2 ⵚⴰⵎⵡⵉⵍ 22

1 ⴷⴰⵡⵓⴷ ⵉⵙⵙⵉⵡⴻⵍ ⴰⵡⴰⵍⴻⵏ ⵏ ⵉⵣⵍⵉ-ⵢⴰ ⵉ ⵙⵉⴷⵉ ⴷⴻⴳ ⵡⴰⵙⵙ ⵓⵎⵉ ⵜ ⵉⴼⴻⴽⴽ ⵙⵉⴷⵉ ⵣⴻⴳ ⵓⴼⵓⵙ ⵏ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ ⵓ ⵣⴻⴳ ⵓⴼⵓⵙ ⵏ ⵛⴰⵡⵓⵍ. 2 ⵏⴻⵜⵜⴰ ⵉⵏⵏⴰ: “ⵙⵉⴷⵉ ⴷ ⵜⴰⵚⴹⴰⵔⵜ ⵉⵏⵓ ⴷ ⵍⴱⵓⵔⵊ ⵉⵏⵓ ⴷ ⴰⵎⴼⴻⴽⴽⵉ ⵉⵏⵓ. 3 ⵙⵉⴷⵉ ⵏ ⵜⴻⵚⴹⴰⵔⵜ ⵉⵏⵓ, ⵖⴰⵔⴻⵙ ⴰⵔⴻⴽⴽⵡⴰⵍⴻⵖ. ⵛⴻⴽ ⴷ ⴰⵙⴻⵍⵇⵉ ⵉⵏⵓ ⴷ ⵢⵉⵛⵛ ⵏ ⵓⵙⴻⵏⵊⴻⵎ ⵉⵏⵓ, ⵍⴱⵓⵔⵊ ⵉⵏⵓ ⵢⵓⵄⵍⴰⵏ, ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ ⴷ ⴰⵎⵙⴻⵏⵊⴰⵎ ⵉⵏⵓ. ⵛⴻⴽ ⵜⴼⴻⴽⴽⴻⴷ ⴰⵢⵉ ⵣⵉ ⵍⵄⵓⵏⴼ. 4 ⵍⴰⵖⵉⵖ: ⴰⵙⴻⵎⵖⴰⵔ ⵉ ⵙⵉⴷⵉ!, ⵓⵛⴰ ⵜⵜⵡⴰⵙⵙⵏⴻⵊⵎⴻⵖ ⵣⵉ ⵍⵄⴻⴷⵢⴰⵏ ⵉⵏⵓ. 5 ⵎⴰⵖⴰⵔ ⵏⵏⴹⴻⵏ ⴰⵢⵉ-ⴷⴷ ⵍⴻⵎⵡⴰⵊ ⵏ ⵍⵎⴻⵡⵜ, ⵙⵙⵉⴳⴳⵯⴻⴷⴻⵏⵜ ⴰⵢⵉ ⵍⵃⴻⵎⵍⴰⵜ ⵏ ⵡⴰⵎⴰⵏ ⵉⵀⴰⵊⴻⵏ. 6 ⵉⵙⴻⵖⵡⴰⵏ ⵏ ⵍⴰⵅⴰⵔⵜ ⵛⴰⵔⴼⴻⵏ ⴰⵢⵉ, ⵜⵉⵅⴻⵛⴼⵉⵏ ⵏ ⵍⵎⴻⵡⵜ ⵃⵚⴰⵔⴻⵏⵜ ⴰⵢⵉ. 7 ⴷⵉ ⵍⴻⵃⵚⴰⵔⴻⵜ ⵉⵏⵓ ⵍⴰⵖⵉⵖ-ⴷⴷ ⵅ ⵙⵉⴷⵉ ⵓ ⵅ ⴰⵔⴻⴱⴱⵉ ⵉⵏⵓ ⵉ ⵅ ⴷⴷ-ⵍⴰⵖⵉⵖ. ⵣⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏⵏⴻⵙ ⵉⵙⵍⴰ ⵏⴻⵜⵜⴰ ⵉ ⵜⵎⵉⵊⵊⴰ ⵉⵏⵓ ⵓⵛⴰ ⵉⵖⵓⵢⵢⴰⵏ ⵉⵏⵓ ⵓⴷⴼⴻⵏ ⵖⴰⵔ ⵉⵎⴻⵣⵣⵓⵖⴻⵏ ⵏⵏⴻⵙ. 8 ⵅⴻⵏⵏⵉ ⵜⴻⵏⵀⴻⵣⵣ ⵓ ⵜⴰⵔⵊⵉⵊⵉ ⵜⴻⵎⵎⵓⵔⵜ, ⴷⵙⵓⵙⴰ ⵏ ⵓⵊⴻⵏⵏⴰ ⵜⵜⵔⴰⵃⴻⵏ-ⴷⴷ ⵜⵜⴰⵙⴻⵏ-ⴷⴷ, ⵏⵀⴻⵣⵣⴻⵏ, ⵎⴰⵖⴰⵔ ⴰⵖⴹⴰⴱ ⵏⵏⴻⵙ ⵜⵓⵖⴰ ⵉⵜⵜⵡⴰⵙⵙⴰⵔⵖ. 9 ⴷⴷⴻⵅⵅⴰⵏ ⵉⴳⴻⵄⵄⴻⴷ-ⴷⴷ ⵣⴻⴳ ⵡⴻⵏⵣⴰⵔⴻⵏ ⵏⵏⴻⵙ, ⵜⵉⵎⴻⵙⵙⵉ ⵣⴻⴳ ⵓⵇⴻⵎⵎⵓⵎ ⵏⵏⴻⵙ ⵜⵚⴰⵔⴹ, ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⵉⵜⵜⵡⴰⵙⵙⴰⵔⵖ ⵣⵣⴰⵢⴻⵙ. 10 ⵏⴻⵜⵜⴰ ⵉⴳⴳⴰ ⴰⵊⴻⵏⵏⴰ ⴰⴷ ⵢⴰⴹⴰⵔ, ⵏⴻⵜⵜⴰ ⵉⵀⵡⴰ-ⴷⴷ. ⴰⵇⴰ ⴷⵉⵏ ⵉⵊⵊ ⵏ ⵓⵙⴻⵢⵏⵓ ⵉⴱⴱⵓⵎⴱⴻⵙ ⵙⴰⴷⵓ ⵉⴹⴰⵔⴻⵏ ⵏⵏⴻⵙ. 11 ⵏⴻⵜⵜⴰ ⵉⵏⴷⴻⵀ ⵅ ⵉⵊⵊ ⵏ ⵓⴽⵉⵔⵓⴱ, ⵉⴹⵡⴰ, ⵏⴻⵜⵜⴰ ⵉⵜⵜⵡⴰⵥⴰⵔ ⵅ ⵡⴰⴼⵔⵉⵡⴻⵏ ⵏ ⵓⵙⴻⵎⵎⵉⴹ. 12 ⵏⴻⵜⵜⴰ ⵉⴳⴳⴰ ⵜⴰⴵⴻⵙⵜ ⴰⴷ ⴰⵙ ⵜⴻⵏⵏⴻⴹ ⴰⵎ ⵉⵄⵓⵛⵛⵓⵜⴻⵏ, ⵉⵊⵊ ⵏ ⵡⴻⴳⵔⴰⵡ ⵏ ⵡⴰⵎⴰⵏ, ⵉⵙⴻⵢⵏⵓⵜⴻⵏ ⵉⵇⴻⵍⵍⵊⴻⵏ ⵉⴱⴱⴰⵔⴻⵛⵏⴻⵏ. 13 ⵣⵉ ⵜⵉⵙⵙⵉⵇⵜ ⵇⵉⴱⴰⵍⵜ ⵏⵏⴻⵙ ⵜⵜⵡⴰⵙⵙⴰⵔⵖⴻⵏ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ. 