Izehhiden 14

1 I umeqqran n imeɣnajen. N Dawud. Abuhaři inna deg wuř nnes: “War din bu AREBBI!” Nitni ttareddǧen, tteggen timesřayin iḍexsen, war din uřa d ijj ittegg min icnan. 2 SIDI ixezzar-dd zeg ujenna ɣar tarwa n bnadem, ḥima ad iẓar, ma din ḥed dayes řefhamet, ijj wenni yarezzun AREBBI. 3 Marra ffɣen zeg webrid, aqa aten jmiɛ dewřen d iɛeffanen, war din uřa d ijj ittegg řxar, uřa d ijj. 4 Marra inni itteggen řmuɛṣiyyet ma war ɣarsen bu tussna, inni ittᵉtten řgens inu axmi ttᵉtten aɣrum? Nitni war ttřaɣan x SIDI. 5 Aqa tewḍa-dd xasen din iggʷudi temɣar, maɣar AREBBI aqa-t ak-d jjiř n imseggaden. 6 Kenniw tnefḍem array n řmusakin, maca SIDI d amcan nnes n tarewřa. 7 Man wen zi Ṣihyun i ɣa yiwyen asenjem n Israil! Xmi dd ɣa yarr SIDI imeḥbas n řgens nnes, ad yarceq Yaɛqub, ad ifarḥ Israil.