Matta 4

1 Řexdenni ittwandeh Yasuɛ ɣar řexřa zi Arruḥ Iqeddsen, ḥima ad ittwajarreb zeg ibřis. 2 Awarni řami tuɣa iẓumm arebɛin n wussan d arebɛin n ǧyaři, yusa as-dd jjuɛ ɣar uneggar. 3 Yusa-dd ɣares umjarrab, inna as: “Mařa Cek d Mmis n AREBBI, ini i iẓra-ya ad dewřen d aɣrum!" 4 Yarra-dd xas inna: “Aqa tura: ‘Bnadem war iddar s weɣrum waha, maca zi kuř awař i dd-ittekken zeg uqemmum n AREBBI.’" 5 Řexdenni yiwyi t ibřis ɣar tendint iqeddsen uca issbedd i-t ɣar ṭṭarf n tzeqqa n Zzawect Tameqqrant, 6 inna as: “Mařa Cek d Mmis n AREBBI, iwa, nḍar Ixef nnec ɣar wadday, minzi aqa tura: ‘Ad yumur lmalakat nnes xak, ad Cek ksint x ifassen nsent, ḥima aḍar nnec war ineggeḥ ca aẓru.’" 7 Yasuɛ inna as: “Tura ɛawed: ‘War ttjarrab SIDI, AREBBI nnec!’" 8 Yiwyi t ɛawed ibřis ɣar wedrar yuɛřan aṭṭas, isscen as marra tigeldiwin n ddunect d uɛuǧi nsent, 9 inna as: “Ad ac wceɣ marra man aya, mařa tewḍid ayi ɣar iḍaren, ad ayi tsejded!" 10 Inna as Yasuɛ: “Ruḥ, a cciṭan, minzi tura: ‘SIDI, AREBBI nnec, umi ɣa tsejded u i Netta weḥḥdes umi ɣa tsexxared.’" 11 Řexdenni ijja i-t ibřis, u xzar, lmalakat usint-i-dd, tuɣa sexxarent as. Amezwaru n tsexxart n Yasuɛ di Ljalil 12 Řami isřa Yasuɛ belli Yuḥanna tuɣa ittwasellem, iruḥ ɣar Ljalil. 13 Ijja Nnaṣira uca yusa-dd ɣar Kafarnaḥum, tenni ɣar ṭṭarf n řebḥar, di temmurt n Zibulun d Naftali uca izdeɣ din 14 ḥima ad ittwakemmeř min ittwannan zeg unabi Icaɛya umi inna: 15 “Tammurt n Zibulun d temmurt n Naftali deg Webrid n Řebḥar, ɣar ujemmaḍ n L’Urdun, Ljalil n řegnus. 16 Řgens i iqqimen di taǧest iẓra Tafawt tameqqrant, u x yinni izedɣen di temmurt d tiři n řmewt, aqa tenqar-dd xasen Tfawt." 17 Zi ssin ibda Yasuɛ ittbarreḥ, inna: “Tubem minzi Tageldit n ijenwan aqa tudes-dd." 18 Řami tuɣa Netta iggur x tma n řebḥar n Ljalil, iẓra tnayen n wawmaten, Cimɛun umi qqaren Buṭrus, isem wanita ixs ad yini ‘D Aẓru’, d Andrawus umas, tuɣa neṭṭaren traccawin di řebḥar minzi nitni d ineymaren n iseřman. 19 Inna asen Yasuɛ: “Ḍfarem ayi-dd, ad kenniw arreɣ d ineymaren n iwdan." 20 Ssarsen deɣya tiracciwin nsen, ḍfaren t. 21 Řami yeɛdu ssenni, iẓra tnayen n wawmaten nneɣni, Yaɛqub mmis n Zabdi d umas Yuḥanna, tuɣa aten ak-d babatsen Zabdi deg uɣarrabu, ɛeddřen tiracciwin nsen uca Netta iřaɣa xasen. 22 Deɣya semḥen deg uɣarrabu u di babatsen, ḍfaren t. 23 Tuɣa Yasuɛ ittenneḍ di temmurt n Ljalil marra, isseřmad di temzidawin nsen, ittbarreḥ s Řexbar Aṣebḥan n Tgeldit uca issgenfa kuř řehřac d kuř řeɛyubat i iǧan di řgens. 24 Iffeɣ řexbar xas di Suriya marra, uca iwyen-dd ɣares marra imehřac inni ɣar iǧa ɛřam kuř řehřac řa d yinni daysen řeḥriq řa d inni daysen ccwaṭen řa d yinni ittbarkikkiḍen uřa d ineɛḍaben, uca issgenfa i-ten. 25 Ḍfaren t-i-dd aṭṭas n řɣaci zi Ljalil, zi Dikapulis, zi Urcalim, zi Yahudiyya u zeg ujemmaḍ n L’Urdun.