Izřan s Igejduren 3

1 Alif. Necc d aryaz nni iẓrin řeɣben s weɛmud n uduqqez nnes n ufugem. 2 Alif. Netta indeh ayi uca ijja ayi ad uyureɣ di taǧest, war iǧi di tfawt. 3 Alif. S tidett, Netta yarra řebda afus nnes ḍidd inu, ass ikmeř. 4 Bit. Netta iḍeyyeɛ aysum inu d teřmect inu, yarẓa iɣsan inu. 5 Bit. Netta bna ict n řebniyyet xafi u iquwwar ayi s arrhaj d tamara. 6 Bit. Di ṭṭřam ijja ayi zeddɣeɣ, am imettan n waṭṭas zeg wami. 7 Gimel. Netta ibelleɛ ayi jar řeḥyuḍ, war zemmareɣ ad nejmeɣ. Issedqeř xafi ssnaseř inu n nnḥas. 8 Gimel. Ɛad meřmi ttřaɣiɣ u sɣuyyuɣ, Netta iqqim ibkem ɣar tẓaǧit inu. 9 Gimel. S tṣuḍar injaren ibelleɛ xafi abrid, issfarɣ imesraq inu. 10 Dalit. Tuɣa Netta i necc am ddub ittḥaman, am wayrad deg imucan innufaren. 11 Dalit. Netta yuẓẓeř xafi zeg webrid, imezzeq ayi, war d ayi ijji ca. 12 Dalit. Netta issemḥeḍ řqews nnes uca ijja ayi ad iřiɣ d awaḍ i fřitca nnes. 13 Hi. Fřitcat zeg weqrab nnes ijja i-tent ad adfent di tiẓẓař inu. 14 Hi. Dewřeɣ d taseḍhact i marra řgens inu, d izři nsen n uzawar ass imun. 15 Hi. Netta issjjiwen ayi s tarzugi, issessu ayi s cciḥ. 16 Waw. Tiɣmas inu ijja i-tent zeɛɛfent deg uqayas ařami arẓint, idřa ayi s yiɣɣed. 17 Waw. Cek tessiggʷejed řeɛmar inu x řehna, necc ttuɣ marra tcuni. 18 Waw. Necc nniɣ: “Jjehd inu iqḍa, uřa d asitem inu di SIDI." 19 Zayin. Ɛqeř x řeɣben inu d tmeḥbast inu, x cciḥ d arrhaj. 20 Zayin. Řeɛmar inu ittxarreṣ nican di man aya, aqa icḍen dayi. 21 Zayin. Aya xseɣ ad t arreɣ ɣar wuř, x uya ad qqimeɣ ssitimeɣ ɛad. 22 Xit. S tmegga n tmexsiwt n SIDI, aqa war nettwahellek ca, minzi arreḥmet nnes ɛemmarṣ war tᵉttbeddi. 23 Xit. Aqa-tt d jdid kuř ṣṣbeḥ, řaman nnec d ameqqran. 24 Xit. Tasɣart inu d SIDI, ammu i iqqar řeɛmar inu, x uya ttɣimiɣ ssitimeɣ dayes. 25 Tit. Iṣbeḥ SIDI i yinni dayes issitimen, i řeɛmar nni xas yarezzun. 26 Tit. Aqa mliḥ araji s usitem ɣar zzat, araji di řhudnet ɣar usenjem zi SIDI. 27 Tit. Mliḥ i weryaz ad yarbu azayřu di temẓi nnes. 28 Yud. Ejj i-t ad iqqim ḥafi, ad isseɣd, maɣar SIDI igga i-tt xas. 29 Yud. Ejj i-t ad igg aqemmum nnes di tɛejjajt, ad yini: “Ad taɣ iǧa řayas!" 30 Yud. Ejj i-t ad iwc ameggiz i wenni t iccaten, ejj i-t ad ittwajjiwen s useḥqar. 