Izehhiden 94

1 A Arebbi n untaqem, a SIDI, Arebbi n untaqem, ban-dd di tissiqt! 2 A, Řqaḍi n temmurt, sgeɛɛed Ixef nnec, arr tasɣart i imɛeffaren am min ssdaḥeǧen nitni. 3 Mecḥař i ɣa kken ɛad iɛeffanen, a SIDI, mecḥař i ɣa kken neggzen iɛeffanen s řefraḥet, 4 ad qqimen ssawařen awařen iqesḥen, mecḥař i ɣa qqimen marra inni itteggen řmuɛṣiyyet ad ssemɣaren ixef nsen? 5 A SIDI, nitni řebbzen řgens nnec, ḥeṣṣaren tasɣart n řwart nnec. 6 Nitni neqqen tajjač d ubarrani, ɣarrṣen i iyujiřen. 7 Nitni qqaren: “SIDi war tt ittwiři, AREBBI n Yaɛqub war d as ittḥekkar." 8 Fetnem kenniw iqeffuḥen di řgens, jmiɛ ak-d ibuhařiyyen, meřmi i ɣa tdewřem tfehhmem? 9 Ma war ittesři wenni iẓẓun amezzuɣ? Ma war iẓarr wenni iggin tiṭṭ? 10 Ma war ittɛaqeb wenni ittwebbxen řegnus, wenni isseřmaden tussna i bnadem? 11 SIDI yareggeb x ixarriṣen n iwdan, aqa aten am yijj n usuḍi waha. 12 Sseɛd n weryaz nni tᵉttwebbxed, a SIDi, wenni tesseřmaded zi Ccariɛa nnec, 13 ḥima ad t tessareyyeḥed zeg wussan iɛeffnen, ař ɣa ḥfaren aḥfur n turṣuḍi i uɛeffan. 14 Maɣar SIDI war ineṭṭar řgens nnes, war isemmeḥ di tesɣart nnes. 15 Maɣar řḥukm ad dd-idweř ɣar tsegda, marra inni ɣarsen uř iseggmen ad tt-i-dd-ḍeffaren. 16 Man wen kidi i ɣa ibedden ḍidd i iɛeffanen? Man wen xafi i ɣa iwten ḍidd i yinni itteggen řɣecc? 17 Mři war iǧi SIDI d twiza inu, iři izdeɣ řeɛmar inu ɛřaḥař deg wesɣaḍ. 18 Mařa nniɣ: ‘Aḍar inu ittefriɣ!’, xenni tᵉṭṭef ayi tmexsiwt nnec icewwaren, a SIDI! 19 Mařa mmarnin dayi ixarriṣen ař ṭṭarf, tuɣa řeɛmar inu ittarr meẓri deg usfewwej nnec. 20 Ma texsed ad kidek issmun řkursi n uhellek, wenni issiwḍen řeɣben x dsas n tewṣeyyet? 21 Nitni ḥeṣṣaren řeɛmar n umseggad, cehhden x idammen imezdagen s řɣar. 22 SIDI tuɣa ayi d ijj n lburj yuɛřan, AREBBI inu d Taṣḍart n tarewřa inu. 23 Netta ad xasen isseɛqeb řmuɛṣiyyet nsen, am tteggen řɣar nsen ad ten iteḥḥa. SIDI, AREBBI nneɣ, ad ten iteḥḥa.