ⵢⴰⵄⵇⵓⴱ 5

1 ⵉⵡⴰ ⴽⴻⵏⵏⵉⵡ, ⴰ ⴰⵢⵜⴱⴰⴱ ⵏ ⵡⴰⴳⵍⴰ, ⵙⵃⵉⵙⵙⴼⴻⵎ, ⵔⵓⵎ ⵉ ⵍⵎⵓⵚⵉⴱⴰⵜ ⵉ ⴽⴻⵏⵏⵉⵡ ⵉⵜⵜⵔⴰⵊⴰⵏ. 2 ⵎⵉⵏⵣⵉ ⴰⴳⵍⴰ ⵏⵡⴻⵎ ⴰⵇⴰ ⵉⵖⵓⵎⵎ, ⵢⴰⵔⵚⵓⴹ, ⵓⵛⴰ ⴰⵔⵔⵓⴹ ⵏⵡⴻⵎ ⵛⵛⵉⵏ ⵜ ⵜⵛⵉⵏⴷⴰ, 3 ⵓⵔⴻⵖ ⵏⵡⴻⵎ ⴷ ⵏⵏⵓⵇⴰⵔⵜ ⵏⵡⴻⵎ ⴰⵇⴰ ⴰⵔⵛⴰⵏ ⵓⵛⴰ ⴰⵔⴻⵛⵛⵉ ⵏⵙⴻⵏ ⴰⴷ ⵅⴰⵡⴻⵎ ⵜⴻⵛⵀⴻⴷ, ⴰⴷ ⵉⵛⵛ ⴷⴷⴰⵜ ⵏⵡⴻⵎ ⴰⵎ ⵜⵎⴻⵙⵙⵉ. ⴰⵇⴰ ⴽⴻⵏⵏⵉⵡ ⵜⴻⵢⵔⵓⵎ ⵜⵉⵎⴻⵙⵙⵉ ⵉ ⵢⵉⵅⴻⴼ ⵏⵡⴻⵎ ⵉ ⵡⵓⵙⵙⴰⵏ ⵉⵏⴻⴳⴳⵓⵔⴰ. 4 ⵅⵣⴰⵔ, ⵍⵎⵓⵏⴻⵜ ⵏ ⵉⵛⴻⵡⵡⴰⵍⴻⵏ ⵏⵏⵉ ⵜⴻⵙⵙⵄⵉⵣⵣⴻⵎ ⵅ ⵢⴻⵏⵏⵉ ⵉⵎⵊⴰⵔⴻⵏ ⵉⵢⵢⴰⵔⴻⵏ ⵏⵡⴻⵎ ⵜⴻⵙⵖⵓⵢⵢⵓ, ⵓⵛⴰ ⵜⵖⵓⵢⵢⵉⵜ ⵏ ⵢⵉⵏⵏⵉ ⵉⵎⵊⴰⵔⴻⵏ ⵜⵉⵡⴻⴹ ⴰⵙ-ⴷⴷ ⴰⵍ ⵉⵎⴻⵣⵣⵓⵖⴻⵏ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. 5 ⴰⵇⴰ ⴽⴻⵏⵏⵉⵡ ⵜⴼⴻⵢⵢⵛⴻⵎ ⵅ ⵜⴻⵎⵎⵓⵔⵜ, ⵜⴻⴹⴼⴰⵔⴻⵎ ⵎⴻⵥⵔⵉ ⵏⵡⴻⵎ. ⴰⵇⴰ ⵜⴻⵙⵙⵊⵉⵡⵏⴻⵎ ⴰⵔⵔⵉⵎⴰⵜ ⵏⵡⴻⵎ ⴰⵎ ⴷⴻⴳ ⵡⴰⵙⵙ ⵏ ⵜⵖⴰⵔⵚⵉⵜ. 