14 ⵉⵊⵊⴰ ⵙⵉⴷⵉ ⴰⵊⵊⴰⵊ ⴰⴷ ⵉⴷⴷⵓⵇⵇⴻⵣ ⵣⴻⴳ ⵓⵊⴻⵏⵏⴰ, ⵓⵛⴰ ⴰⵎⵄⵓⴵⵉ ⵅ ⴽⵓⵍⵛⵉ ⵉⴳⴳⴰ ⵜⵎⵉⵊⵊⴰ ⵏⵏⴻⵙ ⵜⵜⵏⴻⴼⵔⴰⵔⴰ. 15 ⵏⴻⵜⵜⴰ ⵉⵙⵙⴻⴽⴽ ⴼⵍⵉⵜⵛⴰⵜ ⵏ ⵍⵇⴻⵡⵙ ⵏⵏⴻⵙ ⵓⵛⴰ ⵉⴱⴻⵣⵣⴻⵄ ⵉ-ⵜⴻⵏ, ⵉⵣⵣⴰⵔⵢⴻⴹ ⴰⵙⵙⴰⵎⴻⵏ ⵓⵛⴰ ⵉⵙⵙⵉⴳⴳⵯⴻⴷ ⵉ-ⵜⴻⵏ. 16 ⵜⵉⵙⵉⵡⵉⵏ ⵏ ⵍⴻⴱⵃⴰⵔ ⴷⴻⵡⵍⴻⵏⵜ ⵜⵜⴱⴰⵏⴻⵏⵜ, ⴷⵙⵓⵙⴰ ⵏ ⴷⴷⵓⵏⴻⵛⵜ ⴷⴻⵡⵍⴻⵏ ⵄⴰⵔⵔⴰⵏ ⵣⴻⴳ ⵓⵡⴻⴷⴷⴻⴱ ⵏ ⵙⵉⴷⵉ, ⵣⴻⴳ ⵓⵙⵓⴹⵉ ⵏ ⵍⴻⵄⵡⵉⵏ ⵣⴻⴳ ⵡⴻⵏⵣⴰⵔⴻⵏ ⵏⵏⴻⵙ. 17 ⵉⵙⵙⵡⵉⵥⵥⴻⴹ-ⴷⴷ ⴰⴼⵓⵙ ⵏⵏⴻⵙ ⵣⵉ ⵍⵓⵄⵍⴰ, ⵢⵉⵡⵉ ⴰⵢⵉ, ⵉⵊⴱⴻⴷ ⴰⵢⵉ-ⴷⴷ ⵣⴻⴳ ⵡⴰⵎⴰⵏ ⵎⵖⴰⵔⴻⵏ. 18 ⵏⴻⵜⵜⴰ ⵉⴼⴻⴽⴽ ⴰⵢⵉ-ⴷⴷ ⵣⵉ ⵍⴻⵄⴷⵓ ⵉⵏⵓ ⵉⵊⴻⵀⴷⴻⵏ, ⵣⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵎⵉⵏⵣⵉ ⵏⵉⵜⵏⵉ ⵜⵓⵖⴰ ⵊⴻⵀⴷⴻⵏ ⵅⴰⴼⵉ. 19 ⵃⵚⴰⵔⴻⵏ ⴰⵢⵉ ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ ⵉⵏⵓ, ⵎⴰⵛⴰ ⵙⵉⴷⵉ ⵜⵓⵖⴰ ⴷ ⴰⵎⵄⴻⵎⵎⴻⴷ ⵉⵏⵓ. 20 ⵏⴻⵜⵜⴰ ⵉⵏⴷⴻⵀ ⴰⵢⵉ ⵖⴰⵔ ⵜⵜⴰⵙⵉⵄ, ⵉⵙⵙⴻⵏⵊⴻⵎ ⴰⵢⵉ, ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵜⵜⵄⵉⵣⵣⴰ ⴷⴰⵢⵉ. 21 ⵙⵉⴷⵉ ⵉⵅⵍⴻⴼ ⴰⵢⵉ ⵄⵍⴰⵃⵙⴰⴱ ⵜⴰⵙⴻⴳⴷⴰ ⵉⵏⵓ, ⵄⵍⴰⵃⵙⴰⴱ ⵜⴰⵣⴷⵓⴳⵉ ⵏ ⵉⴼⴰⵙⵙⴻⵏ ⵉⵏⵓ ⵉⵅⴻⴵⴻⵚ ⴰⵢⵉ. 22 ⵎⴰⵖⴰⵔ ⵏⴻⵛⵛ ⵃⴹⵉⵖ ⵉⴱⵔⵉⴷⴻⵏ ⵏ ⵙⵉⴷⵉ, ⵡⴰⵔ ⵃⴻⵢⵢⴷⴻⵖ ⵛⴰ ⵅ ⴰⵔⴻⴱⴱⵉ ⵉⵏⵓ ⵙ ⵓⵅⴻⵢⵢⴻⴱ. 23 ⵎⴰⵖⴰⵔ ⵎⴰⵔⵔⴰ ⵍⴼⴰⵔⴰⵢⵉⴹ ⵏⵏⴻⵙ ⵜⵓⵖⴰ ⵊⴰⵔ ⵜⵉⵟⵟⴰⵡⵉⵏ ⵉⵏⵓ, ⵡⴰⵔ ⵃⴻⵢⵢⵉⴷⴻⵖ ⵛⴰ ⵅ ⵜⵡⴻⵚⵚⴰ ⵏⵏⴻⵙ. 24 ⴷⴻⵡⵍⴻⵖ ⴽⴻⵎⵍⴻⵖ ⵉ ⵏⴻⵜⵜⴰ, ⵃⴹⵉⵖ ⵉⵅⴻⴼ ⵉⵏⵓ ⵣⵉ ⵍⵎⵓⵄⵚⵉⵢⵢⴻⵜ ⵉⵏⵓ. 25 ⵙⵉⴷⵉ ⵉⵅⵍⴻⴼ ⴰⵢⵉ ⴰⵏⴻⵛⵜ ⵏ ⵜⴰⵙⴻⴳⴷⴰ ⵉⵏⵓ, ⴰⵏⴻⵛⵜ ⵏ ⵜⴰⵣⴷⵓⴳⵉ ⵉⵏⵓ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ. 26 ⵉ ⵓⵎⴻⴷⴷⵓⴽⴽⴻⵍ ⴰⵎⵜⵉⵇⵇⵉ ⵉ ⵜⴻⴵⵉⴷ ⴷ ⴰⵎⴻⴷⴷⵓⴽⴽⴻⵍ ⴷ ⴰⵎⵜⵉⵇⵇⵉ, ⵉ ⴱⵓ-ⵜⴻⵖⵔⵓⴹⵜ ⵉⴽⴻⵎⵎⵍⴻⵏ ⵉ ⵜⴻⴵⵉⴷ ⵛⴻⴽ ⵜⴽⴻⵎⵎⵍⴻⴷ. 27 ⵉ ⵡⴻⵏⵏⵉ ⵉⵜⵜⵡⴰⵙⵙⵉⵣⴻⴷⴳⴻⵏ ⴰⵇⴰ ⵛⴻⴽ ⴷ ⴰⵎⴻⵣⴷⴰⴳ, ⴰⴽ-ⴷ ⵡⴻⵏⵏⵉ ⵉⴼⴰⵔⵖⴻⵏ, ⴰⵇⴰ ⵜⴼⴰⵔⵖⴻⴷ. 28 ⵛⴻⴽ ⵜⴻⵙⵙⵏⴻⵊⵎⴻⴷ ⵍⴳⴻⵏⵙ ⵉⵜⵜⵡⴰⵃⵚⴰⵔ, ⵎⴰⵛⴰ ⵜⵉⵟⵟⴰⵡⵉⵏ ⵏⵏⴻⵛ ⴹⵉⴷⴷ ⵉ ⵉⵎⵄⴻⴼⴼⴰⵔⴻⵏ, ⵛⴻⴽ ⴰⴷ ⵜⴻⵏ ⵜⴻⵙⵙⴻⵀⵡⵉⴷ. 