Izehhiden 88

1 Izři, azehhed n ayt n Quraḥ. I umeqqran n imeɣnajen, s teɣnint n ‘Izři n wecḍan’ ɣar řeḥṣarat. Axemmi n Hayman, Azraḥi. 2 A SIDI, AREBBI n usenjem inu, deg wass i di dd ɣa sɣuyeɣ ɣarek s ǧiřet, 3 ejj xenni ad dd-tas tẓaǧit inu zzatek, ewc amezzuɣ nnec i uřaɣi inu. 4 Maɣar řeɛmar inu ijjiwen s řmuṣibat, tudart inu tudes-dd řaxart. 5 Necc ttwaḥessabeɣ am yinni dd-ihekkwan deg weḥfur n wenḍeř, am ijj n weryaz umi war dayes jjhed ɛad. 6 Aqa ttwaḥuzeɣ jar imettan, am yinni ittwanɣen inni izzřen deg wenḍeř, inni war ten tᵉttidared ɛad, ttwaqeḍɛen nitni zeg ufus nnec. 7 Cek teggid ayi deg wenḍeř yuǧɣen qaɛ, di taǧest, di řaǧaɣ. 8 Asɛar nnec idqeř xafi aṭṭas, s marra řemwaj n wesɛar nnec tessdeǧed ayi. Silah. 9 Imqarraben inu tessiggʷejed i-ten xafi, tarrid ayi d nnɛi i nitni. Ittwabelleɛ xafi, war zemmareɣ ad dd-ffɣeɣ. 10 Tiṭṭ inu teɛmec s řeɣben. A SIDI, ass marra ttřaɣiɣ ɣarek, necc sswiẓẓḍeɣ ifassen inu ɣarek. 11 Ma ad tegged ict n lmuɛjiza deg imettan? Niɣ ad dd-kkaren řexyařat n imettan, ma ad Cek qadan? Silah. 12 Ma ad barrḥen s tmexsiwt nnec icewwaren deg wenḍeř, s řaman nnec di tesraft n uhellek? 13 Ma ad ttwassnent lmuɛjizat nnec di taǧest, tasegda nnec di temmurt n tattut? 14 A SIDI, necc ttřaɣiɣ Cek, taẓaǧit inu tᵉttas-dd zzatek ɣar uteffu. 15 Mayemmi, a SIDI, tneṭṭared řeɛmar inu, mayemmi tᵉssnuffared udem nnec zzayi? 16 Zi temẓi inu necc di řeɣben u ggureɣ ɣar unuri, ksiɣ isnexriɛen nnec ḍidd inu, ttwaḥṣareɣ zzaysen. 17 Tettekk xafi řḥaduq n weɣḍab nnec, itteḥḥa ayi useggʷid nnec. 18 Ass marra ittenneḍ ayi-dd am waman, ittquwwar ayi-dd marra. 19 Amɛizz inu d umeddukkeř inu tessiggʷejed i-ten xafi, inni d ayi issnen inu aqa aten ttwařeḥḥfen s taǧest.