ⴰⵢⵓⴱ 13

1 ⵅⵣⴰⵔ, ⵇⴰⵄ ⵎⴰⵏ ⴰⵢⴰ ⵜⴻⵥⵔⴰ ⵉ-ⵜ ⵜⵉⵟⵟ ⵉⵏⵓ, ⵉⵙⵍⴰ ⵉ-ⵜ ⵓⵎⴻⵣⵣⵓⵖ ⵉⵏⵓ, ⵉⴼⵀⴻⵎ ⴰⵙ ⵎⵍⵉⵃ. 2 ⵎⵉⵏ ⵜⴻⵙⵙⵏⴻⵎ ⴽⴻⵏⵏⵉⵡ, ⵙⵙⵏⴻⵖ ⵜ ⵓⵍⴰ ⴷ ⵏⴻⵛⵛ, ⵡⴰⵔ ⵡⴻⵟⵟⵉⵖ ⵛⴰ ⴷⴻⴳ ⵓⵙⴻⵎⵇⵓⴷⴷⵉ ⴰⴽⵉⴷⵡⴻⵎ. 3 ⵎⴰⵛⴰ ⵏⴻⵛⵛ ⵅⵙⴻⵖ ⴰⴷ ⵙⵙⵉⵡⵍⴻⵖ ⵖⴰⵔ ⵓⵎⵣⴻⵎⵎⴰⵔ ⵅ ⴽⵓⵍⵛⵉ, ⵎⴻⵥⵔⴻⵖ ⴰⴷ ⵡⵜⴻⵖ ⵜⴰⵎⴻⵙⵍⴰⵛⵜ ⵉⵏⵓ ⵣⵣⴰⵜ ⵉ ⴰⵔⴻⴱⴱⵉ. 4 ⵎⴰⵛⴰ ⴽⴻⵏⵏⵉⵡ ⵜⴻⵙⵙⵓⴼⴼⵓⵖⴻⵎ ⵉⵅⴰⵔⵔⵉⵇⴻⵏ, ⵎⴰⵔⵔⴰ ⴽⴻⵏⵏⵉⵡ ⴷ ⵉⴹⴱⵉⴱⴻⵏ ⵉⵅⵡⴰⵏ. 5 ⴰⵅ, ⵎⵍⵉ ⵜⴻⵙⵙⴻⵖⴷⴻⵎ ⴽⴻⵏⵏⵉⵡ ⵎⴰⵔⵔⴰ! ⴰⵢⴰ ⴰⴷ ⵜⵉⵍⵉ ⴷ ⵜⵉⵖⵉⵜ ⵉ ⴽⴻⵏⵏⵉⵡ. 6 ⵙⵍⴻⵎ ⵅⴻⵏⵏⵉ ⵎⴰⵎⵎⴻⵛ ⵖⴰ ⵡⵜⴻⵖ ⵅ ⵢⵉⵅⴻⴼ ⵉⵏⵓ, ⵃⴻⴽⴽⴰⵔⴻⵎ ⵅ ⵓⵎⵛⴰⵔⵔⴰⵄ ⵏ ⵉⵢⴻⵏⵛⵉⵛⴻⵏ ⵉⵏⵓ! 7 ⵎⴰ ⵜⴻⵅⵙⴻⵎ ⴰⴷ ⵜⵉⵏⵉⵎ ⵍⵖⴻⵛⵛ ⵉ ⵍⴻⴼⴹⴻⵍ ⵏ ⴰⵔⴻⴱⴱⵉ, ⵎⴰ ⵜⴻⵅⵙⴻⵎ ⴰⴷ ⵜⴻⵙⵙⵉⵡⵍⴻⵎ ⵉⵅⴰⵔⵔⵉⵇⴻⵏ ⴷⵉ ⵜⵉⵣⵉ ⵏⵏⴻⵙ? 8 ⵎⴰ ⵜⵣⴻⵎⵎⴰⵔⴻⵎ ⴰⴷ ⵜⴻⵡⵜⴻⵎ ⵜⴰⵎⴻⵙⵍⴰⵛⵜ ⴷⵉ ⵟⵟⵡⴻⵄ ⵏⵏⴻⵙ? ⵎⴰ ⵜⴻⵅⵙⴻⵎ ⴰⴷ ⵜⵛⴰⵔⵔⵄⴻⵎ ⵉ ⴰⵔⴻⴱⴱⵉ? 9 ⵎⴰ ⵎⵍⵉⵃ ⵉ ⴽⴻⵏⵏⵉⵡ, ⵎⴰⵍⴰ ⵏⴻⵜⵜⴰ ⴰⴷ ⴽⴻⵏⵏⵉⵡ ⵉⵇⴻⴵⴻⴱ? ⵎⴰ ⵜⴻⵅⵙⴻⵎ ⴰⴷ ⵣⵣⴰⵢⴻⵙ ⵜⴻⵙⵜⴻⵀⵣⴰⵎ ⴰⵎ ⵎⴰⵎⵎⴻⵛ ⵙⵜᵉⵀⴻⵣⵣⴰⵏ ⵉⵡⴷⴰⵏ ⵣⴻⴳ ⵉⵊⵊ ⵏ ⴱⵏⴰⴷⴻⵎ? 