ⴰⵢⵓⴱ 31

1 ⵏⴻⵛⵛ ⴳⴳⵉⵖ ⵍⵄⴰⵀⴷ ⴰⴽ-ⴷ ⵜⵉⵟⵟⴰⵡⵉⵏ ⵉⵏⵓ, ⵎⴰⵎⵎⴻⵛ ⵉ ⵖⴰ ⵅⵣⴰⵔⴻⵖ ⵅⴻⵏⵏⵉ ⴷⵉ ⵜⴻⵄⵣⴰⵔⴻⵛⵜ? 2 ⵎⴰⵖⴰⵔ ⵎⵉⵏ ⵉⴵⴰⵏ ⵅⴻⵏⵏⵉ ⵜⴰⵙⵖⴰⵔⵜ ⵏ ⴰⵔⴻⴱⴱⵉ ⵣⵉ ⵙⴻⵏⵏⴻⵊ, ⵏⵉⵖ ⵜⴰⵙⵖⴰⵔⵜ ⵏ ⵍⵡⴰⵔⵜ ⵏ ⵓⵎⵣⴻⵎⵎⴰⵔ ⵅ ⴽⵓⵍⵛⵉ ⵣⴻⴳ ⵉⵊⴻⵏⵡⴰⵏ ⵢⵓⵄⵍⴰⵏ? 3 ⵎⴰ ⵡⴰⵔ ⵉⴵⵉ ⴰⴹⴻⵢⵢⴻⵄ ⵉⴽⴽⴰⵔ-ⴷⴷ ⵉ ⵓⵄⴻⴼⴼⴰⵏ, ⴰⵔⵥⵉⵢⵢⴻⵜ ⵉ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ? 4 ⵎⴰ ⵡⴰⵔ ⵉⵜⵜⵡⵉⵍⵉ ⵏⴻⵜⵜⴰ ⵉⴱⵔⵉⴷⴻⵏ ⵉⵏⵓ, ⵎⴰ ⵡⴰⵔ ⵉⵃⴻⵙⵙⴻⴱ ⵏⴻⵜⵜⴰ ⵍⵇⴻⴷⴷ ⵏ ⵎⴰⵔⵔⴰ ⵉⵚⵓⵔⴰⴼ ⵉⵏⵓ? 5 ⵎⴰⵍⴰ ⵜⵓⵖⴰ ⵓⵢⵓⵔⴻⵖ ⴷⵉ ⵍⴻⵅⴷⴻⵄ, ⵏⵉⵖ ⵉⵇⴻⴵⴻⵇ ⵓⴹⴰⵔ ⵉⵏⵓ ⵖⴰⵔ ⵍⵖⴻⵛⵛ, 6 ⴻⵊⵊ ⵙⵉⴷⵉ ⴰⴷ ⴰⵢⵉ ⵉⵡⵣⴻⵏ ⵅⴻⵏⵏⵉ ⴷⵉ ⵍⵎⵉⵣⴰⵏⴰⵜ ⵉⵙⴻⴳⴳⴷⴻⵏ, ⴰⵍⴰⵎⵉ ⵉ ⵖⴰ ⵉⵙⵙⴻⵏ ⴰⵔⴻⴱⴱⵉ ⵍⴻⵚⴼⴰⵢⴻⵜ ⵉⵏⵓ. 7 ⵎⴰⵍⴰ ⵉⵚⵓⵔⴰⴼ ⵉⵏⵓ ⴼⴼⵖⴻⵏ ⵣⴻⴳ ⵡⴻⴱⵔⵉⴷ, ⵓⵍ ⵉⵏⵓ ⵉⴹⴼⴰⵔ ⵜⵉⵟⵟⴰⵡⵉⵏ ⵉⵏⵓ ⵓⵛⴰ ⵅⴻⵏⵏⵉ ⵉⵍⵚⴻⵇ ⵍⵄⵉⴱ ⴷⴻⴳ ⵉⴼⴰⵙⵙⴻⵏ ⵉⵏⵓ, 8 ⵅⴻⵏⵏⵉ ⴰⴷ ⵣⴰⵔⵄⴻⵖ ⵏⴻⵛⵛ, ⵎⴰⵛⴰ ⵉⵊⵊⴻⵏ ⵏⵏⴻⵖⵏⵉ ⴰⴷ ⵉⵛⵛ, ⵓ ⵎⵉⵏ ⵖⴰⵔⵉ ⴷⴷ-ⵉⵖⴻⵎⵎⴰⵢⴻⵏ ⴰⴷ ⵉⵜⵜⵡⴰⵇⵍⴻⵄ! 