Izehhiden 79

1 Azehhed n Asaf. A AREBBI, řegnus udfen ɣar řwart nnec. Nitni ssxemjen Zzawect nnec Tameqqrant iqeddsen, arrin Urcalim d řxirbat. 2 Řxecbat n imsexxaren nnec wcin tent d macca i ijḍaḍ n ujenna, aysum n imtiqqan nnec i řewḥuc n temmurt. 3 Idammen nsen zeǧɛen ten am waman ɣar marra iɣezdisen n Urcalim, uřa d ijj war ten inḍiř. 4 Nedweř d řefdiḥet i jjiran nneɣ, d ustehzi d useḥqar i marra inni d aneɣ dd-innḍen. 5 Ar meřmi, a SIDI? Ma xenni ad teqqimed tseɛɛared i řebda? Ma ad tareɣ tusmi nnec iqeddsen am tmessi i řebda? 6 Farreɣ asɛar nnec x řegnus i war Cek issinen, x tigeldiwin nni war ittřiɣin x Yisem nnec. 7 Maɣar nitni ccin Yaɛqub, areddǧen Tazeddiɣt nnes. 8 War xaneɣ ɛeqqeř ɛlaḥsab řmuɛṣiyyet nneɣ n zic. Qeǧeq, ejj arreḥmet nnec ad kidneɣ temsagar, maɣar neḍɛef aṭṭas. 9 Ewc aneɣ afus nnec, a AREBBI, di ṭṭweɛ n uɛuǧi n Yisem nnec, fekk aneɣ u seṣřeḥ x ddnub nneɣ di ṭṭweɛ n Yisem nnec. 10 Mayemmi ɣa inin řegnus: “Mani iǧa AREBBI nsen?” Ejj antaqem n idammen ittwassizřen n řgens nnec ad idweř ittwassen jar řegnus jar tiṭṭawin nneɣ. 11 Ejj azehhar n umeḥbus ad dd-yas zzat i wudem nnec, ḥḍa iḥenjiren n řmewt ɛlaḥsab řemɣaret n uɣiř nnec. 12 Arr asen i jjiran nneɣ abehdeř nsen sebɛa n tseqqar ɣar weḥsin nsen, abehdeř nsen i zi cek feḍḥen, a Sidi inu. 13 Neccin d řgens nnec d wuǧi n ddmani n tarewsa nnec. Nettqada Cek i řebda, zi jjiř ař jjiř. Neccin ad nbarreḥ ccan nnec.