Izři x izřan 2

1 “Necc d tanewwact n Carun war zzayes wḍant tifray ɛemmarṣ, d talillect n teysarin." 2 “Am tlillect jar tzeggʷart, ammu i teǧa tameddukkeč inu jar tyeǧitin.” Arcam n yesři 3 “Am tcejjart n tteffaḥt jar tcejjura n wezɣar, ammu i yeǧa llif inu jar warrawen. Necc aqa ayi mmeẓreɣ ad qqimeɣ di tiři nnes. řɣiǧet nnes d miẓid i waneɣ inu. 4 Netta indeh ayi di taddart n binu, u tayri d taɛeǧant nnes xafi. 5 Sjehdem ayi s tɣaryiṭatin n zzbib, sbarrdem ayi s tteffaḥin, maɣar necc heřceɣ s tayri. 6 Azeřmaḍ nnes sadu uzeǧif inu, afusi nnes idarreɛ ayi-dd. 7 Necc ad kennint ssjaǧaɣ, a yessis n Urcalim, ɣar tɣayḍin n wezɣar u ɣar tudadin deg iyyaren, aqa kennint war hekkwřent tayri, war tt-i-dd-ssekkarant ař tᵉttexs simant nnes.” Tawasit n yesři 8 “Tmijja n llif inu! Aqa da, ittas-dd, ineṭṭu x idurar, ineggez x tewririn! 9 Llif inu yarwes deg iɣayḍ n wezɣar, niɣ deg ijj n umeẓyan n wudaden. Aqa-t da, ibedd awarni i řḥiḍ nneɣ, ixezzar zi řekwazi, ittceyyeɛ zi ccebbac.” Řeɛruḍ n yesři 10 “Llif inu ittarra-dd, inna ayi: ‘Kkar, bedd, a tameddukkeč inu, aẓri inu, as-dd! 11 Maɣar aqa da, tagerst teɛdu, iksi wenẓar, aqa iruḥ. 12 Banen-dd inuwwaren di temmurt, řḥař n wenziz aqa-t da, u tmijja n tjlilleḥt nesřa i-tt ɛawed di temmurt nneɣ. 13 Artu n tazart ittxemmař řbacur nnes, tizayarin ittnewwaren arxun i řefwaḥ. Kkar, bedd, tameddukkeč inu, aẓri inu, as-dd!’” Isři yarenni di řeɛruḍ 14 “Tadbirt inu deg imucan n udurri di řejruf, tnuffar di tsawent n wedrar. Ejj ayi ad ẓareɣ aɣembub nnem, ad sřeɣ i tmijja nnem, maɣar d tmiẓidt i teǧa tmijja nnem, iṣbeḥ uɣembub nnem.” Tasřit texs ad tiři i yesři waha 15 “Ṭṭfem aneɣ-dd iceɛbawen, iceɛbawen imeẓyanen, inni ittarytaren aneɣ imarjaɛen n uḍiř, maɣar tizayarin deg imarjaɛen nneɣ ttnewwarent ɛad. 16 Llif inu aqa-t inu u necc nnes, necc n wenni yarekkwsen jar tlillicin 17 ař i ɣa ismeḍ wass u ad arewřent tiřiwin. Nneḍ-dd, a llif inu, iři am yijj n iɣayḍ n wezɣar niɣ am yijj n umeẓyan n wudaden x idurar i ittwaqeḍɛen s teysarin."