ⵃⵉⵥⵇⵉⵢⴰⵍ 30

1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⴱ ⵓⵛⴰ ⵉⵏⵉ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵔⵓⵎ! ⴰⵢⵢⴻⵀⵀⴰⵜ ⵅ ⵡⴰⵙⵙ ⵏⵏⵉ! 3 ⵎⵉⵏⵣⵉ ⵢⵓⴷⴻⵙ ⵉ ⵢⴻⴵⴰ ⵡⴰⵙⵙ ⵏⵏⵉ, ⵢⵓⴷⴻⵙ ⵉ ⵢⴻⴵⴰ ⵡⴰⵙⵙ ⵉ ⵙⵉⴷⵉ, ⴰⵙⵙ ⵏ ⵉⵙⴻⵢⵏⵓⵜⴻⵏ. ⴰⴷ ⵢⵉⵍⵉ ⴷ ⵜⴰⵙⴰⵄⵄⴻⵜ ⵏ ⵍⴻⴳⵏⵓⵙ. 4 ⴰⴷ ⴷⴷ-ⵢⴰⵙ ⵙⵙⵉⴼ ⴷⵉ ⵎⵉⵚⵔⴰ. ⴰⴷ ⵢⵉⵍⵉ ⵡⴰⵔⵊⴻⴼ ⴰⵎⴻⵇⵇⵔⴰⵏ ⴷⵉ ⵜⴻⵎⵎⵓⵔⵜ ⵏ ⴽⵓⵛ, ⵅⵎⵉ ⵖⴰ ⵡⴹⴰⵏ ⵉⵏⵏⵉ ⵉⵜⵜⵡⴰⵙⵙⵏⵓⵇⵇⴱⴻⵏ ⴷⵉ ⵎⵉⵚⵔⴰ, ⵎⵉⵏⵣⵉ ⴰⴷ ⴰⵡⵢⴻⵏ ⴰⴼⴻⵢⵢⴻⴹ ⵏ ⵡⴰⴳⵍⴰ ⵏⵏⴻⵙ, ⴰⴷ ⴰⵔⴻⴷⴷⴵⴻⵏ ⴷⵙⵓⵙⴰ ⵏⵏⴻⵙ. 5 ⴽⵓⵛ ⴷ ⴼⵓⵟ ⴷ ⵍⵓⴷ ⴷ ⵄⵍⴰⵎ ⴽⵓⵍ ⵉⴱⴰⵔⵔⴰⵏⵉⵢⵢⴻⵏ, ⴷ ⴽⵓⴱ ⴷ ⴰⵢⵜ ⵏ ⵜⴻⵎⵎⵓⵔⵜ ⵏ ⵍⵄⴰⵀⴷ ⴰⴷ ⴽⵉⵙⴻⵏ ⵡⴹⴰⵏ ⵙ ⵙⵙⵉⴼ.’" 6 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵉⵏⵏⵉ ⵉⵜⵜⵛⴰⵍⴻⵏ ⵅ ⵎⵉⵚⵔⴰ ⴰⴷ ⵡⴹⴰⵏ ⵓ ⵏⵏⴼⴰⵅⴻⵜ ⵏ ⵚⵚⵓⵍⵟⴰ ⵏⵏⴻⵙ ⴰⴷ ⵜⵖⴰⵔⵇ. ⵣⵉ ⵎⴰⵊⴷⴰⵍ ⴰⵍ ⴰⵙⵡⴰⵏ ⴰⴷ ⵡⴹⴰⵏ ⵙ ⵙⵙⵉⴼ ⴷⵉ ⵜⴻⵎⵎⵓⵔⵜ!’, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ. 7 ‘ⵏⵉⵜⵏⵉ ⴰⴷ ⵜⵜⵡⴰⵔⴻⴷⴵⴻⵏ ⴷⵉ ⵍⵡⴻⵙⵟ ⵏ ⵜⴻⵎⵎⵓⵔⴰ ⵉⵜⵜⵡⴰⵔⴻⴷⴵⴻⵏⵜ ⵓ ⵜⵉⵏⴻⴷⴷⴰⵎ ⵏⵏⴻⵙ ⴰⴷ ⵉⵍⵉⵏⵜ ⴷⵉ ⵍⵡⴻⵙⵟ ⵏ ⵜⵏⴻⴷⴷⴰⵎ ⵏⵏⴻⵖⵏⵉ ⵉⵜⵜⵡⴰⵅⴰⵔⵔⴱⴻⵏ. 8 ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⵅⵎⵉ ⵖⴰ ⵙⵙⴰⵔⵖⴻⵖ ⵜⵉⵎⴻⵙⵙⵉ ⴷⵉ ⵎⵉⵚⵔⴰ ⵓⵛⴰ ⵎⴰⵔⵔⴰ ⵉⵏⵏⵉ ⵜⵜ ⵉⵜⵜⵄⴰⵡⴰⵏⴻⵏ ⴰⴷ ⵜⵜⵡⴰⵔⵥⴻⵏ. 