Izehhiden 64

1 I umeqqran n imeɣnajen. Azehhed n Dawud. 2 Seř, a AREBBI, i tmijja inu xmi ttcetciɣ, ḥḍa tudart inu zeg usiggʷed n řeɛdu. 3 Sdurri ayi zi tmeɛmuč n iɛeffanen, zi řɣaci n yinni itteggen řmuɛṣiyyet, 4 inni isseqḍaɛen iřes nsen am yijj n ssif, qarrṣen awař yarezgen am fřitca n řqews nsen, 5 ḥima ad wten s řqews x wenni ikemmřen zeg imucan inuffaren. Deɣya ad xas neyycen, iwa war din minzi i ɣa ggʷeden. 6 Nitni ḥezzmen maḥend ad ggen min war iḥřin, ssawařen s tnuffra maḥend ad nedyen tixcifin. Qqaren: “Wi ten i ɣa iẓaren!" 7 Nitni ttxarrṣen di marra min iǧan d aɛeffan: “Aqa newjed, ict n tmeɛmuč n teḥraymect!” Aqa min iǧan daxeř deg weryaz u deg wuř nnes aqa yuǧeɣ. 8 AREBBI ad ten iwwet s fřitca n řqews, deɣya ad banen jjrayeḥ nsen. 9 Iřes nsen ad ten yarr ad nqarḍen deg ixef nsen, kuř ijj, zeg inni ten ittwařan, ad yarweř. 10 Xenni ad ggʷeden marra iwdan, ad barrḥen timegga n AREBBI uca ad xzaren mliḥ di min dd ittegg. 11 Amsegged ad ifarḥ di SIDI u ad ɣares dd-yarweř, marra inni umi isegged wuř ad farḥen.