10 ⵏⴻⵜⵜⴰ ⴰⴷ ⴽⴻⵏⵏⵉⵡ ⵉⵡⴻⴱⴱⴻⵅ, ⵎⴰⵍⴰ ⴽⴻⵏⵏⵉⵡ ⵜᵉⵜⵜⴻⴳⴳⴻⵎ ⵙ ⵡⵓⴷⵎⴰⵡⴻⵏ ⵙ ⵜⵏⵓⴼⴼⵔⴰ. 11 ⵎⴰ ⵡⴰⵔ ⴽⴻⵏⵏⵉⵡ ⵉⵙⵙⵏⴻⵅⵍⵉⵄ ⵓⵄⵓⴵⵉ ⵏⵏⴻⵙ, ⵎⴰ ⵡⴰⵔ ⴷⴷ ⵅⴰⵡⴻⵎ ⵜⵡⴻⵟⵟⵉ ⵜⵉⴳⴳⵯⵓⴷⵉ ⵣⵣⴰⵢⴻⵙ? 12 ⴰⵡⴰⵍⴻⵏ ⵏⵡⴻⵎ ⵉ ⵍⵉⴷⴰⵔⴻⵜ ⴰⵇⴰ ⴰⵜⴻⵏ ⴷ ⵍⴻⵎⵜⵓⵍ ⵏ ⵡⴰⵍⵓ, ⵍⴻⴳⵄⵓⴷⵉ ⵏⵡⴻⵎ ⴷ ⵍⴻⴳⵄⵓⴷⵉ ⵏ ⵓⴱⴻⴵⴰⵄ. 13 ⵙⴻⵖⴷⴻⵎ ⵣⵣⴰⵜⵉ, ⵎⴰⵃⴻⵏⴷ ⴰⴷ ⵙⵙⵉⵡⵍⴻⵖ, ⴻⵊⵊ ⴰⴷ ⵅⴰⴼⵉ ⴷⴷ-ⵢⴰⵙ ⵎⵉⵏ ⵉ ⴷⴷ ⵖⴰ ⵢⴰⵙ. 14 ⵎⴰⵢⴻⵎⵎⵉ ⵖⴰ ⵟⵟⴼⴻⵖ ⴰⵢⵙⵓⵎ ⵏ ⴰⵔⵔⵉⵎⴻⵜ ⵉⵏⵓ ⵊⴰⵔ ⵜⴻⵖⵎⴰⵙ ⵉⵏⵓ, ⵎⴰⵢⴻⵎⵎⵉ ⵉ ⵖⴰ ⵟⵟⴼⴻⵖ ⵜⵓⴷⴰⵔⵜ ⵉⵏⵓ ⴷⴻⴳ ⵓⴼⵓⵙ ⵉⵏⵓ? 15 ⵅⵣⴰⵔ, ⵏⴻⵜⵜⴰ ⵉⵅⵙ ⴰⴷ ⴰⵢⵉ ⵉⵏⴻⵖ, ⵏⴻⵛⵛ ⴰⴷ ⵜ ⵔⴰⵊⵉⵖ, ⵎⴰⵛⴰ ⴰⴷ ⵡⵜⴻⵖ ⵅ ⵉⴱⵔⵉⴷⴻⵏ ⵉⵏⵓ ⵣⵣⴰⵜⴻⵙ. 16 ⴷ ⵡⴰ ⵉ ⴷ ⴰⵢⵉ ⵖⴰ ⵉⴷⵡⴻⵍ ⴷ ⴰⵙⴻⵏⵊⴻⵎ ⵉⵏⵓ, ⵎⴰⵛⴰ ⴰⵎⵏⴰⴼⴻⵇ ⵡⴰⵔ ⴷⴷ-ⵉⵜⵜⵉⵙ ⵣⵣⴰⵜ ⵉ ⵓⵖⴻⵎⴱⵓⴱ ⵏⵏⴻⵙ. 17 ⵙⵍⴻⵎ ⵎⵍⵉⵃ ⵖⴰⵔ ⵍⵀⴰⵔⴷ ⵉⵏⵓ, ⵙ ⵉⵎⴻⵣⵣⵓⵖⴻⵏ ⵢⴰⵔⴻⵣⵎⴻⵏ ⵖⴰⵔ ⵓⵛⴰⵔⵔⴻⵃ ⵉⵏⵓ. 18 ⵅⵣⴰⵔ, ⵏⴻⵛⵛ ⵉⵡⵢⴻⵖ ⴷⴷⴻⵄⵡⴻⵜ ⵙ ⵓⵙⴻⵜⵜⴻⴼ, ⵙⵙⵏⴻⵖ ⴰⴷ ⵜⵜⵡⴰⵙⴻⴳⴳⴷⴻⵖ. 19 ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ ⴰⴷ ⴽⵉⴷⵉ ⵉⵎⵛⴰⵔⵔⵄⴻⵏ? ⵅⴻⵏⵏⵉ ⴰⴷ ⵙⴻⵖⴷⴻⵖ ⴷⴻⵖⵢⴰ, ⴰⴷ ⵙⵙⵓⴼⴼⵖⴻⵖ ⴱⵓⵃⴱⴻⵍ. 