Izehhiden 76

1 I umeqqran n imeɣnajen. Ak-d uzenzun x ifiřan. Azehhed n Asaf, izři. 2 AREBBI ittwassen di Yahuda, Isem nnes d ameqqran di Israil. 3 Aɛucci nnes aqa-t di Calim, Tazeddiɣt nnes di Ṣihyun. 4 Dinni yarẓa fřitcat yareqqen n řqews, taseddart n useřqi d ssif uřa d amenɣi. Silah. 5 Tessaggʷaded u tjehded i teǧid x idurar nni immeẓren di tkeccaḍt. 6 Inni izeɛɛamen ttwakeccḍen. Nitni nnudmen, ṭṭṣen, uřa d ijj zeg iryazen imeḥḍen war izemmar ad immɛařa. 7 S uweddeb nnec, a AREBBI n Yaɛqub, iɣarq ukarru d uyis deg yiḍeṣ. 8 Cek, wah, Cek tessaggʷaded, wi izemmaren ad iqqim ibedd zzat i wudem nnec, xmi dd ɣa ikkar weɣḍab nnec? 9 Zeg ujenna teggid ad ittwaseř řḥukm. Teṭṭef teggʷudi tammurt uca tesseɣd, 10 umi ikkar AREBBI maḥend ad icarreɛ, ḥima ad ifekk marra imhinen n temmurt. Silah. 11 Maɣar afugem n iwdan ad yawi aqadi i Cek, min iqqimen ɛad n wesɛar ad t tmenɛed. 12 Wcem lwuɛud u ggem zzaysen zzat i SIDI, AREBBI nwem. Ejj marra inni d as dd-innḍen ad awyen ṣṣdaqi i Wenni ittxeṣṣa ad zzayes ggʷeden, 13 wenni imennɛen i řḥukkam buḥbeřat nsen, wenni zzayes tteggʷden ijeǧiden n temmurt.