9 ⵎⴰⵍⴰ ⵓⵍ ⵉⵏⵓ ⵉⵜⵜⵡⴰⵖⵡⴰ ⵖⴰⵔ ⵉⵛⵜ ⵏ ⵜⴻⵎⵖⴰⵔⵜ, ⵏⵉⵖ ⵜⵓⵖⴰ ⵜⵜⵃⴰⵎⵉⵖ ⵖⴰⵔ ⵜⴻⵡⵡⴰⵔⵜ ⵏ ⵡⴰⵊⵊⴰⵔ ⵉⵏⵓ, 10 ⴻⵊⵊ ⵅⴻⵏⵏⵉ ⵜⴰⵎⵖⴰⵔⵜ ⵉⵏⵓ ⴰⴷ ⵜⴻⵃⵔⵉ ⵉⵎⴻⵏⴷⵉ ⵉ ⵢⵉⵊⵊⴻⵏ ⵏⵏⴻⵖⵏⵉ, ⵊⵊⴻⵎ ⵉⵏⵏⴻⵖⵏⵉ ⴰⴷ ⵅⴰⵙ ⴰⴹⴰⵔⴻⵏ. 11 ⵎⴰⵖⴰⵔ ⴰⵢⴰ ⴷ ⵍⴻⴼⴹⵉⵃⴻⵜ, ⴷ ⵉⵛⵜ ⵏ ⵍⵊⴰⵔⵉⵎⴰ ⵉ ⵅⴰⵙ ⵉ ⵖⴰ ⵡⵜⴻⵏ ⵍⵇⵓⴹⴰⵜ. 12 ⵎⴰⵖⴰⵔ ⴰⵢⴰ ⴷ ⵜⵉⵎⴻⵙⵙⵉ ⵜᵉⵜⵜⴻⵜⵜ ⴰⵍ ⴰⵀⴻⵍⵍⴻⴽ, ⵜⵇⴻⴵⴻⵄ ⵎⴰⵔⵔⴰ ⵍⵖⵉⴵⴻⵜ ⵉⵏⵓ. 13 ⵎⴰⵍⴰ ⵙⵙⵃⴻⵇⵇⴰⵔⴻⵖ ⵍⵃⴻⵇⵇ ⵏ ⵉⵙⵎⴻⵖ ⵉⵏⵓ ⴷ ⵜⴰⵢⵢⴰ ⵉⵏⵓ, ⵍⴰⵎⵉ ⵜⵓⵖⴰ ⵜⵜⴻⵎⵛⵓⴱⴱⵓⵛⴻⵏ ⴰⴽⵉⴷⵉ, 14 ⵎⵉⵏ ⵉ ⵖⴰ ⴳⴳⴻⵖ ⵅⴻⵏⵏⵉ ⵎⴰⵍⴰ ⵙⵉⴷⵉ ⵉⴽⴽⴰⵔ, ⵎⴰⵍⴰ ⵏⴻⵜⵜⴰ ⵉⵇⴻⴵⴻⴱ ⴰⵢⵉ, ⵎⵉⵏ ⵅⴰⵙ ⴷⴷ ⵖⴰ ⵢⴰⵔⵔⴻⵖ ⵅⴻⵏⵏⵉ? 15 ⵡⴻⵏⵏⵉ ⴷ ⴰⵢⵉ ⵉⴳⴳⵉⵏ ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ, ⵎⴰ ⵡⴰⵔ ⵜ ⵉⴳⴳⵉ ⵓⵍⴰ ⴷ ⵏⴻⵜⵜⴰ? ⵎⴰ ⵡⴰⵔ ⵉⴵⵉ ⴷ ⵉⵊⵊ ⵡⴻⵏⵏⵉ ⴷ ⴰⵏⴻⵖ ⴷⴷ-ⵉⵅⴻⵍⵇⴻⵏ ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵜⵏⴻⵖ? 