ajeǧid n Maqqida: d ijj. Ajeǧid n Bayt-Il: d ijj. 17 Ajeǧid n Taffuḥ: d ijj. Ajeǧid n Ḥafar: d ijj. 18 Ajeǧid n Afiq: d ijj. Ajeǧid n Laccarun: d ijj. 19 Ajeǧid n Madun: d ijj. Ajeǧid n Ḥaṣur: d ijj. 20 Ajeǧid n Cimrun-Mara’un: d ijj. Ajeǧid n Akcaf: d ijj. 21 Ajeǧid n Taɛnak: d ijj. Ajeǧid n Majiddu: d ijj. 22 Ajeǧid n Qadac: d ijj. Ajeǧid n Yuqnaɛam ɣar Karmal: d ijj. 23 Ajeǧid n Dur x tiwririn ɣar Dur: d ijj. Ajeǧid n Juyim di Jiljal: d ijj. 24 Ajeǧid n Tirṣa: d ijj. Marra ijeǧiden-a aqa aten di waḥit u-třatin.