9 ⴷⴻⴳ ⵡⴰⵙⵙ ⵏⵏⵉ ⴰⴷ ⴼⴼⵖⴻⵏ ⵉⵔⴻⵇⵇⴰⵙⴻⵏ ⵙ ⵜⵖⴰⵔⵔⵓⴱⴰ ⵣⵉ ⵣⵣⴰⵜ ⵏ ⵡⵓⴷⴻⵎ ⵉⵏⵓ, ⵎⴰⵃⴻⵏⴷ ⴰⴷ ⵙⵙⵉⴳⴳⵯⴻⴷⴻⵏ ⴽⵓⵛ ⵡⴻⵏⵏⵉ ⵓⵎⵉ ⵉⵜⵜⵖⵉⵍ ⴰⵇⴰ ⵏⴻⵜⵜⴰ ⴷⵉ ⵍⴰⵎⴰⵏ. ⴰⴷ ⴷⴰⵢⵙⴻⵏ ⵢⵉⵍⵉ ⵡⴰⵔⵊⴻⴼ ⴰⵎⴻⵇⵇⵔⴰⵏ, ⴰⵎⴻⵛⵏⴰⵡ ⴷⴻⴳ ⵡⴰⵙⵙ ⵏⵏⵉ ⵏ ⵎⵉⵚⵔⴰ, ⵎⴰⵖⴰⵔ ⵅⵣⴰⵔ, ⴰⴷ ⴷⴷ-ⵢⴰⵙ!’" 10 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵏⴻⵛⵛ ⴰⴷ ⵙⵙⴱⴻⴷⴷⴻⵖ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵎⵉⵚⵔⴰ ⵙ ⵓⴼⵓⵙ ⵏ ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ. 11 ⵏⴻⵜⵜⴰ ⴷ ⵍⴳⴻⵏⵙ ⵏⵏⴻⵙ ⴰⴽⵉⴷⴻⵙ, ⵉⵎⵙⴰⴳⴳⵯⴰⴷⴻⵏ ⵇⴰⵄ ⵏ ⵍⴻⴳⵏⵓⵙ ⴰⴷ ⴷⴷ-ⴰⵙⴻⵏ ⵃⵉⵎⴰ ⴰⴷ ⵜⴻⵃⵃⴰⵏ ⵜⴰⵎⵎⵓⵔⵜ. ⵏⵉⵜⵏⵉ ⴰⴷ ⵙⵙⵓⴼⴼⵖⴻⵏ ⵍⴻⵙⵢⵓⴼ ⵏⵙⴻⵏ ⴹⵉⴷⴷ ⵉ ⵎⵉⵚⵔⴰ ⵓⵛⴰ ⴰⴷ ⵛⵛⵓⵔⴻⵏ ⵜⴰⵎⵎⵓⵔⵜ ⵙ ⵢⵉⵏⵏⵉ ⵉⵜⵜⵡⴰⵙⵙⵏⵓⵇⵇⴱⴻⵏ. 12 ⵏⴻⵛⵛ ⴰⴷ ⵙⵙⵉⵥⵖⴻⵖ ⵉⵖⴻⵣⵔⴰⵏ ⵓⵛⴰ ⴰⴷ ⵣⵣⴻⵏⵣⴻⵖ ⵜⴰⵎⵎⵓⵔⵜ ⵉ ⵉⵄⴻⴼⴼⴰⵏⴻⵏ ⵓ ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⵜⴰⵎⵎⵓⵔⵜ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ ⵙ ⵓⴼⵓⵙ ⵏ ⵉⴱⴰⵔⵔⴰⵏⵉⵢⵢⴻⵏ. ⵏⴻⵛⵛ, ⵙⵉⴷⵉ, ⵡⴻⵏⵏⵉ ⵉⵏⵏⴰⵏ ⴰⵢⴰ.’" 13 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵓⵛⴰ ⴰⴷ ⵇⴹⵉⵖ ⵅ ⵍ’ⴰⵚⵏⴰⵎ ⵣⵉ ⵏⵓⴼ. ⵡⴰⵔ ⵉⵜⵜⵖⵉⵎⵉ ⵄⴰⴷ ⵓⵍⴰ ⴷ ⵉⵊⵊ ⵏ ⵍⵃⴰⴽⴻⵎ ⵣⵉ ⵎⵉⵚⵔⴰ. ⵏⴻⵛⵛ ⴰⴷ ⵙⵙⵉⴷⴼⴻⵖ ⵍⵄⵓⵔⵔⴻⵜ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. 