16 ⵎⴰⵍⴰ ⵇⴻⵎⵎⵃⴻⵖ ⴰⵎⴻⵥⵔⵉ ⵏ ⵉⵎⴻⵣⵍⴰⴹ ⵏⵉⵖ ⵙⵙⵔⵓⵖ ⵜⵉⵟⵟⴰⵡⵉⵏ ⵏ ⵜⴰⵊⵊⴰⵍⵜ, 17 ⵎⴰⵍⴰ ⵏⴻⵛⵛ ⵎⵖⵉⵔ ⵛⵛⵉⵖ ⴰⵍⴻⵇⵇⵓⵣ ⵏ ⵡⴻⵖⵔⵓⵎ ⵉⵏⵓ, ⴰⵎ ⵡⴰⵔ ⵣⵣⴰⵢⴻⵙ ⵉⵛⵛⵉ ⵓⵢⵓⵊⵉⵍ, 18 - ⵎⴰⵖⴰⵔ ⵣⵉ ⵜⴻⵎⵥⵉ ⵉⵢⵎⴰ ⵏⴻⵜⵜⴰ ⵖⴰⵔⵉ ⴰⵎ ⵉⵢⵎⴰ ⵖⴰⵔ ⴱⴰⴱⴰⵙ, ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ ⵏⴻⴷⵀⴻⵖ ⵜⵜ - 19 ⵎⴰⵍⴰ ⵥⵔⵉⵖ ⵉⵊⵊⴻⵏ ⵉⵜⵜⵡⴰⵀⴻⵍⵍⴻⴽ ⵎⵉⵏⵣⵉ ⵡⴰⵔ ⵖⴰⵔⴻⵙ ⵉⴵⵉ ⵡⴰⵔⵔⵓⴹ, ⵏⵉⵖ ⵎⵉⵏⵣⵉ ⵡⴰⵔ ⴷⵉⵏ ⵉⴵⵉ ⴷⴷⵓⵔⵉ ⵉ ⵓⵎⴻⵣⵍⵓⴹ, 20 ⵎⴰⵍⴰ ⵄⴻⵎⵎⴰⵔⵚ ⵡⴰⵔ ⴷ ⴰⵢⵉ ⴱⴰⵔⴽⴻⵏⵜ ⵜⴻⵊⵄⵉⵏⵏⴰⵜⵉⵏ ⵏⵏⴻⵙ, ⵎⵉⵏⵣⵉ ⵉⴳⴳⴰ ⴰⴷ ⵉⵙⵙⵉⵃⵎⴰ ⵉⵅⴻⴼ ⵏⵏⴻⵙ ⵙ ⵡⴰⴵⴰⵙ ⵏ ⵜⴹⵓⴼⵜ ⵏ ⵉⵣⵎⴰⵔⴻⵏ ⵉⵏⵓ, 21 ⵎⴰⵍⴰ ⴰⴼⵓⵙ ⵉⵏⵓ ⵉⵀⵓⴷⴷ ⵅ ⵓⵢⵓⵊⵉⵍ, ⵎⵉⵏⵣⵉ ⵥⵔⵉⵖ ⴰⵇⴰ ⴷⵉⵏ ⵜⵡⵉⵣⴰ ⵉ ⵏⴻⵛⵛ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ, 22 ⴻⵊⵊ ⵅⴻⵏⵏⵉ ⴰⴷ ⴰⵢⵉ ⵜⴻⵡⴹⴰ ⵜⴻⵖⵔⵓⴹⵜ ⵉⵏⵓ ⵣⴻⴳ ⵉⵊⵉⵎⴰⵏ, ⴰⴷ ⴰⵢⵉ ⵢⴰⵔⵥ ⵓⵖⵉⵍ ⵉⵏⵓ ⵣⴻⴳ ⵢⵉⵖⴻⵙ! 