29 ⵎⵉⵏⵣⵉ ⵛⴻⴽ ⴷ ⵍⴻⴼⵏⴰⵔ ⵉⵏⵓ, ⴰ ⵙⵉⴷⵉ! ⵙⵉⴷⵉ ⵉⵜⵜⴻⴳⴳ ⵜⴰⴼⴰⵡⵜ ⴷⵉ ⵜⴰⴵⴻⵙⵜ ⵉⵏⵓ. 30 ⵎⵉⵏⵣⵉ ⴰⴽⵉⴷⴻⴽ ⴰⴷ ⴰⵣⵣⵍⴻⵖ ⵅ ⵉⵛⵜ ⵏ ⴱⴰⵏⴷⵉⵢⵢⴰ, ⴰⴽ-ⴷ ⴰⵔⴻⴱⴱⵉ ⵉⵏⵓ ⴰⴷ ⵏⴻⴳⴳⵣⴻⵖ ⵅ ⵉⵊⵊ ⵏ ⵍⵃⵉⴹ. 31 ⴰⴱⵔⵉⴷ ⵏ ⴰⵔⴻⴱⴱⵉ ⵉⴽⵎⴻⵍ, ⵎⵉⵏ ⵉⵇⵇⴰⵔ ⵙⵉⴷⵉ ⴰⵇⴰ ⵉⵜⵜⵡⴰⵚⴻⴼⴼⴰ ⴷⵉ ⵜⵎⴻⵙⵙⵉ. ⵏⴻⵜⵜⴰ ⴷ ⴰⵙⴻⵍⵇⵉ ⵉ ⵎⴰⵔⵔⴰ ⵉⵏⵏⵉ ⵖⴰⵔⴻⵙ ⵢⴰⵔⴻⴽⴽⵡⴰⵍⴻⵏ. 32 ⵎⴰⵖⴰⵔ ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵔⴻⴱⴱⵉ, ⵎⵖⵉⵔ ⵙⵉⴷⵉ, ⵓ ⵎⴰⵏ ⵡⴻⵏ ⵉ ⵉⴵⴰⵏ ⴷ ⵜⴰⵚⴹⴰⵔⵜ, ⵎⵖⵉⵔ ⴰⵔⴻⴱⴱⵉ ⵏⵏⴻⵖ? 33 ⴰⵔⴻⴱⴱⵉ ⵏⵏⵉ ⴷ ⵍⵇⴻⵍⵄⴰ ⵉⵏⵓ ⵉⵊⵀⴻⴷ, ⵏⴻⵜⵜⴰ ⵉⵙⵙⴰⵔⵅⵓ ⴰⴱⵔⵉⴷ ⵉⵏⵓ ⵏⵉⵛⴰⵏ. 34 ⵏⴻⵜⵜⴰ ⵉⴳⴳⴰ ⵉⴹⴰⵔⴻⵏ ⵉⵏⵓ ⴰⵎ ⵢⵉⵏⵏⵉ ⵏ ⵜⵓⴷⴰⴷⵉⵏ, ⵏⴻⵜⵜⴰ ⵢⴰⵔⵔⴰ ⴰⵢⵉ ⴰⴷ ⴱⴻⴷⴷⴻⵖ ⵅ ⵍⴻⴳⵄⵓⴷⵉ ⵉⵏⵓ. 35 ⵏⴻⵜⵜⴰ ⵉⵙⵙⴻⵍⵎⴻⴷ ⵉⴼⴰⵙⵙⴻⵏ ⵉⵏⵓ ⵉ ⵓⵎⴻⵏⵖⵉ, ⵉⵖⴰⴵⴻⵏ ⵉⵏⵓ ⵎⴰⵃⴻⵏⴷ ⴰⴷ ⵎⴻⵃⴹⴻⵏ ⵉⵊⵊ ⵏ ⵍⵇⴻⵡⵙ ⵏ ⵏⵏⵃⴰⵙ. 36 ⵜⴻⵡⵛⵉⴷ ⴰⵢⵉ ⴰⵙⴻⵍⵇⵉ ⵏ ⵓⵙⴻⵏⵊⴻⵎ ⵏⵏⴻⵛ, ⵙ ⵓⵡⴰⴹⴻⵄ ⵏⵏⴻⵛ ⵜⴻⵙⵙⴻⵎⵖⴰⵔⴻⴷ ⴰⵢⵉ. 37 ⴰⵇⴰ ⵜⴻⴳⴳⴻⴷ ⵜⵜⴰⵙⵉⵄ ⵉ ⵓⵚⵓⵔⵉⴼ ⵉⵏⵓ ⵙⴰⴷⵓ ⵉⵏⵓ, ⵓⵛⴰ ⵜⵉⵛⴻⵄⴱⵉⵏ ⵉⵏⵓ ⵡⴰⵔ ⵎⴻⵢⵢⵍⴻⵏⵜ. 