ⴰⵢⵓⴱ 17

1 ⴱⵓⵃⴱⴻⵍ ⵉⵏⵓ ⵢⴰⵔⵊⴻⴼ, ⵓⵙⵙⴰⵏ ⵉⵏⵓ ⵉⵏⴻⴳⴳⵓⵔⴰ ⵅⴻⵙⵢⴻⵏ, ⵎⵖⵉⵔ ⵉⵎⴻⴹⵍⴰⵏ ⴷ ⴰⵢⵉ ⵉⵇⵇⵉⵎⴻⵏ. 2 ⵙ ⵜⵉⴷⴻⵜⵜ, ⵉⵏⵏⵉ ⵉⵙⵜⴻⵀⵣⴰⵏ ⴰⵇⴰ ⴰⵜⴻⵏ ⵖⴰⵔⵉ, ⵓ ⵜⵉⵟⵟ ⵉⵏⵓ ⵜⴻⵙⵙⵄⴻⴷⴷⵓ ⴵⵉⵍⴻⵜ ⵊⴰⵔ ⵉⵅⴰⵔⵔⵉⵚⴻⵏ ⵏⵙⴻⵏ ⵉⵎⴰⵔⵣⴰⴳⴻⵏ! 3 ⴻⴳⴳ ⵉⵅⴻⴼ ⵏⵏⴻⵛ ⴷ ⴰⴹⵎⴰⵏ ⵉ ⵏⴻⵛⵛ ⴷⵉⵏ ⵖⴰⵔⴻⴽ. ⵎⴰⵏ ⵡⴻⵏ ⵅⴻⵏⵏⵉ ⵉ ⵖⴰ ⵉⵡⵜⴻⵏ ⴰⴼⵓⵙ ⵏⵏⴻⵙ ⴷⴻⴳ ⵓⴼⵓⵙ ⵉⵏⵓ ⵉ ⵎⴰⵏ ⴰⵢⴰ? 4 ⵎⴰⵖⴰⵔ ⵛⴻⴽ ⵜⴻⴽⴽⵙⴻⴷ ⵎⴰⵔⵔⴰ ⵍⴻⴼⵀⴰⵎⴻⵜ ⵅ ⵡⵓⵍ ⵏⵙⴻⵏ, ⵅ ⵓⵢⴰ ⵛⴻⴽ ⵡⴰⵔ ⵜⴻⵏ ⵜⴻⵙⵙⵄⵓⴵⵉⴷ ⵛⴰ. 5 ⵡⵉ ⵖⴰ ⵉⵖⴷⴰⵔⴻⵏ ⵉⵎⴻⴷⴷⵓⴽⴽⴰⵍ ⵏⵏⴻⵙ ⴷⵉ ⵟⵟⵡⴻⵄ ⵏ ⵜⴽⴻⵛⵛⴰⴹⵜ, ⵜⵉⵟⵟⴰⵡⵉⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴷ ⵏⵄⴻⴷⵎⴻⵏⵜ. 6 ⵏⴻⵜⵜⴰ ⵉⴳⴳⴰ ⴰⵢⵉ ⴷ ⵍⵎⴰⵜⴰⵍ ⵊⴰⵔ ⵍⴻⴳⵏⵓⵙ, ⴰⵍⴰⵎⵉ ⴷⴻⵡⵍⴻⵖ ⴰⵎ ⵢⵉⵊⵊⴻⵏ ⵙⵙⵓⵙⵓⴼⴻⵏ ⴰⵙ ⵅ ⵓⵖⴻⵎⴱⵓⴱ. 7 ⵙ ⵓⵢⴰ ⵉ ⵜⴻⵄⵎⴻⵛ ⵜⵉⵟⵟ ⵉⵏⵓ ⵣⴻⴳ ⵡⴻⵛⴹⴰⵏ, ⵎⴰⵔⵔⴰ ⵉⵖⴻⵣⴷⵉⵙⴻⵏ ⵉⵏⵓ ⴰⵇⴰ ⴰⵜⴻⵏ ⴰⵎ ⵜⵉⵍⵉ. 8 ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵜⵜⵏⴻⵅⵍⴰⵄⴻⵏ ⵣⵉ ⵎⴰⵏ ⴰⵢⴰ, ⴰⵎⴻⵣⴷⴰⴳ ⵉⵜⵜⵏⴻⵇⵍⴰⴱ ⵅ ⵓⵎⵏⴰⴼⴻⵇ. 