Luka 4

1 Yasuɛ iɛqeb-dd zi L’Urdun am tuɣa iccur s Arruḥ Iqeddsen uca Arruḥ indeh i-t ɣar řexřa, 2 ḥima ad ittwajarreb zeg ibřis arebɛin n wussan. War icci walu deg wussan nni uca awarni řami ɛdun wussan nni, iṭṭef i-t řaẓ ɣar uneggar. 3 Inna as ibřis: “Mařa Cek d mmis n AREBBI, ini i weẓru-ya ad idweř d aɣrum." 4 Yarra-dd xas Yasuɛ, inna: “Aqa tura: ‘Bnadem war iddar s weɣrum waha, maca s kuř awař n AREBBI.’" 5 Xenni issgeɛɛed i-t cciṭan ɣar ijj n wedrar yuɛřan, isscen as marra tigeldiwin n ddunect deg ijjen wermac. 6 Inna as ibřis: “Ad ac wceɣ ṣṣulṭa-ya marra d uɛuǧi nnes, minzi i necc umi temmewc u tticeɣ tt i umi xseɣ. 7 Mařa tɛebded ayi, ad ɣarek yiři marra aya." 8 Yarra-dd xas Yasuɛ, inna as: “Aqa tura: ‘SIDI, AREBBI nnec, umi ɣa tsejded u i Netta weḥḥdes umi ɣa tsexxared.’" 9 Yiwyi t ɣar Urcalim uca issbedd i-t ɣar ṭṭarf n tzeqqa n Zzawect Tameqqrant, inna as: “Mařa Cek d Mmis n AREBBI, nḍar Ixef nnec ssa ɣar wadday, 10 minzi tura: ‘Ad yumur lmalakat nnes xak maḥend ad Cek ḥḍant, 11 aqa x ifassen nsent ad Cek ksint, ḥima aḍar nnec war ineggeḥ ca aẓru.’" 12 Yarra-dd xas Yasuɛ inna as: “Aqa ittwanna: ‘War ttjarrab SIDI, AREBBI nnec.’" 13 Umi ikemmeř ibřis marra ajarreb nnes, yuyur xas ca n řweqt. Anabi war iǧi d ameqbuř di tendint nnes 14 Iɛqeb-dd Yasuɛ s jjehd n Arruḥ ɣar Ljalil, uca iffeɣ řexbar xas di marra jjwayeh i d asen dd-innḍen. 15 Tuɣa isseřmad di temzidawin nsen, ssɛuǧan t iwdan marra. 16 Yusa-dd ɣar Nnaṣira mani tuɣa ittwarebba, uca yudef ɣar temzida n Wudayen deg wass n ssebt ɛlaḥsab tanamit nnes, uca ikkar, ḥima ad issɣar. 17 Immewc as adlis ittwannḍen n unabi Icaɛya, uca yarzem Yasuɛ adlis ittwanḍen, yufa amcan mani tura: 18 “Arruḥ n SIDI xafi, minzi Netta idhen ayi ḥima ad barrḥeɣ s Řexbar Aṣebḥan i imezřaḍ, issekk ayi-dd ḥima ad ssgenfiɣ inni umi yarẓ wuř, ḥima ad barrḥeɣ i imeḥbas s usarreḥ, i idarɣařen s řxeẓrat, u ḥima ad ssfewwjeɣ inni ittwarẓen s weɣfar n ddnub nsen, 19 ḥima ad barrḥeɣ s useggʷas n arḍa n SIDI." 20 Xenni yenneḍ adlis, iwca i-t i umsexxar, iqqim, am dayes nḍaren tiṭṭawin nsen marra inni tuɣa di temzida. 21 Xenni ibda iqqar asen: “Aqa ass-a ttwakemmřent Tira-ya Iqeddsen deg imezzuɣen nwem." 22 Tuɣa marra cehhden xas, tbehten s wawařen n arḍa i dd-iffɣen zeg uqemmum nnes, uca nnan: “Ma war iǧi wa d mmis n Yusuf?" 23 Inna asen Yasuɛ: “Nican ad ayi tinim lmatal-a: ‘A Aḍbib, sgenfa Yixef nnec! Mecḥař nesřa belli ijra di Kafarnaḥum, egg man aya ɛawed di tendint nnec.’" 24 Xenni inna: “S tidett, ad awem iniɣ, war iǧi unabi d ameqbuř di temmurt nnes. 25 S tidett ad awem iniɣ: Tuɣa din tijjař aṭṭas di taddart n Israil deg wussan n Iliya umi ittwabelleɛ ujenna třata n iseggʷusa d setta n iyuren, ařami tuɣa řaẓ imɣar di temmurt marra. 26 War dd-ittwassekk Iliya uřa ɣar icten zzaysent, mɣir ɣar Ṣarfat i iǧan di jjwayeh n Ṣaydun, ɣar ict n tajjač. 27 Tuɣa din di Israil di řweqt n unabi Ilicaɛ aṭṭas n iwdan i di iǧa řbarṣ, uca uřa d ijj zzaysen war ittwassizdig mɣir Naɛman zi Aram waha." 28 Umi sřin aya, ttwaccuren marra inni iǧan di temzida, s tefqeḥt. 29 Kkaren, ssuffɣen t barra i tendint, iwyen t ɣar tqiccet n wedrar i xef tuɣa tebna tendint nsen, ḥima ad t nḍaren zi jjarf yuɛřan. 30 Maca Netta icuq di řwesṭ nsen, iruḥ. Asuffuɣ n ijj n řaryaḥ amengus 31 Ihwa ɣar Kafarnaḥum, ict n tendint di Ljalil, tuɣa isseřmad i-ten deg wussan n ssebt. 32 Tbehten s useřmed nnes, minzi awař nnes tuɣa t s ṣṣulṭa. 33 Tuɣa di temzida ijj n weryaz dayes buḥbeř n ijj n cciṭan amengus. Netta isɣuyyu s jjehd aṭṭas, 34 inna: “Tewwej xafi! Min din jar aneɣ akidek, a Yasuɛ Nnaṣiri? Ma tusid-dd da ḥima ad aneɣ tᵉteḥḥid? Necc ssneɣ min teɛnid, aqa Cek d Amqeddas n AREBBI." 35 Iwebbex i-t Yasuɛ, inna as: “Sqar, ffeɣ-dd zzayes!” Inḍar i-t cciṭan di řwesṭ, iffeɣ zzayes, břa ma ad as issexsar ca. 36 Yarsa utebhet x marra, uca bdan ssawařen jar asen, nnan: “Mana awař-a? Aqa s ṣṣulṭa d jjehd ittamar řaryaḥ imengas, uca ffɣen!" 37 Iffeɣ-dd xas řexbar ɣar marra jjwayeh i d as dd-innḍen. Asgenfi n tḍekkwač n Buṭrus 38 Řami dd-iffeɣ Yasuɛ zi temzida, yudef ɣar taddart n Cimɛun. Tuɣa taḍekkʷač n Cimɛun dayes timessi aṭṭas u ttaren zzayes di ṭṭweɛ nnes. 39 Iɣnes xas uca iwebbex timessi uca tejja xas tmessi. Řexdenni tekkar, tedweř tᵉttsexxar xasen. 40 Řami teɣři tfuct, iwyen-dd ɣares marra inni tuɣa ɣar iǧa imehřac i di iǧa ɛřam kuř řehřacat. Uca Netta issars afus nnes x kuř ijjen zzaysen, issgenfa i-ten. 41 Tuɣa ccwaṭen tteffɣen-dd ɛawed zeg waṭṭas idsen, tuɣa sɣuyyun, qqaren: “Cek d Lmasiḥ Mmis n AREBBI!” Maca iwebbex i-ten, war ten ijji ad ssiwřen, minzi ssnen belli Netta d Lmasiḥ. Abarreḥ n Yasuɛ di temzidawin n Ljalil 42 Řami tuɣa d aziř, iffeɣ-dd, iruḥ ɣar ijj n wemcan ixřan, tuɣa řɣaci yarezzu xas, usin-dd ɣares uca arezzun ad t mennɛen, ḥima war xasen ittriḥ. 43 Inna asen Yasuɛ: “Aqa ittxeṣṣa ayi ad barrḥeɣ ɛawed i tneddam nneɣni s Tgeldit n AREBBI, minzi i man aya umi dd-ttwassekkeɣ." 44 Uca ittbarreḥ di temzidawin n Ljalil.