ⵃⵓⵛⵉⵄⴰ 14
TTI1 “ⵙⴰⵎⴰⵔⵢⴰ ⴰⴷ ⵜᵉⵟⵟⴻⴼ ⴰⵅⴻⴵⴻⵚ, ⵎⵉⵏⵣⵉ ⵜⵖⴻⵡⵡⴻⵖ ⵅ ⴰⵔⴻⴱⴱⵉ ⵏⵏⴻⵙ. ⴰⴷ ⵡⴹⴰⵏ ⵙ ⵙⵙⵉⴼ. ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⵏⵙⴻⵏ ⴰⴷ ⵜⵜⵡⴰⵍⴻⴱⵣⴻⵏ ⵓ ⵜⵉⵎⵖⴰⵔⵉⵏ ⵏⵙⴻⵏ ⵙ ⴷⴷⴻⵢⵙⴻⵜ ⴰⴷ ⵜⵜⵡⴰⵛⴰⵔⵔⴳⴻⵏⵜ. 2 ⴰ ⵉⵙⵔⴰⵉⵍ, ⴷⵡⴻⵍ-ⴷⴷ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵎⴰⵖⴰⵔ ⵜⴻⵏⴷⴻⵔⴼⴻⴷ ⵙ ⵍⵎⵓⵄⵚⵉⵢⵢⴻⵜ ⵏⵏⴻⵛ. 3 ⴽⵙⵉⵎ ⴰⵡⴰⵍⴻⵏ-ⴰ ⵏ ⵜⵜⵓⴱⴻⵜ ⴰⴽⵉⴷⵡⴻⵎ ⵓ ⴷⴻⵡⵍⴻⵎ-ⴷⴷ ⵖⴰⵔ ⵙⵉⴷⵉ. ⵉⵏⵉⵎ ⴰⵙ: ⴽⵙⵉ ⵅⴰⵏⴻⵖ ⵍⵎⵓⵄⵚⵉⵢⵢⴻⵜ ⵎⴰⵔⵔⴰ ⵓ ⵇⴱⴻⵍ ⵣⵣⴰⵢⵏⴻⵖ ⵎⵉⵏ ⵉⵛⵏⴰⵏ, ⵅⴻⵏⵏⵉ ⴰⴷ ⵏⴰⵡⵉ ⵙ ⵜⵉⴷⴻⵜⵜ ⵉⴼⵓⵏⴰⵙⴻⵏ ⴷ ⵜⴰⴹⵃⵉⵢⴻⵜ ⵄⵍⴰⵃⵙⴰⴱ ⵍⵡⵓⵄⵓⴷ ⵏ ⵉⵢⴻⵏⵛⵉⵛⴻⵏ ⵏⵏⴻⵖ. 4 ⴰⵛⵛⵓⵔ ⵡⴰⵔ ⴷ ⴰⵏⴻⵖ ⵉⵙⵙⴻⵏⵊⴰⵎ, ⵡⴰⵔ ⵏⴻⴳⴳⵓⵔ ⵅ ⵢⴻⵢⵙⴰⵏ ⵓ ⵡⴰⵔ ⵏⴻⵇⵇⴰⵔ ⵉ ⵜⵎⴻⴳⴳⴰ ⵏ ⵉⴼⴰⵙⵙⴻⵏ ⵏⵏⴻⵖ: ‘ⴰⵔⴻⴱⴱⵉ ⵏⵏⴻⵖ’, ⵎⴰⵖⴰⵔ ⵣⵣⴰⵢⴻⴽ ⵉ ⵖⴰ ⵉⵜⵜⵡⴰⵔⵃⴻⵎ ⵓⵢⵓⵊⵉⵍ.’" 5 “ⵏⴻⵛⵛ ⴰⴷ ⵜⴻⵏ ⵙⵙⴳⴻⵏⴼⵉⵖ ⵣⵉ ⵜⵖⴻⵏⵏⴰⵏⵜ ⵏⵙⴻⵏ, ⴰⴷ ⵜⴻⵏ ⵜⵜⴻⵅⵙⴻⵖ ⵙ ⵍⵅⴰⴹⴰⵔ, ⵎⴰⵖⴰⵔ ⴰⵖⴹⴰⴱ ⵉⵏⵓ ⵉⵃⴻⵢⵢⴻⴷ ⵅⴰⵙ. 6 ⵏⴻⵛⵛ ⴰⴷ ⵉⵍⵉⵖ ⵉ ⵉⵙⵔⴰⵉⵍ ⴰⵎ ⵏⵏⴷⴰ. ⵏⴻⵜⵜⴰ ⴰⴷ ⵉⵏⵓⵡⵡⴰⵔ ⴰⵎ ⵜⵏⴻⵡⵡⴰⵛⵜ ⵏ ⵜⴻⵍⵍⵉⵍⵉⵛⵜ, ⴰⴷ ⵉⵡⵡⴻⵜ ⵉⵙⵔⴰⵉⵍ ⵉⵥⴻⵡⵔⴰⵏ ⵏⵏⴻⵙ ⴰⵎ ⵉⴷⵓⵔⴰⵔ ⵏ ⵍⵓⴱⵏⴰⵏ. 