38 ⵏⴻⵛⵛ ⴹⴼⴰⵔⴻⵖ ⵍⵄⴻⴷⵢⴰⵏ ⵉⵏⵓ ⵓⵛⴰ ⵜⴻⵃⵃⵉⵖ ⵜⴻⵏ, ⵡⴰⵔ ⴷⴷ-ⵜⵜⵄⵉⵇⵇⵉⴱⴻⵖ ⴰⵍ ⵜⴻⵏ ⵇⴹⵉⵖ. 39 ⵏⴻⵛⵛ ⵇⴹⵉⵖ ⵜⴻⵏ ⵓ ⵍⴻⴱⵣⴻⵖ ⵜⴻⵏ, ⴰⵍⴰⵎⵉ ⵡⴰⵔ ⴽⴽⴰⵔⴻⵏ ⵄⴰⵡⴻⴷ. ⵏⵉⵜⵏⵉ ⵡⴹⴰⵏ-ⴷⴷ ⵙⴰⴷⵓ ⵉⴹⴰⵔⴻⵏ ⵉⵏⵓ. 40 ⵛⴻⴽ ⵜⴱⴻⵢⵙⴻⴷ ⴰⵢⵉ ⵙ ⵊⵊⴻⵀⴷ ⵉ ⵓⵎⴻⵏⵖⵉ, ⵜⴰⵔⵔⵉⴷ ⵉⵏⵏⵉ ⵖⴰⵔⵉ ⴷⴷ-ⵉⴽⴽⴰⵔⴻⵏ ⴰⴷ ⴰⴹⴰⵔⴻⵏ ⵙⴰⴷⵓ ⵉⵏⵓ. 41 ⵛⴻⴽ ⵜⴻⵡⵛⵉⴷ ⴰⵢⵉ ⵜⵉⵎⴻⵊⵊⴰⵔⵜ ⵏ ⵍⵄⴻⴷⵢⴰⵏ ⵉⵏⵓ, ⵏ ⵢⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵓ ⵏⴻⵛⵛ ⴰⵔⴻⴷⴷⴵⴻⵖ ⵜⴻⵏ. 42 ⵏⵉⵜⵏⵉ ⵍⴰⵖⴰⵏ, ⵎⴰⵛⴰ ⵡⴰⵔ ⴷⵉⵏ ⵜⵓⵖⵉ ⴰⵎⵙⴻⵏⵊⴻⵎ, ⵍⴰⵖⴰⵏ, ⵅ ⵙⵉⴷⵉ, ⵎⴰⵛⴰ ⵏⴻⵜⵜⴰ ⵡⴰⵔ ⵅⴰⵙⴻⵏ ⴷⴷ-ⵢⴰⵔⵔⵉ. 43 ⵏⴻⵛⵛ ⵙⵙⵡⴻⴷⴷⴰⵔⴻⵖ ⵜⴻⵏ ⴰⵎ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ, ⴰⵎ ⵓⴱⴻⴵⴰⵄ ⵅ ⵉⴱⵔⵉⴷⴻⵏ ⵄⴻⵊⵏⴻⵖ ⵅⴰⵙⴻⵏ ⵓ ⵍⴻⴱⵣⴻⵖ ⵜⴻⵏ. 44 ⵛⴻⴽ ⵜⴼⴻⴽⴽⴻⴷ ⴰⵢⵉ ⵣⴻⴳ ⵉⵎⵛⵓⴱⴱⴻⵛⴻⵏ ⵏ ⵍⴳⴻⵏⵙ ⵉⵏⵓ, ⵜⴻⵃⴹⵉⴷ ⴰⵢⵉ ⴷ ⴰⵣⴻⴵⵉⴼ ⵏ ⵍⴻⴳⵏⵓⵙ, ⵉⵊⵊ ⵏ ⵍⴳⴻⵏⵙ ⵡⴰⵔ ⵜ ⵙⵙⵉⵏⴻⵖ, ⴰⴷ ⴰⵢⵉ ⵉⵙⴻⵅⵅⴰⵔ. 