Izehhiden 4

1 I umeqqran n imeɣnajen. Ak-d uzenzun x ifiřan. Azehhed n Dawud. 2 Arr-dd xafi xmi dd ttřaɣiɣ, a AREBBI n tsegda inu! Di řeḥṣaret aqa Cek teggid ayi ttasiɛ. Ḥinn xafi u seř-dd ɣar tẓaǧit inu! 3 Tarwa n yijj n weryaz, ař meřmi i ɣa yiři uɛuǧi inu d řɛar? Ař meřmi ɣa texsem řbaṭeř, ad tarzum x ixarriqen? Silah. 4 Snem xenni, aqa SIDI iḥuzz ijj n umeddukkeř amtiqqi i yixef nnes. SIDI ad ayi iseř xmi d as i ɣa řaɣiɣ. 5 Arjijem, maca war xeṭṭim. Siwřem deg wuř nwem di řectu nwem uca susmem. Silah. 6 Qeddmem tiɣarṣa n tsegda, ttecřem x SIDI. 7 Aṭṭas qqaren: “Wi d aneɣ i ɣa issecnen řxar?” Ejj ad xaneɣ dd-tenqar tfawt n wudem nnec, a SIDI! 8 Cek tessidfed řefraḥet ɣar wuř inu, ktar x řefraḥet i din iǧan di řweqt umi tuɣa feyyḍen imendi nsen d binu nsen n jdid. 9 Di řehna ad zzřeɣ u ad ṭṭṣeɣ, minzi mɣir Cek, a SIDI, ad ayi tesszedɣed di řaman.