7 ⵍⴻⴼⵔⵓⵄ ⵏⵏⴻⵙ ⴰⴷ ⵣⵣⵓⴳⴳⴰⵔⵜⴻⵏ ⵓ ⴰⵡⴻⵇⵇⴰⵔ ⵏⵏⴻⵙ ⴰⴷ ⵢⵉⵍⵉ ⴰⵎ ⵓⵣⴻⵎⵎⵓⵔ ⵓ ⵍⴻⴼⵡⴰⵃ ⵏⵏⴻⵙ ⴰⵎ ⵍⴻⴼⵡⴰⵃ ⵏ ⵜⵛⴻⵊⵊⵓⵔⴰ ⵅ ⵉⴷⵓⵔⴰⵔ ⵏ ⵍⵓⴱⵏⴰⵏ. 8 ⵏⵉⵜⵏⵉ ⴰⴷ ⴷⴷ-ⴷⴻⵡⵍⴻⵏ, ⴰⴷ ⵇⵇⵉⵎⴻⵏ ⴷⵉ ⵜⵉⵍⵉ ⵏⵏⴻⵙ, ⴰⴷ ⵙⵙⴻⴷⴷⴰⵔⴻⵏ ⵉⵎⴻⵏⴷⵉ, ⴰⴷ ⵏⴻⵡⵡⴰⵔⴻⵏ ⴰⵎ ⵜⵣⴰⵢⴰⵔⵜ. ⵍⵉⴷⴰⵔⴻⵜ ⵏⵏⴻⵙ ⴰⴷ ⵜⵉⵍⵉ ⴰⵅⵎⵉ ⴱⵉⵏⵓ ⵏ ⵍⵓⴱⵏⴰⵏ. 9 ⴰ ⵉⴼⵔⴰⵢⵉⵎ ⴰⴷ ⵢⵉⵏⵉ: ‘ⵎⵉⵏ ⵖⴰⵔⵉ ⵄⴰⴷ ⴰⴽ-ⴷ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ?’ ⵏⴻⵛⵛ ⵙⵍⵉⵖ ⴰⵙ ⵓ ⴰⴷ ⵅⴰⵙ ⵙⵙⵉⵊⵊⴻⵖ. ⴰⴷ ⵉⵍⵉⵖ ⴰⵎ ⵢⵉⵛⵜ ⵏ ⵜⵛⴻⵊⵊⴰⵔⵜ ⵏ ⵓⵎⴻⵔⵣⵉ ⴰⵣⵉⵣⴰ, ⵣⵣⴰⵢⵉ ⵉ ⵜᵉⵜⵜⵡⴰⴼ ⵍⵖⵉⴵⴻⵜ ⵏⵏⴻⵛ." 10 “ⵎⴰⵏ ⵡⴻⵏ ⵉⴵⴰⵏ ⴷ ⴰⵎⵉⵖⵉⵙ ⴷ ⴰⴼⴻⵀⵀⴰⵎ ⴷⵉ ⵜⵎⴻⵙⵍⴰⵢⵉⵏ-ⴰ, ⵎⴰⵏ ⵡⴻⵏ ⵉ ⵖⴰⵔ ⵜⴻⴵⴰ ⵍⴻⴼⵀⴰⵎⴻⵜ ⵓ ⵎⴰⵏ ⵡⴻⵏ ⵉ ⵜⴻⵏⵜ ⵉⵙⵙⵏⴻⵏ? ⵡⴰⵀ, ⵉⴱⵔⵉⴷⴻⵏ ⵏ ⵙⵉⴷⵉ ⵏⵉⵛⴰⵏ ⵉ ⵢⴻⴵⴰⵏ ⵓ ⵉⵎⵙⴻⴳⴳⴰⴷⴻⵏ ⴰⴷ ⴷⴰⵢⵙⴻⵏ ⵓⵢⵓⵔⴻⵏ, ⵎⴰⵛⴰ ⵉⵏⵏⵉ ⵉⵄⴻⴷⴷⴰⵏ ⴰⴷ ⴷⴰⵢⵙⴻⵏ ⵏⵏⴷⴻⵔⴼⴻⵏ."