Izehhiden 30

1 Azehhed. Izři i udeccen n taddart. N Dawud. 2 Necc ad Cek ssuɛřiɣ, a SIDI, maɣar Cek tessgeɛɛded ayi, war tejjid ca řɛedyan inu ad farḥen x weɛrur inu. 3 A SIDI, AREBBI inu, necc řaɣiɣ ac, uca Cek tessgenfid ayi. 4 A SIDI, cek tessuɛřid řeɛmar inu zi řaxart, tarrid ayi-dd ɣar tudart jar yinni dd-ihekkwan deg weḥfur. 5 Zehhdem i SIDI, a kenniw, imtiqqan nnes, qadam, ɛeqřem x tqeddast nnes. 6 Maɣar aɣḍab nnes ittekk drus waha, maca arḍa nnes ittɣima marra tudart. Di tmeddit aqa din imeṭṭawen ař ǧiřet, maca ɣar tuffut aqa din asřiwřew. 7 Deg ufřaḥ inu nniɣ necc: “War ttfariɣeɣ ca i řebda!" 8 A SIDI, di řxaḍar nnec tessmetned adrar inu s umetten ijehden, maca umi třeḥḥfed udem nnec, dewřeɣ tteggʷedeɣ. 9 Necc řaɣiɣ ac-dd, a SIDI, ttareɣ arḍa zi Sidi inu. 10 Man řefḍeř n idammen inu, n uhekkwu inu ɣar turṣuḍi deg wenḍeř? Ma ad Cek tqada tɛejjajt? Ma ad tbarreḥ s řaman nnec? 11 Seř-dd ɣari, a SIDI, ḥinn xafi, a SIDI, iři d amɛawen inu. 12 Cek aqa tarrid tɣuyyit inu n wecḍan d ccḍiḥ s nnubtat, tessarxud taxancet inu n wecḍan, tessbeysed ayi s řefraḥet, 13 ḥima aɛuǧi inu ad ac izehhed u war ittsusum. A SIDI, AREBBI inu, necc ad Cek qadiɣ i řebda.