Izehhiden 51

1 I umeqqran n imeɣnajen. Azehhed n Dawud. 2 Ařami i ɣares dd-yusa unabi Natan, awarni řami yudef Dawud x Bat-Cabaɛ. 3 Ḥinn xafi, a AREBBI, ɛlaḥsab tamexsiwt nnec icewwaren. Mseḥ ixeṭṭan inu ɛlaḥsab afeyyeḍ n arreḥmet nnec. 4 Ssird řmuɛṣiyyet inu zzayi marra, sizdeg ayi zi ddenb inu, 5 maɣar necc ssneɣ ixeṭṭan inu, ddenb inu řebda ibedd ayi-dd ɣar tiṭṭawin. 6 Akidek, akidek waha i xḍiɣ, ggiɣ min iǧan d aɛeffan jar tiṭṭawin nnec, ařami Cek tseggded deg wawařen nnec, teṣfid di řeḥkamat nnec. 7 Xzar, ttwaxeřqeɣ-dd di ddnub, di ddnub teksi ayi yemma. 8 Xzar, Cek tᵉttexsed tidett di daxeř, di tnuffra tesscaned ayi tiɣit. 9 Ksi xafi ddnub s tɛelǧet, xenni ad dewřeɣ qqureɣ, sird ayi, xenni ad dewřeɣ d acemřař x wedfeř. 10 Arr ayi ad sřeɣ arcuq d řefraḥet, ḥima iɣsan nni třebzed Cek, ad ceḍhen s řefraḥet. 11 Snuffar udem nnec zzat i ddnub inu, mseḥ i marra řmuɛṣiyyet inu. 12 Xřeq-dd dayi uř izdig, a AREBBI, jedded di daxeř inu ijj n arruḥ imetnen. 13 War d ayi neṭṭar zeg wudem nnec, war zzayi ttekkes Arruḥ Iqeddsen nnec. 14 Ewc ayi ɛawed řefraḥet n usenjem nnec, uřa d ijj n buḥbeř amseɛɛaf i kidi ɣa ibedden. 15 Xenni ad ssɣareɣ ibriden nnec i yinni xak iɛeddan, ḥima ad ɣarek dd-ɛeqben imednab. 16 Fekk ayi zeg umarwas n idammen, a AREBBI, AREBBI n usenjem inu, xenni ad isřewřiw iřes inu x tsegda nnec. 17 Arzem ayi iyencicen inu, a Sidi inu, xenni ad ibarreḥ uqemmum inu s ccan nnec, 18 maɣar war d ak tecqi tɣarṣt, iři wciɣ ac tt, taɣarṣt n wecmaḍ war d ac dd-tᵉttis x řxaḍar. 19 Tiɣarṣa n AREBBI aqa atent d ijj n buḥbeř yareẓ, ijj n wuř iddez war t tesseḥqarid, a AREBBI! 20 Egg řxar i Ṣihyun ɛlaḥsab arḍa nnec, bna řeḥyuḍ n Urcalim! 21 Xenni ad tarḍid di tɣarṣa n řmuɛṣiyyet, di tɣarṣt n wecmaḍ ikemmřen. Xenni ad qeddmen ifunasen imeẓyanen x uɛalṭar nnec,