23 ⵎⴰⵖⴰⵔ ⴰⴷ ⵅⴰⴼⵉ ⴷⴷ-ⵉⵡⴹⴰ ⵓⵏⴻⵅⵍⵉⵄ ⴰⵎⴻⵇⵇⵔⴰⵏ, ⵉⵛⵜ ⵏ ⵍⵎⵓⵚⵉⴱⴻⵜ ⵣⵉ ⵖⴰⵔ ⴰⵔⴻⴱⴱⵉ, ⵡⴰⵔ ⵣⴻⵎⵎⴰⵔⴻⵖ ⴰⴷ ⴳⴳⴻⵖ ⵡⴰⵍⵓ ⵣⵣⴰⵜ ⵉ ⵓⵄⵓⴵⵉ ⵏⵏⴻⵙ. 24 ⵎⴰⵍⴰ ⴳⴳⵉⵖ ⵓⵔⴻⵖ ⴷ ⴰⵜⴻⵛⵍⵉ ⵉⵏⵓ, ⵏⵉⵖ ⵏⵏⵉⵖ ⵉ ⵡⵓⵔⴻⵖ ⵉⵖⵍⴰⵏ ⴰⵟⵟⴰⵙ: ‘ⵛⴻⴽ ⴷ ⵍⴰⵎⴰⵏ ⵉⵏⵓ!’, 25 ⵎⴰⵍⴰ ⴼⴰⵔⵃⴻⵖ ⵓⵎⵉ ⵉⵎⵖⴰⵔ ⵡⴰⴳⵍⴰ ⵉⵏⵓ, ⵓⵎⵉ ⴰⴼⵓⵙ ⵉⵏⵓ ⵉⵟⵟⴻⴼ ⴰⵟⵟⴰⵙ ⴷ ⴰⴳⵍⴰ, 26 ⵎⴰⵍⴰ ⵥⵔⵉⵖ ⵜⴰⴼⴰⵡⵜ ⵏ ⵜⴼⵓⵛⵜ ⵅⵎⵉ ⵜᵉⵜⵜⵡⴻⵙⵙⴻⴳ, ⵏⵉⵖ ⵜⴰⵣⵉⵔⵉ ⵅⵎⵉ ⵜⴻⴳⴳⵓⵔ ⴷⵉ ⵜⵉⵙⵙⵉⵇⵜ ⵏⵏⴻⵙ, 27 ⵓⵛⴰ ⵉⵜⵜⵡⴰⵖⵡⴰ ⵡⵓⵍ ⵉⵏⵓ ⵙ ⵜⵏⵓⴼⴼⵔⴰ, ⵓⵛⴰ ⴰⵇⴻⵎⵎⵓⵎ ⵉⵏⵓ, ⵉⵙⵙⵓⴷⴻⵎ ⵉ-ⵜ ⵓⴼⵓⵙ ⵉⵏⵓ, 28 ⵅⴻⵏⵏⵉ ⵉⵍⵉ ⵓⵍⴰ ⴷ ⵎⴰⵏ ⴰⵢⴰ ⴷ ⵍⵎⵓⵄⵚⵉⵢⵢⴻⵜ ⴰⴷ ⵜⵜ ⵡⵛⴻⵏ ⵉ ⵍⵇⵓⴹⴰⵜ, ⵎⴰⵖⴰⵔ ⵅⴻⵏⵏⵉ ⴰⴷ ⵏⴽⴰⵔⴻⵖ ⴰⵔⴻⴱⴱⵉ ⵏⵏⵉ ⵉⴵⴰⵏ ⵙⴻⵏⵏⴻⵊ. 29 ⵎⴰⵍⴰ ⴼⴰⵔⵃⴻⵖ ⵉ ⴰⵔⵥⵉⵢⵢⴻⵜ ⵏ ⵡⴻⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⴼⴰⵔⵃⴻⵖ ⵓⵎⵉ ⵜ ⵉⵍⵇⴻⴼ ⵍⵖⴰⵔ! 30 ⵏⴻⵛⵛ ⵎⴰⵛⴰ ⵡⴰⵔ ⵊⵊⵉⵖ ⴰⵏⴻⵖ ⵉⵏⵓ ⴰⴷ ⵉⵅⴹⴰ, ⵓⵎⵉ ⴽⴽⵡⴰⵔⴻⵖ ⵍⴻⵄⵎⴰⵔ ⵏⵏⴻⵙ ⵙ ⵏⵏⴻⵄⵍⴻⵜ! 