20 ⵎⵖⵉⵔ ⵡⴰⵔ ⴷ ⴰⵢⵉ ⵜⵜⴻⴳⴳ ⵜⵏⴰⵢⴻⵏ ⵏ ⵍⴻⵃⵡⴰⵢⴻⵊ, ⵅⴻⵏⵏⵉ ⵡⴰⵔ ⵣⵣⴰⵢⴻⴽ ⵜⵜⵏⵓⴼⴼⴰⵔⵉⵖ: 21 ⴰⴼⵓⵙ ⵏⵏⴻⵛ ⵙⵉⴳⴳⵯⴻⵊ ⵉ-ⵜ ⵅⴰⴼⵉ, ⵡⴰⵔ ⴷ ⴰⵢⵉ ⵙⵏⴻⵅⵍⵉⵄ ⵙ ⵓⵀⵓⴷⴷⵉ ⵏⵏⴻⵛ! 22 ⵍⴰⵖⴰ ⵛⴻⴽ, ⵏⴻⵛⵛ ⴰⴷ ⵅⴰⴽ ⴷⴷ-ⴰⵔⵔⴻⵖ, ⵏⵉⵖ ⵏⴻⵛⵛ ⴰⴷ ⵙⵙⵉⵡⵍⴻⵖ ⵓ ⵛⴻⴽ ⴰⴷ ⵅⴰⴼⵉ ⴷⴷ-ⵜⴰⵔⵔⴻⴷ! 23 ⵎⴻⵛⵃⴰⵍ ⵅⴰⴼⵉ ⵏ ⵍⵎⵓⵄⵚⵉⵢⵢⴻⵜ ⴷ ⴷⴷⴻⵏⴱ? ⵙⵛⴻⵏ ⴰⵢⵉ ⴰⵅⴻⵟⵟⵓ ⵉⵏⵓ ⴷ ⴷⴷⴻⵏⴱ ⵉⵏⵓ. 24 ⵎⴰⵢⴻⵎⵎⵉ ⵜⴻⵙⵙⵏⵓⴼⴼⴰⵔⴻⴷ ⴰⵖⴻⵎⴱⵓⴱ ⵏⵏⴻⵛ, ⵜⵃⴻⵙⵙⴱⴻⴷ ⴰⵢⵉ ⴷ ⵍⴻⵄⴷⵓ ⵏⵏⴻⵛ? 25 ⵎⴰ ⵜⴻⵅⵙⴻⴷ ⴰⴷ ⵜⴻⵙⵙⴻⵏⵅⴻⵍⵄⴻⴷ ⵜⴰⴼⴰⵔⵛⵜ ⵉ ⵉⵄⴰⵔⵔⴻⵏ ⵓⵙⴻⵎⵎⵉⴹ ⵙⵙⴰ ⵖⴰⵔ ⴷⴰ, ⵎⴰ ⵜⴻⵅⵙⴻⴷ ⴰⴷ ⵜⴻⴹⴼⴰⵔⴻⴷ ⵉⵖⴻⴵ ⵢⵓⵥⵖⴻⵏ? 26 ⵎⴰⵖⴰⵔ ⵜᵉⵜⵜⴰⵔⵉⴷ ⵅⴰⴼⵉ ⵜⵉⵎⴻⵙⵍⴰⵢⵉⵏ ⵜⵉⵎⴰⵔⵣⴰⴳⵉⵏ, ⵜⴱⴻⵟⵟⵉⴷ ⴰⵢⵉ ⴷⴷⵏⵓⴱ ⵏ ⵜⴻⵎⵥⵉ ⵉⵏⵓ. 27 ⵜⴻⵙⵙⵔⵓⵙⵉⴷ ⵉⴹⴰⵔⴻⵏ ⵉⵏⵓ ⴷⴻⴳ ⵓⴽⴻⵛⵛⵓⴹ, ⵛⴻⴽ ⵜⵃⴻⵟⵟⵉⴷ ⵎⴰⵔⵔⴰ ⵉⵎⴻⵙⵔⴰⵇ ⵉⵏⵓ. ⵜⵃⴻⵟⵟⵉⴷ ⵜⵉⵍⴻⵇⵇⴰ ⵏ ⵉⴹⴰⵔⴻⵏ ⵉⵏⵓ, 28 ⵏ ⵡⴻⵏⵏⵉ ⵉⴳⴳⵉⵏ ⴰⵎ ⵓⴽⴻⵛⵛⵓⴹ, ⵛⵛⵉⵏ ⵜ ⵉⴽⴻⵛⵛⴰⵡⴻⵏ, ⵅⴻⵏⵏⵉ ⵢⴰⵔⴻⵛⵛⴰ, ⴰⵎ ⵡⴰⵔⵔⵓⴹ ⵉⵛⵛⴰ ⵉ-ⵜ ⵜⵛⵉⵏⴷⴰ.