Izehhiden 97

1 SIDI iḥekkem, ejj tammurt ad tfarḥ, ad arecqent marra tegzirin. 2 Quwwaren as iseynuten d yijj n useynu ibbumbes, tasegda d řḥeqq aqa aten d dsas n řɛarc nnes. 3 Timessi teggur as zzat n wudem nnes, tqedd iɣrimen nnes i d as dd-ittennḍen. 4 Assamen nnes ssřaqqan ddunect, tammurt tẓarr i-tt, tenhezza. 5 Idurar fessyen am ccmeɛ zzat i wudem n SIDI, zzat i wudem n Sidi n marra tammurt. 6 Ijenwan ttbarrḥen tasegda nnes, marra řegnus ttwařan aɛuǧi nnes. 7 Ejj ad seḍḥan marra inni ɛebbden i řexyařat ineqcen n ukeccuḍ, marra inni ittcennɛen di l’aṣnam. Bendqem zzates, kenniw, marra irebbiten! 8 Ṣihyun isřa, ifarḥ, yessis n Yahuda arecqent, zi ssibbet n řeḥkamat nnec, a SIDI. 9 Maɣar Cek, a SIDI, d Amɛuǧi x marra tammurt, Cek d wenni yuɛřan qaɛ x marra irebbiten. 10 Kenniw i ittexsen SIDI, carhem řɣar. Netta iḥeṭṭa x řeɛmur n imtiqqan nnes, Netta ittfekka i-ten zeg ufus n iɛeffanen. 11 Tafawt tᵉttwazarɛ i umsegged, řefraḥet i yinni ɣar iǧa uř iseggmen. 12 Kenniw imseggaden, farḥem zi SIDI, qadam xmi tᵉttidarem taqeddast nnes.