Izehhiden 26

1 Azehhed n Dawud. Aɣ ayi tasɣart inu, a SIDI, maɣar necc ggureɣ di řeṣfayet inu. Necc ttecřeɣ x SIDI, war ttefriɣeɣ ca. 2 Qeǧeb ayi, a SIDI, jarreb ayi, seṣfa tiẓẓař inu d wuř inu. 3 Minzi tamexsiwt nnec icewwaren aqa-tt zzat i tiṭṭawin inu, necc ggureɣ di tidett nnec. 4 Necc war ttɣimiɣ ak-d iryazen war isekkwin, war ttmuneɣ ak-d yinni icemmten. 5 Necc carrheɣ agraw n tarwa n řehram, war ttɣimiɣ ak-d iɛeffanen. 6 Necc ssirideɣ ifassen inu am war dayi řɛib, ttennḍeɣ i uɛalṭar nnec, řmedbeḥ nnec n wecmaḍ, a SIDI, 7 maḥend ad ssgeɛɛdeɣ tmijja teccur s uqadi, maḥend ad barrḥeɣ s marra lmuɛjizat nnec. 8 A SIDI, necc ttexseɣ Tazeddiɣt n Taddart nnec, uřa d amcan n Tzeddiɣt n uɛuǧi nnec. 9 War smuna řeɛmar inu ak-d imednab, uřa d tudart inu ɣar iryazen i issazzařen idammen. 10 inni ɣar iǧa ifassen nsen ccuren s tuɛeffna, afus nsen afusi iccur s řɣecc. 11 Necc ggureɣ di řeṣfayet inu, fdi ayi u ḥinn xafi. 12 Aḍar inu ibedd x temmurt iwaṭan. Necc ad barkeɣ SIDI di tmesmunin.