Izehhiden 85

1 I umeqqran n imeɣnajen. Zeg ayt n Quraḥ. Azehhed. 2 Cek tarḍid x temmurt, a SIDI, tessenqeřbed tameḥbast n Yaɛqub. 3 Tekksed řmuɛṣiyyet x řgens nnec, tedřid marra ddnub nnes. Silah. 4 Cek tmenɛed marra afugem, tesstewwjed řḥaduq n weɣḍab nnec. 5 Arr aneɣ, a AREBBI n usenjem nneɣ, ttu aɣḍab nnec xaneɣ. 6 Ma texsed ad xaneɣ tesɛared i řebda? Ma ad tegged aɣḍab nnec ad iqqim zi jjiř ař jjiř? 7 Ma war d aneɣ tejjid ad neddar ɛawed, ḥima ad ac ifarḥ řgens nnec? 8 Scen aneɣ-dd tamexsiwt nnec icewwaren, a SIDI, ewc aneɣ asenjem nnec. 9 Necc xseɣ ad sřeɣ min ɣa issiweř Arebbi, SIDI, maɣar Netta ad issiweř ak-d řgens nnes u ak-d imtiqqan nnes x řehna. Ɣarwem, mařa nitni ad dd-dewřen ttcařan x yixef nsen. 10 Nican, aqa yudes-dd usenjem nnes i yinni zzayes itteggʷeden, ḥima aɛuǧi nnes ad izdeɣ di temmurt nneɣ. 11 Tamexsiwt icewwaren d řaman ad mmsagaren, tasegda d řehna ad mmsudumen. 12 Tidett ad teɣmi zi temmurt, tasegda ad tessijj ɣar swadday zeg ujenna. 13 SIDI ad iwc uřa d min iṣebḥen, tammurt nneɣ ad tewc řɣiǧet nnes. 14 Tasegda ad as tizwar zzat i wudem nnes, ad teḥḍa jjurret n iṣuraf nnes.