14 ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⴼⴰⵜⵔⵓⵙ ⵓ ⴰⴷ ⵙⵙⴰⵔⵖⴻⵖ ⵚⵓⵄⴰⵏ ⵓ ⴰⴷ ⴰⵡⵢⴻⵖ ⵍⴻⵃⴽⴰⵎⴰⵜ ⵉⵏⵓ ⴷⵉ ⵏⵓ. 15 ⵏⴻⵛⵛ ⴰⴷ ⵙⵙⴼⴰⵔⵖⴻⵖ ⴰⵙⵄⴰⵔ ⵉⵏⵓ ⵅ ⵙⵉⵏ, ⵍⴱⵓⵔⵊ ⵏ ⵎⵉⵚⵔⴰ, ⴰⴷ ⵇⴻⴹⵄⴻⵖ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵏⵓ. 16 ⵏⴻⵛⵛ ⴰⴷ ⵙⵙⵉⴷⴼⴻⵖ ⵜⵉⵎⴻⵙⵙⵉ ⵖⴰⵔ ⵎⵉⵚⵔⴰ, ⵙⵉⵏ ⴰⴷ ⵜⴻⴼⵙⵉ ⵙ ⵍⴻⵃⵔⵉⵇ, ⵜⴰⵎⵎⵓⵔⵜ ⵏ ⵏⵓ ⴰⴷ ⵜᵉⵜⵜⵡⴰⴼⴻⴵⴻⵇ ⵓ ⵏⵓⴼ ⴰⴷ ⵜⵉⵍⵉ ⴷⵉ ⵍⴻⵃⵚⴰⵔⴻⵜ ⴽⵓⵍ ⴰⵙⵙ. 17 ⵉⵃⵓⴷⵔⵉⵢⵢⴻⵏ ⵣⵉ ⴰⵡⴰⵏ ⴷ ⴼⵉⴱⵉⵙⵜⴰ ⴰⴷ ⵡⴹⴰⵏ ⵙ ⵙⵙⵉⴼ ⵓ ⵜⵉⵎⵖⴰⵔⵉⵏ ⴰⴷ ⵓⵢⵓⵔⴻⵏⵜ ⴷⵉ ⵜⵎⴻⵃⴱⴰⵙⵜ. 18 ⴰⵙⵙ ⴰⴷ ⵉⵜⵜⴱⴰⵔⵛⴻⵏ ⴷⵉ ⵜⴰⵃⴼⴰⵃⵉⵙ ⵅⵎⵉ ⵖⴰ ⵢⴰⵔⵥⴻⵖ ⵏⴻⵛⵛ ⴰⵣⴰⵢⵍⵓ ⵏ ⵎⵉⵚⵔⴰ, ⵓ ⴰⴷ ⴰⵙ ⵙⵙⴱⴻⴷⴷⴻⵖ ⵏⵏⴼⴰⵅⴻⵜ ⵏ ⵊⵊⴻⵀⴷ ⵏⵏⴻⵙ ⴷⵉⵏⵏⵉ. ⵉⵊⵊ ⵏ ⵓⵙⴻⵢⵏⵓ ⴰⴷ ⵜⵜ ⵉⵙⵙⴷⵓⵔⵔⵉ ⵓⵛⴰ ⵢⴻⵙⵙⵉⵙ ⴰⴷ ⵓⵢⵓⵔⴻⵏⵜ ⴷⵉ ⵜⵎⴻⵃⴱⴰⵙⵜ. 19 ⵏⴻⵛⵛ ⴰⴷ ⵙⵙⵉⵡⴹⴻⵖ ⵍⴻⵃⴽⴰⵎⴰⵜ ⵅ ⵎⵉⵙⵍⴰ ⵓ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’” ⵍⵃⵓⴽⵎ ⵅ ⴼⵉⵔⵄⵓⵏ ⴷ ⵓⵣⵣⵓⵣⴰⵔ ⵏ ⵍⴳⴻⵏⵙ ⵏⵏⴻⵙ 20 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵃⵉⵟⴰⵛ, ⴷⴻⴳ ⵓⵢⵓⵔ ⴰⵎⴻⵣⵡⴰⵔⵓ, ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ ⵏ ⵓⵢⵓⵔ ⵉⵎⵙⴰⵔ ⴱⴻⵍⵍⵉ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 21 “‘ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴻⵛⵛ ⴰⵔⵥⵉⵖ ⴰⵖⵉⵍ ⵏ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ. ⵅⵣⴰⵔ, ⵡⴰⵔ ⵜ ⵉⵊⴻⴱⴱⴰⵔ ⵓⵍⴰ ⴷ ⵉⵊⵊⴻⵏ ⵎⴰⵃⴻⵏⴷ ⴰⴷ ⵉⵜⵜⵡⴰⵙⵙⴳⴻⵏⴼⴰ, ⵡⴰⵔ ⵜ ⵜⵜⴻⵏⵏⴹⴻⵏ ⵙ ⴱⵉⵏⴷⴰⵜ ⴰⵍⴰⵎⵉ ⵣⵣⴰⵢⵙⴻⵏⵜ ⵜ ⵖⴰ ⵙⵙⵊⴻⵀⴷⴻⵏ, ⵃⵉⵎⴰ ⴰⴷ ⵉⵟⵟⴻⴼ ⵙⵙⵉⴼ ⵄⴰⵡⴻⴷ!’ 22 ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵅⵣⴰⵔ, ⵏⴻⵛⵛ ⵅ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵍⴰ, ⵓ ⵏⴻⵛⵛ ⴰⴷ ⴰⵔⵥⴻⵖ ⵉⵖⴰⴵⴻⵏ ⵏⵏⴻⵙ, ⴰⵎ ⵓⵖⵉⵍ ⵉⵊⴻⵀⴷⴻⵏ ⵄⴰⴷ ⴰⵎ ⵡⴻⵏⵏⵉ ⵉⵜⵜⵡⴰⵔⵥⵉⵏ. ⵏⴻⵛⵛ ⴰⴷ ⴰⵔⵔⴻⵖ ⵙⵙⵉⴼ ⵏⵏⴻⵙ ⴰⴷ ⵉⵡⴹⴰ ⵣⴻⴳ ⵓⴼⵓⵙ ⵏⵏⴻⵙ. 23 ⵏⴻⵛⵛ ⴰⴷ ⵣⵓⵣⵣⴰⵔⴻⵖ ⵉⵎⵉⵚⵔⵉⵢⵢⴻⵏ ⵊⴰⵔ ⵍⴻⴳⵏⵓⵙ ⵓ ⴰⴷ ⵜⴻⵏ ⴱⴻⵣⵣⵄⴻⵖ ⵅ ⵜⴻⵎⵎⵓⵔⴰ. 24 ⵏⴻⵛⵛ ⴰⴷ ⵙⵙⵊⴻⵀⴷⴻⵖ ⵉⵖⴰⴵⴻⵏ ⵏ ⵓⵊⴻⴵⵉⴷ ⵏ ⴱⴰⴱⵉⵍ ⵓⵛⴰ ⴰⴷ ⵡⵛⴻⵖ ⵙⵙⵉⴼ ⵉⵏⵓ ⴷⴻⴳ ⵓⴼⵓⵙ ⵏⵏⴻⵙ, ⵎⴰⵛⴰ ⵉⵖⴰⴵⴻⵏ ⵏ ⴼⵉⵔⵄⵓⵏ ⴰⴷ ⵜⴻⵏ ⴰⵔⵥⴻⵖ, ⴰⵍⴰⵎⵉ ⵉ ⵖⴰ ⵉⵙⵖⵓⵢ ⴰⵎ ⵉⵙⵖⵓⵢⵢⵓ ⵡⴻⵏⵏⵉ ⵉⵙⵙⵏⵓⵇⴱⴻⵏ. 25 ⵡⴰⵀ ⵏⴻⵛⵛ ⴰⴷ ⵙⵙⵊⴻⵀⴷⴻⵖ ⵉⵖⴰⴵⴻⵏ ⵏ ⵓⵊⴻⴵⵉⴷ ⵏ ⴱⴰⴱⵉⵍ, ⵎⴰⵛⴰ ⵉⵖⴰⴵⴻⵏ ⵏ ⴼⵉⵔⵄⵓⵏ ⴰⴷ ⵡⴹⴰⵏ. ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⵅⵎⵉ ⵖⴰ ⴳⴳⴻⵖ ⵙⵙⵉⴼ ⵉⵏⵓ ⴷⴻⴳ ⵓⴼⵓⵙ ⵏ ⵓⵊⴻⴵⵉⴷ ⵏ ⴱⴰⴱⵉⵍ ⵓ ⵏⴻⵜⵜⴰ ⴰⴷ ⵜ ⵉⵙⵙⵡⵉⵥⵥⴻⴹ ⵅ ⵜⴻⵎⵎⵓⵔⵜ ⵏ ⵎⵉⵚⵔⴰ. 26 ⵏⴻⵛⵛ ⴰⴷ ⵣⵓⵣⵣⴰⵔⴻⵖ ⵉⵎⵉⵚⵔⵉⵢⵢⴻⵏ ⵊⴰⵔ ⵍⴻⴳⵏⵓⵙ, ⴰⴷ ⵜⴻⵏ ⴱⴻⵣⵣⵄⴻⵖ ⵅ ⵜⴻⵎⵎⵓⵔⴰ. ⴰⵎⵎⵓ ⵉ ⵖⴰ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’"