Izehhiden 62

1 I umeqqran n imeɣnajen. Sadu ufus n Yadutun. N Dawud. 2 Wah, řeɛmar inu yaressa, ittraja AREBBI waha, aqa zzayes dd-ittas usenjem inu. 3 Wah, Netta d taṣḍart inu d usenjem inu, lburj inu yuɛřan, war ttᵉfriɣeɣ aṭṭas. 4 Mecḥař ɛad i ɣa tekkem thejjmem x weryaz? Mecḥař ɛad aqa třehham maḥend ad t teɣḍřem, am ijj n řḥiḍ iweṭṭa, am yijj n weɣbar ittwaɣḍeř? 5 Wah, nitni ttemcawaren waha ḥima ad t-i-dd-ɣeḍřen zeg wemcan nnes yuɛřan. Nitni areṭṭan s ixarriqen. Ttbarken s uqemmum nsen, maca deg wuř nsen neɛɛřen. Silah. 6 Wah, raja i AREBBI, a řeɛmar inu, minzi zzayes řayas inu. 7 Wah, Netta d taṣḍart inu d usenjem inu, lburj inu yuɛřan, war ttefriɣeɣ ca. 8 Asenjem inu d uɛuǧi inu aqa aten di AREBBI, Netta d Taṣḍart inu ijehden, amcan inu n tarewřa aqa-t di AREBBI. 9 Tiqqem řebda dayes, a řgens! Zeǧɛem uř nwem zzat i wudem nnes. AREBBI d amcan nneɣ n tarewřa. Silah. 10 Wah, tarwa n Adam aqa aten d řeɛwin, tarwa n weryaz aqa daysen axarriq. Ad geɛɛden di řmizan s tnayen n ṭṭawyat, aqa aten jmiɛ fsusen x řeɛwin. 11 War ttecřem x ddeǧ, war ttejjim ad kenniw jebbden zeg webrid s ukkarḍa. Mařa agřa imeqqar, war xas ssrusam uř nwem. 12 AREBBI issiweř ict n twařa, sřiɣ tnayen n twařawin, aqa: “Jjehd zi AREBBI”. 13 Tamexsiwt icewwaren i Cek, a Sidi inu! Minzi Cek ad txeǧṣed kuř ijj ɛlaḥsab min igga.