6 ⴰⵇⴰ ⴽⴻⵏⵏⵉⵡ ⵜⵃⴻⴽⵎⴻⵎ ⵅ ⵓⵎⵙⴻⴳⴳⴰⴷ ⵙ ⵍⵎⴻⵡⵜ, ⴰⵎ ⵏⴻⵜⵜⴰ ⵡⴰⵔ ⵅⴰⵡⴻⵎ ⵉⵎⵎⵄⴰⵍⴰ ⵛⴰ. ⵚⵚⴱⴰⵔ ⴷⵉ ⵜⴰⵎⴰⵔⴰ ⵓ ⴷⴻⴳ ⵓⵡⴻⴷⴷⴻⴱ 7 ⵎⴰⵛⴰ ⴽⴻⵏⵏⵉⵡ, ⴰ ⴰⵢⵜⵎⴰ, ⵚⴱⴰⵔⴻⵎ ⴰⵍ ⴷⴷ ⵖⴰ ⵢⴰⵙ ⵙⵉⴷⵉ, ⴰⵎ ⵎⴰⵎⵎⴻⵛ ⵉⵜⵜⵔⴰⵊⴰ ⵓⴼⴻⴵⴰⵃ ⵖⴰⵔ ⵍⵖⵉⴵⴻⵜ ⵉⵖⵍⴰⵏ ⵏ ⵜⴻⵎⵎⵓⵔⵜ, ⵉⵚⴱⴰⵔ ⵙ ⵍⵅⴰⴹⴰⵔ ⴰⵍ ⵅⴰⵙ ⵉⵡⵡⴻⵜ ⵡⴻⵏⵥⴰⵔ ⵏ ⵣⵉⵛ ⴷ ⵓⵏⴻⴳⴳⴰⵔ. 8 ⵓⵍⴰ ⴷ ⴽⴻⵏⵏⵉⵡ, ⵚⴱⴰⵔⴻⵎ, ⵙⵎⴻⵃⵃⴷⴻⵎ ⵓⵍⴰⵡⴻⵏ ⵏⵡⴻⵎ, ⴰⵇⴰ ⵜⴰⵡⴰⵙⵉⵜ ⵏ ⵙⵉⴷⵉⵜⵏⴻⵖ ⵜⵓⴷⴻⵙ-ⴷⴷ. 9 ⴰ ⴰⵢⵜⵎⴰ, ⵡⴰⵔ ⵜⵙⵓⴹⴻⵎ ⵅ ⵡⴰⵢⴰⵡⵢⴰ, ⵃⵉⵎⴰ ⵡⴰⵔ ⵖⴰⵔⵡⴻⵎ ⴷⴷ-ⵉⵜⵜⵉⴽⴽⵡⵉⴹ ⵍⵃⵓⴽⵎ. ⵎⴰⵖⴰⵔ ⵅⵣⴰⵔ, ⵍⵇⴰⴹⵉ ⵉⴱⴻⴷⴷ ⵖⴰⵔ ⵜⴻⵡⵡⴰⵔⵜ. 10 ⴰ ⴰⵢⵜⵎⴰ, ⵎⵇⵓⴷⴷⴰⵎ ⴰⴽ-ⴷ ⵉⵏⴰⴱⵉⵢⵢⴻⵏ ⵉⵏⵏⵉ ⵜⵓⵖⴰ ⵉⵙⵙⵉⵡⵍⴻⵏ ⵙ ⵢⵉⵙⴻⵎ ⵏ ⵙⵉⴷⵉ ⵎⴰⵃⴻⵏⴷ ⴰⴷ ⵜⴻⵚⴱⴰⵔⴻⵎ ⴷⵉ ⵍⴻⵃⵚⴰⵔⴰⵜ ⵏⵡⴻⵎ. 11 ⵅⵣⴰⵔⴻⵎ, ⴰⴷ ⵏⴱⴰⵔⴻⴽ ⵉⵏⵏⵉ ⵉⵜⵜⵚⴻⴱⴱⴰⵔⴻⵏ. ⴰⵇⴰ ⴽⴻⵏⵏⵉⵡ ⵜⴻⵙⵍⴰⵎ ⵅ ⵚⵚⴱⴰⵔ ⵏ ⴰⵢⵓⴱ ⵓⵛⴰ ⵜⵡⴰⵍⴰⵎ ⵍⵖⵉⴵⴻⵜ ⵜⴻⵏⵏⵉ ⴷ ⴰⵙ ⵉⴳⴳⴰ ⵙⵉⴷⵉ, ⵎⴰⵖⴰⵔ ⵙⵉⴷⵉ ⴷ ⴰⵔⵃⵉⵎ ⴷ ⴰⵃⵏⵉⵏ. ⵟⵉⵡⴻⵚⵚⴰ ⵜⵉⵏⴻⴳⴳⵓⵔⴰ 12 ⴰⵎⴻⵣⵡⴰⵔⵓ ⵏ ⵎⴰⵔⵔⴰ, ⴰ ⴰⵢⵜⵎⴰ, ⵡⴰⵔ ⵜⵜⵊⴰⴵⴰⵎ ⵛⴰ, ⵍⴰ ⵖⴰⵔ ⵓⵊⴻⵏⵏⴰ ⵍⴰ ⵖⴰⵔ ⵜⴻⵎⵎⵓⵔⵜ ⵓⵛⴰ ⵓⵍⴰ ⴷ ⵉⵛⵜ ⵏ ⵜⵊⴰⴵⵉⵜ ⵏⵏⴻⵖⵏⵉ. ⴰⴷ ⵖⴰⵔⵡⴻⵎ ⵢⵉⵍⵉ ‘ⵡⴰⵀ!’ ⵏⵡⴻⵎ ⴷ ‘ⵡⴰⵀ!’, ⴷ ‘ⵍⵍⴰ!’ ⵏⵡⴻⵎ ⴷ ‘ⵍⵍⴰ!’, ⵏⵉⵖ ⴰⵇⴰ ⴰⴷ ⵜⵉⵍⵉⵎ ⵙⴰⴷⵓ ⵍⵃⵓⴽⵎ. 13 ⵎⴰ ⴰⵇⴰ ⴷⵉⵏ ⵛⴰ ⵏ ⵉⵊⵊⴻⵏ ⵊⴰⵔ ⴰⵡⴻⵎ ⵉⵡⴻⴷⴷⴻⴱ? ⴻⵊⵊ ⵉ-ⵜ ⴰⴷ ⵉⵜⵜⴰⵔ. ⵎⴰ ⴰⵇⴰ ⴷⵉⵏ ⵛⴰ ⵏ ⵉⵊⵊⴻⵏ ⵉⴼⴰⵔⵃ? ⴻⵊⵊ ⵉ-ⵜ ⴰⴷ ⵉⵖⴻⵏⵏⴻⵊ ⵙ ⵉⵣⵍⴰⵏ ⵏ ⵓⵚⴻⴱⴱⴻⵃ. 14 ⵎⴰ ⴷⵉⵏ ⵊⴰⵔ ⴰⵡⴻⵎ ⵃⴻⴷ ⵉⵀⵍⴻⵛ? ⴻⵊⵊ ⵉ-ⵜ ⴰⴷ ⴷⴷ-ⵉⵍⴰⵖⴰ ⵅ ⵉⵎⵖⴰⵔⴻⵏ ⵏ ⵜⵎⴻⵙⵎⵓⵏⵜ ⵖⴰⵔⴻⵙ, ⵃⵉⵎⴰ ⴰⴷ ⴰⵙ ⴽⵙⵉⵏ ⵙ ⵍⵎⴻⵄⵔⵓⴼ, ⴰⴷ ⵜ ⵔⴻⵜⴼⴻⵏ ⵙ ⵣⵣⴻⵛⵜ ⵏ ⵡⴻⴷⵀⴰⵏ ⵙ ⵢⵉⵙⴻⵎ ⵏ ⵙⵉⴷⵉⵜⵏⴻⵖ. 15 ⵓⵛⴰ ⵜⴰⵥⴰⴵⵉⵜ ⵏ ⵍ’ⵉⵎⴰⵏ ⴰⴷ ⵜⴻⵙⵙⴳⴻⵏⴼⴰ ⴰⵎⴻⵀⵍⵓⵛ ⵓⵛⴰ ⵙⵉⴷⵉⵜⵏⴻⵖ ⴰⴷ ⵜ ⵉⵙⵙⵏⴻⴽⴽⴰⵔ. ⵓⵛⴰ ⵎⴰⵍⴰ ⵜⵓⵖⴰ ⵉⵜⵜⴻⴳⴳ ⴷⴷⵏⵓⴱ, ⴰⴷ ⴰⵙ ⵜⵜⵡⴰⵖⴼⴰⵔⴻⵏ. 