31 Kaf. Minzi Sidi inu war ineṭṭar ḥed i řebda, 32 Kaf. maca mařa Netta issecḍen ḥed, ad xas iḥinn ɛawed ɛlaḥsab řemɣaret n tmexsiwt nnes icuwwaren, 33 Kaf. maɣar Netta war iḥeṣṣar niɣ issecḍin tarwa n weryaz s wuř. 34 Lamid. Xmi ɣa řebzen sadu iḍaren marra imeḥbas n temmurt, 35 Lamid. xmi ɣa ḥarrfen tasɣart n weryaz zzat i wudem n Umɛuǧi x kuřci, 36 Lamid. xmi ɣa qeřben ddeɛwet n bnadem, ma zeɛma Sidi inu war ittwiři man aya? 37 Mim. Man wen i iqqaren ca n řḥajjet uca xenni temsar, mařa war tt yumur Sidi inu? 38 Mim. Ma war dd-ittis zeg uqemmum n Umɛuǧi x kuřci marra min war iḥřin uřa d marra min iṣebḥen? 39 Mim. Mammec ittcetca bnadem iddaren ɛad? Ejj weryaz ad icetca zi ssibbet n ddnub nnes. 40 Nun. Ejj aneɣ ad nexzar ibriden nneɣ, ad daysen narzu, ejj aneɣ ad dd-nedweř ɣar SIDI. 41 Nun. Ejj aneɣ ad nessgeɛɛed ak-d ifassen nneɣ uřa d wuřawen nneɣ, ɣar Arebbi deg ujenna. 42 Nun. Neccin nɛedda u nɣewweɣ, cek war teɣfared ca i uya. 43 Samix. Cek třeḥḥfed aneɣ s weɣḍab, teḍfareḍ aneɣ, tenɣid, war xaneɣ tḥiwřed ca. 44 Samix. Třeḥḥfed ixef nnec deg useynu, maḥend ad taf taẓaǧit war tzemmar ad teɛdu. 45 Samix. Cek tarrid-dd aneɣ d taxmuji d wefraḍ di řwesṭ n řegnus. 46 Pi. Marra řɛedyan nneɣ arzmen-dd ɣarneɣ aqemmum nsen. 47 Pi. Tiggʷuda d řfex dewřen d azyen zzayneɣ, axarreb d arẓiyyet. 48 Pi. Zi tiṭṭawin inu ttazzřent imeṭṭawen x tareẓẓit n yeǧis n řgens inu. 49 Ɛayin. Tiṭṭ inu teqqim tᵉttazzeř s imeṭṭawen, war tᵉttareyyiḥ, war tessbeddi, 50 Ɛayin. ař d i ɣa issijj SIDI zeg ujenna, uca ad ittwařa. 51 Ɛayin. Tiṭṭ inu tᵉttegg ayi řeḥriq di řeɛmar inu, zi ssibbet n marra yessis n tendint inu. 52 Tsadi. Areddfen ayi-dd řɛedyan inu břa qeṭṭu, am yijj n wejḍiḍ, maca břa ssibbet. 53 Tsadi. Nitni ssbekmen tudart inu deg wanu, uca nḍaren aẓru xafi. 54 Tsadi. Aman ḥemřen-dd x uzeǧif inu, nniɣ: “Aqa war qqimeɣ ǧiɣ!" 55 Quf. A SIDI, necc řaɣiɣ x Yisem nnec, zi řaǧaɣ n wanu. 56 Quf. Cek tesřid i tmijja inu, war tteqqen amezzuɣ nnec zzat i uzehhar inu, zzat i iɣuyyan inu! 57 Quf. Cek tusid-dd ɣari deg wass i d ac dd-řaɣiɣ, tennid: “War tteggʷed ca!" 58 Rix. Cek, a Sidi inu, tarefɛed ddɛawi x řeɛmar inu, Cek tfekked tudart inu. 59 Rix. A SIDI, teẓrid ddeǧ i dayi iggin, aɣ ayi tasɣart inu. 60 Rix. Cek teẓrid marra axřaf nsen, marra min nwan ḍidd inu. 61 Cin. Cek tesřid řḥegra nsen, a SIDI, marra min nwan ḍidd inu, 62 Cin. awařen nni dd-itteffɣen zi jar iyencicen n yinni xafi ikkaren, uřa d řemwayař nsen n uxarreṣ xafi ass imun. 63 Cin. Xzar ɣar uɣimi d ubeddi nsen, necc d izři nsen n ustehzi. 64 Taf. A SIDI, xeǧeṣ i-ten řmunet nsen i isdaheǧen, ɛlaḥsab timegga n ifassen nsen. 65 Taf. Sdaɣreř uřawen nsen, ejj nneɛřet nnec ad dd-xasen-tewḍa. 66 Taf. Ḍfar i-ten deg weɣḍab nnec, qḍa xasen zi sadu ujenna n SIDI.