Izři x izřan 3

1 “Arzuɣ xas di ǧyaři am ǧiɣ x tassut inu, arzuɣ x wenni ittexs řeɛmar inu. Necc arzuɣ xas, maca necc war t ufiɣ. 2 Necc nniɣ: ‘Ad kkareɣ, ad suḥeɣ di tendint, deg ibriden u x wazzayen. Necc ad xas arzuɣ, ad arzuɣ x wenni ittexs řeɛmar inu.’ Necc arzuɣ xas, maca war t ufiɣ. 3 Ufin ayi iɛessasen am ttennḍen di tendint. Necc nniɣ: ‘Ma teẓrim kenniw wenni ittexsen řeɛmar inu?’ 4 Řami tuɣa ɛad war xasen ɛduɣ, ufiɣ t, wenni ittexsen řeɛmar inu. Necc ṭṭfeɣ t, war zzayes arexxuɣ ařami t-i-dd-iwyeɣ ɣar taddart n yemma, deg wexxam n daxeř n tenni i dd ayi yurwen. 5 Necc ad kennint ssjaǧaɣ, a yessis n Urcalim, ɣar tɣayḍin n wezɣar u ɣar tudadin deg iyyaren, aqa kennint war hekkwřent tayri, war tt-i-dd-ssekkarant ař tᵉttexs simant nnes.” Tawasit n kula ak-d yesři i řemřac 6 “Min teɛna tenni i dd-igeɛɛden zi řexřa, am iqellijen n ddexxan, deg ijj n useynu n mirru d jjawi, n marra řebzar ittfuḥen n usebbab? 7 Xzar, řectu n trebbut n Suliman, ttennḍen as-dd settin n ayt n bu-teɣruḍt, zeg ayt n bu-teɣruḍt n Israil, 8 marra inni itteṭṭfen ssif, inni iřemmden amenɣi, kuř ijj s ssif nnes ɣar tmeṣṣaḍt nnes zi ssibbet n min issaggʷaden di ǧiřet. 9 Ajeǧid Suliman igga i yixef nnes ijj n řectu i trebbut s ukeccuḍ n Lubnan. 10 Iɛumad ɣar teɣmart igga i-ten s nnuqart, aɛemmed n weɛrur n wureɣ uca aɣimi nnes n arjuwani. Daxeř nnes yarḍen t s tayri n yessis n Urcalim." 11 “Ffɣent u xzarent, kennint yessis n Ṣihyun, aqa da ajeǧid Suliman ak-d ttaj i zi t tgelled yemmas deg wass n wurar nnes, deg wass n řefraḥet yuẓɣen deg wuř nnes."