16 ⵏⴻⵄⵎⴻⵎ ⵉⵊⵊ ⵉ ⵡⴻⵏⵏⴻⵖⵏⵉ ⵙ ⵉⵄⴻⴷⵉⵢⵢⴻⵏ ⵏⵡⴻⵎ ⵓ ⵥⴰⴵⴻⵎ ⵉ ⵡⴰⵢⴰⵡⵢⴰ, ⵃⵉⵎⴰ ⴰⴷ ⵜᵉⵜⵜⵡⴰⵙⵙⴳⴻⵏⴼⴰⵎ, ⵎⴰⵖⴰⵔ ⵊⵊⴻⵀⴷ ⵏ ⵜⵥⴰⴵⵉⵜ ⵏ ⵓⵎⵙⴻⴳⴳⴰⴷ ⴰⵇⴰ-ⵜ ⴷ ⴰⵎⴻⵇⵇⵔⴰⵏ. 17 ⵉⵍⵉⵢⴰ ⵜⵓⵖⴰ ⴷ ⴱⵏⴰⴷⴻⵎ ⵉⵜⵜⴰⵛⴰ ⴰⵎ ⵏⴻⵛⵛⵉⵏ. ⵉⵥⵥⵓⴵ ⵃⵉⵎⴰ ⵡⴰⵔ ⵉⵛⵛⵉⵜ ⵡⴻⵏⵥⴰⵔ ⵅ ⵜⴻⵎⵎⵓⵔⵜ. ⵅⴻⵏⵏⵉ ⴰⵏⵥⴰⵔ ⵡⴰⵔ ⵉⵡⵜⵉ ⵛⴰ ⵅ ⵜⴻⵎⵎⵓⵔⵜ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴷ ⵙⴻⵜⵜⴰ ⵏ ⵉⵢⵓⵔⴻⵏ. 18 ⵓⵛⴰ ⵜⵓⵖⴰ ⵉⵥⵥⵓⴵ ⵄⴰⵡⴻⴷ, ⵍⴻⵅⴷⴻⵏⵏⵉ ⴰⵊⴻⵏⵏⴰ ⵉⵡⵜⴰ ⴰⵏⵥⴰⵔ ⵓⵛⴰ ⵜⴰⵎⵎⵓⵔⵜ ⵜⴻⵡⵛⴰ ⵚⵚⴰⴱⴻⵜ ⵏⵏⴻⵙ. 19 ⴰ ⴰⵢⵜⵎⴰ, ⵎⴰⵍⴰ ⴷⵉⵏ ⵃⴻⴷ ⵊⴰⵔ ⴰⵡⴻⵎ ⵉⴼⴼⴻⵖ ⵅ ⵡⴻⴱⵔⵉⴷ ⵏ ⵜⵉⴷⴻⵜⵜ ⵓⵛⴰ ⵛⴰ ⵏ ⵢⵉⵊⵊⴻⵏ ⵢⴰⵔⵔ ⵉ-ⵜ-ⵉ-ⴷⴷ ⴰⴷ ⴷⴷ-ⵉⴷⵡⴻⵍ ⵣⴻⴳ ⵓⵡⴻⴷⴷⴰⵔ ⵏⵏⴻⵙ, 20 ⴻⵊⵊ ⵉ-ⵜ ⴰⴷ ⵉⵙⵙⴻⵏ, ⴰⵇⴰ ⵡⴻⵏⵏⵉ ⴷⴷ ⵖⴰ ⵢⴰⵔⵔⴻⵏ ⴰⵎⴻⴷⵏⵓⴱ ⵣⴻⴳ ⵓⵡⴻⴷⴷⴰⵔ ⵏⵏⴻⵙ, ⴰⴷ ⵉⵙⵙⴻⵏⵊⴻⵎ ⵍⴻⵄⵎⴰⵔ ⵣⵉ ⵍⵎⴻⵡⵜ ⵓⵛⴰ ⴰⴷ ⵉⵙⵙⴷⵓⵔⵉⵢ ⴰⵟⵟⴰⵙ ⵏ ⴷⴷⵏⵓⴱ.