45 ⵜⴰⵔⵡⴰ ⵏ ⵉⵊⵊ ⵏ ⵓⴱⴰⵔⵔⴰⵏⵉ ⵙⵙⵏⵉⵄⵎⵉⵍⴻⵏ ⵙⵙⵡⴰⴹⵄⴻⵏ ⴰⵢⵉ. ⵎⵖⵉⵔ ⵍⴰⵎⵉ ⴷ ⴰⵢⵉ ⵉⵙⵍⴰ ⵓⵎⴻⵣⵣⵓⵖ ⵏⵙⴻⵏ ⵡⴰⵀⴰ, ⵙⵍⵉⵏ-ⴷⴷ ⵖⴰⵔⵉ. 46 ⴰⵔⵔⴰⵡⴻⵏ ⵏ ⵉⵊⵊ ⵏ ⵓⴱⴰⵔⵔⴰⵏⵉ ⴼⴻⵛⵍⴻⵏ, ⵡⴰⵅⵅⴰ ⵏⵏⴹⴻⵏ ⴰⵙⴻⵏ-ⴷⴷ ⵍⴱⴰⵔⴰⵊⴰⵜ ⵏⵙⴻⵏ. 47 ⵜⵓⴷⴰⵔⵜ ⵉ ⵙⵉⴷⵉ. ⴰⴷ ⵜᵉⵜⵜⵡⴰⴱⴰⵔⴻⴽ ⵜⴻⵚⴹⴰⵔⵜ ⵉⵏⵓ. ⴻⵊⵊ ⴰⵔⴻⴱⴱⵉ ⵏ ⵜⴻⵚⴹⴰⵔⵜ ⵏ ⵓⵙⴻⵏⵊⴻⵎ ⵉⵏⵓ ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⵖⴰⵔ ⵓⵊⴻⵏⵏⴰ!. 48 ⴰⵔⴻⴱⴱⵉ ⵡⴻⵏⵏⵉ ⵅⴰⴼⵉ ⵉⵜⵜⴻⵏⵜⴰⵇⴰⵎⴻⵏ ⴷ ⵡⴻⵏⵏⵉ ⴷ ⴰⵢⵉ ⵉⵜⵜⴻⴳⴳⴻⵏ ⵍⴻⴳⵏⵓⵙ ⵙⴰⴷⵓ ⵓⴼⵓⵙ ⵉⵏⵓ, 49 ⵡⴻⵏⵏⵉ ⴷ ⴰⵢⵉ ⵉⵜⵜⴼⴻⴽⴽⴰⵏ ⵣⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵉⵏⵓ, ⵡⴰⵀ, ⵛⴻⴽ ⵜⴻⵙⵙⴳⴻⵄⵄⴰⴷⴻⴷ ⴰⵢⵉ ⵜⵉⵡⴰ ⵏ ⵢⵉⵏⵏⵉ ⴷ ⴰⵢⵉ ⵉⵜⵜⴹⴰⴷⴷⴰⵏ, ⵛⴻⴽ ⵜⴻⵙⵙⴻⵏⵊⴰⵎⴻⴷ ⴰⵢⵉ ⵣⴻⴳ ⵡⴻⵔⵢⴰⵣ ⵏ ⵍⴻⵅⵛⵓⵏⴻⵜ. 50 ⵅ ⵓⵢⴰ, ⵙⵉⴷⵉ, ⵅⵙⴻⵖ ⴰⴷ ⵛⴻⴽ ⵇⴰⴷⵉⵖ, ⵅⵙⴻⵖ ⴰⴷ ⵣⴻⵀⵀⴷⴻⵖ ⵉⵙⴻⵎ ⵏⵏⴻⵛ. 51 ⵏⴻⵜⵜⴰ ⵉⴳⴳⴰ ⵉⵙⴻⵏⵊⵉⵎⴻⵏ ⵏ ⵓⵊⴻⴵⵉⴷ ⵏⵏⴻⵙ ⵎⵖⴰⵔⴻⵏ, ⵓⵛⴰ ⵉⵙⵙⵛⴻⵏ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵉ ⵓⵎⴻⴷⵀⵓⵏ ⵏⵏⴻⵙ, ⵉ ⴷⴰⵡⵓⴷ ⵓ ⵉ ⵣⵣⴰⵔⵉⵄⴻⵜ ⵏⵏⴻⵙ ⵉ ⵍⴻⴱⴷⴰ."