31 ⵎⴰⵍⴰ ⵉⵔⵢⴰⵣⴻⵏ ⵏⵏⵉ ⵉⴵⴰⵏ ⴷⴻⴳ ⵓⵇⵉⴹⵓⵏ ⵉⵏⵓ ⵡⴰⵔ ⵇⵇⴰⵔⴻⵏ: ‘ⵎⴰⵏ ⵡⴻⵏ ⵡⴰⵔ ⵉⵜⵜⵡⴰⵙⵙⵊⵉⵡⵏⴻⵏ ⵣⴻⴳ ⵢⵉⵏⵏⵉ ⵉⴽⵙⵉⵏ ⵣⴻⴳ ⵡⴻⵢⵙⵓⵎ ⵏⵏⴻⵙ?’ 32 ⵓⵍⴰ ⴷ ⵉⵊⵊ ⵏ ⵍⴱⴰⵔⵔⴰⵏⵉ ⵡⴰⵔ ⵉⵙⵙⴻⵏⵙ ⴷⵉ ⴱⴰⵔⵔⴰ ⵅ ⵡⴻⴱⵔⵉⴷ, ⵎⴰⵖⴰⵔ ⵉ ⵓⵎⵙⴻⴱⵔⵉⴷ ⴰⵔⵣⵎⴻⵖ ⵜⵉⵡⵡⵓⵔⴰ ⵉⵏⵓ. 33 ⵎⴰⵍⴰ ⵏⴻⵛⵛ, ⴰⵎ ⴰⴷⴰⵎ, ⴷⵍⵉⵖ ⴰⵅⴻⵟⵟⵓ ⵉⵏⵓ, ⵓⵎⵉ ⵙⵙⵏⵓⴼⴼⴰⵔⴻⵖ ⵍⵎⵓⵄⵚⵉⵢⵢⴻⵜ ⵉⵏⵓ ⴷⴻⴳ ⵡⴻⵃⵙⵉⵏ ⵉⵏⵓ, 34 ⵎⵉⵏⵣⵉ ⴳⴳⵯⴻⴷⴻⵖ ⵣⵉ ⵍⵖⴰⵛⵉ ⴰⵎⴻⵇⵇⵔⴰⵏ, ⵏⵉⵖ ⵉⵙⵙⵏⴻⵅⵍⴻⵄ ⴰⵢⵉ ⵓⵙⴻⵃⵇⴰⵔ ⵏ ⵍⵡⴰⵛⵓⵏ ⵉⵏⵓ, ⴰⵍⴰⵎⵉ ⵇⵇⵉⵎⴻⵖ ⵙⵙⴻⵖⴷⴻⵖ, ⵡⴰⵔ ⴼⴼⵉⵖⴻⵖ ⵄⴰⴷ ⵣⵉ ⵜⴻⵡⵡⴰⵔⵜ ⵖⴰⵔ ⴱⴰⵔⵔⴰ … 35 ⵎⵍⵉ ⵖⴰⵔⵉ ⵉⵊⵊⴻⵏ ⵡⴻⵏⵏⵉ ⴷ ⴰⵢⵉ ⵖⴰ ⵉⵙⵍⴻⵏ. ⵅⵣⴰⵔ, ⴰⵛⴻⵎⵎⵉⵄ ⵉⵏⵓ - ⴰⵎⵣⴻⵎⵎⴰⵔ ⵅ ⴽⵓⵍⵛⵉ ⴰⴷ ⵅⴰⴼⵉ ⴷⴷ-ⵢⴰⵔⵔ - ⵓⵍⴰ ⴷ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ ⵏⵏⵉ ⵜ ⵢⵓⵔⴰ ⵡⴻⵔⵢⴰⵣ ⵏⵏⵉ ⴽⵉⴷⵉ ⵉⵜⵜⴻⵎⵛⵓⴱⴱⵓⵛⴻⵏ. 36 ⵎⴻⵄⵍⵉⴽ ⵓⴼⵉⵖ ⵎⴰ ⵡⴰⵔ ⵜ ⴰⵔⴻⴱⴱⵓⵖ ⵅ ