Awařen Iweznen 6

1 Mmi inu, mařa tdewřed d amarhun i jjar nnec, tewcid ticti nnec n ufus i yijj n ubarrani, 2 mařa tdewřed teqqned zeg wawařen n uqemmum nnec, tᵉttwaḥebbsed zeg wawařen n uqemmum nnec, 3 xenni egg ta, a mmi, u fekk ixef nnec, maɣar tdewřed ɣar ufus n jjar nnec: uyur, bendeq xas u zeyyar x wenni cek yudsen. 4 War ttic ca iḍeṣ i tiṭṭawin nnec, uřa d anudem i wabřiwen nnec. 5 Fekk ixef nnec zeg ufus nnes am tɣeyḍet n weɣzar, am yijj n wejḍiḍ zeg ufus n unegmar. 6 Uyur ɣar tkeḍfet, cek, a ameɛguz, xzar mammec tuyur nettat u dweř d amiɣis. 7 Waxxa nettat war ɣares bu umgewwed, niɣ aweqqaf niɣ řḥakem, 8 ɛad tessewjad aɣrum nnes deg unebdu, teyru macca nnes di řweqt n tmeyra. 9 Ař meřmi ɣa teqqimed tezzřed, cek, a ameɛguz? Meřmi ɣa tekkared zeg iḍeṣ nnec? 10 Arni cwayt n yiḍeṣ, arni cwayt n uwarrec, arni cwayt n ubuzzeř s ifassen imunen, 11 aqa da ad xak dd-iwḍa zzeřḍ am yijj n uxewwan, řeɣben nnec am yijj n weryaz i ɣar iǧa řesnaḥ. 12 Bnadem i war isekkwin, aryaz n řɣecc, iggur s ijj n uqemmum iccuren s min iɛewjen. 13 Iɣemmez s tiṭṭawin nnes, issawař s iḍaren nnes, ittceyyar s iḍewḍan nnes. 14 Uř nnes iccur s řexdaɛat, inekkwa řebda řɣar, ittsebbab imenɣiyyen. 15 X uya deɣya ad dd-yas uḍeyyeɛ nnes, deg ict n tecti ad ittwarẓ am war din ittiři ugenfu. 16 Setta n tmesřayin-a icarreh i-tent SIDI, wah sebɛa aqa atent d nnɛi i řeɛmar nnes: 17 tiṭṭawin n nnfaxet, ijj n yiřes issxarriqen, uřa d ifassen issazzařen idammen imezdagen, 18 uř inekkwan timeɛmač iɣeccen, iḍaren nni ittqeǧiqen maḥend ad azzřen ɣar min iǧan d aɛeffan, 19 acehhad issxarriqen nni dd-ideǧqen i ixarriqen, uřa wenni ittsebbaben imenɣiyyen jar tawmat. 20 A mmi, ḥḍa tawṣeyyet n babac, u war menḍar taɣuri n yemmac. 21 Qqen i-tent řebda x wuř nnec, cedd i-tent ɣar yiri nnec. 22 Mařa teggured, aya ad cek igewwed, mařa tezzred, aya ad cek iḥḍa, mařa tfaqed aqa man aya ad kidek issiweř. 23 Minzi tawṣeyyet d řefnar d tɣuri d tfawt, iwebbax n ttarbiyyet aqa aten d abrid n tudart 24 nni cek i ɣa iḥḍan zi temɣart taɛeffant, zi řehrud izewwqen n yiřes n temɣart zi barra. 25 War ɛecceq ca aẓri nnes deg wuř nnec, ḥḍa war cek teḥṣir s wabřiwen nnes, 26 minzi zi ssibbet n ict n temɣart n farq-ccɣeř, bnadem ad iksi mɣir ict n txebbazt n weɣrum, wah, tamɣart n ijj n weryaz nneɣni aqa tarezzu řeɛmar iɣřan. 27 Ma izemmar ḥed ad yarbu timessi deg weḥsin n warruḍ nnes, břa ma ad yarɣ warruḍ nnes? 28 Ma izemmar ḥed ad yuyur x řefḥem itteḥduduqen, břa ma ad cemḍen iḍaren nnes? 29 Ammu uřa d wenni i ɣa yadfen ɣar temɣart n jjar nnes, wah kuř ijjen wenni tt i ɣa ihadan, war ittwiḥsib d amezdag. 30 Aceffar war t ssḥeqqaren mařa yucar, ḥima ad issyiwen řeɛmar nnes mařa dayes řaẓ. 31 Maca mařa ittwaf, ammu xas i ɣa ixeǧeṣ sebɛa n tseqqar. Ittxeṣṣa as ad iwc marra min ɣares di taddart. 32 Maca wenni itteggen zzina ak-d ict n temɣart, war ɣares bu wuř imten. Wenni itteggen aya, ittareddeǧ řeɛmar nnes. 33 Druct d řefḍiḥet ad ten yaf, řeḥya nnes war imeḥḥi ca. 34 Maɣar tusmi tᵉttawi-dd asɛar n weryaz, netta war ittessen aḥinni deg wass n wentaqem. 35 War iḥesseb ddeyyet i weṣřeḥ, war tt iqebbeř, ad yugi, waxxa tessemɣarid di terzeft ɛad s waṭṭas.