Izehhiden 36

1 I umeqqran n imeɣnajen. Zeg umsexxar n SIDI. N Dawud. 2 Issawař uxeṭṭu n uɛeffan daxeř deg wuř inu: “War ɣares tiggʷudi n AREBBI zzat i tiṭṭawin nnes." 3 Minzi axeṭṭu-ya issḥinnab i-t di tiṭṭawin nnes, aqa yufa řmuɛṣiyyet nnes tarra i-t-i-dd ɣar wecrah. 4 Awařen n uqemmum nnes aqa aten d řɣecc d wecmat, netta issbedd ḥima ad yarzu řefhamet ḥima ad igg řxar. 5 Ittxemmem di řɣecc di qama nnes, iggur ad ibedd deg ijj n webrid war iṣebḥen. Řɣar war t ittmenḍir. 6 A SIDI, tamexsiwt nnec icewwaren tᵉttakkwaḍ ař daxeř n ijenwan, řaman nnec ař iseynuten. 7 Tasegda nnec tegga am yidurar n Arebbi, řeḥkamat nnec am waman ihewřen. SIDI issenjam bnadem d řmař. 8 Mecḥař tiɣřa tmexsiwt nnec icewwaren, a AREBBI! S uyenni arekkwařen ɣarek tarwa n bnadem, ɣar tiři n wafriwen nnec. 9 Ttwasjawnen s ufeyyeḍ s tadunt n Taddart nnec, iɣzar s nnɛami nnec tewced asen maḥend ad zzayes swen. 10 Maɣar ɣarek i iǧa řɛunṣar n tudart, di tfawt nnec aqa nettwařa tafawt. 11 Swiẓẓeḍ tamexsiwt nnec icewwaren x yinni i Cek issnen, tasegda nnec x yinni i ɣar iǧa wuř iseggmen. 12 War ttejji ad xafi dd-yas uḍar n ayt n bu-nnfaxet, war ttejji afus n iɛeffanen ad ayi dd-yarr ad tellɛeɣ mani ma. 13 Aqa din i wḍan, inni itteggen řmuɛṣiyyet, ttwaɣeḍřen ɣar temmurt, war zemmaren ɛad ad kkaren ɛawed.