9 ⴰⵎⵙⴻⴳⴳⴻⴷ ⵉⵎⴻⵏⵏⴻⵄ ⴷⴻⴳ ⵡⴻⴱⵔⵉⴷ ⵏⵏⴻⵙ, ⵡⴻⵏⵏⵉ ⵖⴰⵔ ⵉⴵⴰ ⵉⴼⴰⵙⵙⴻⵏ ⵉⵎⴻⵣⴷⴰⴳⴻⵏ, ⵢⴰⵔⴻⵏⵏⵉ ⴷⵉ ⵊⵊⵀⴻⴷ. 10 ⵎⴰⵛⴰ ⵎⴰⵔⵔⴰ ⴽⴻⵏⵏⵉⵡ, ⴷⴻⵡⵍⴻⵎ-ⴷⴷ, ⴰⵙⴻⵜⵜⵉⵡ-ⴷⴷ ⴷⴰ, ⵎⴰⵖⴰⵔ ⵡⴰⵔ ⵓⴼⵉⵖ ⵓⵍⴰ ⴷ ⵉⵊⵊ ⵏ ⵓⵎⵉⵖⵉⵙ ⵊⴰⵔ ⴰⵡⴻⵎ. 11 ⵄⴷⵓⵏ ⵡⵓⵙⵙⴰⵏ ⵉⵏⵓ, ⵜⵜⵡⴰⵇⴻⴹⵄⴻⵏ ⵉⵏⵡⴰⵢⴻⵏ ⵉⵏⵓ, ⵎⴰⵔⵔⴰ ⵎⴻⵥⵔⵉ ⵏ ⵡⵓⵍ ⵉⵏⵓ. 12 ⴵⵉⵍⴻⵜ ⵜⵜⴻⴳⴳⴻⵏ ⵜⵜ ⴷ ⴰⵙⵙ, ⵇⵇⴰⵔⴻⵏ: ⴰⵇⴰ ⵜⴰⴼⴰⵡⵜ ⵜᵉⵜⵜⴰⴷⴻⵙ-ⴷⴷ ⵅⵎⵉ ⴷⴷ ⵖⴰ ⵜⴻⵡⴹⴰ ⵜⴰⴵⴻⵙⵜ. 13 ⵎⴰⵍⴰ ⵙⵙⵉⵜⵎⴻⵖ ⵄⴰⴷ, ⵙⵙⵉⵜⵉⵎⴻⵖ ⴰⵇⴰ ⵍⴰⵅⴰⵔⵜ ⴰⴷ ⵜⵉⵍⵉ ⴷ ⵜⴰⴷⴷⴰⵔⵜ ⵉⵏⵓ, ⴰⴷ ⴱⴻⵣⵣⵄⴻⵖ ⵜⴰⵙⵙⵓⵜ ⵉⵏⵓ ⴷⵉ ⵜⴰⴵⴻⵙⵜ. 14 ⵖⴰⵔ ⵡⴻⵃⴼⵓⵔ ⵏ ⵜⵓⵔⵚⵓⴹⵉ ⵍⴰⵖⵉⵖ: ‘ⵛⴻⴽ ⴷ ⴱⴰⴱⴰ!’, ⵖⴰⵔ ⵉⴽⴻⵛⵛⴰ: ‘ⵢⴻⵎⵎⴰ!’ ⴷ: ‘ⵓⵍⵜⵎⴰ!’ 15 ⵎⴰⵏⵉ ⵉⴵⴰ ⵅⴻⵏⵏⵉ ⵍⴰⵢⴰⵙ ⵉⵏⵓ? ⵍⴰⵢⴰⵙ ⵉⵏⵓ, ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ ⴰⴷ ⵜ ⵉⵥⴰⵔ? 16 ⴰⴷ ⵀⵡⴰⵏ ⵖⴰⵔ ⵟⵟⵔⵓⴼⴰ ⵏ ⵍⴰⵅⴰⵔⵜ, ⵅⵎⵉ ⵉ ⵖⴰ ⵏⴰⴼ ⵏⵎⵓⵏ ⴰⵔⵔⴰⵃⴻⵜ ⴷⴻⴳ ⵓⵛⴰⵍ.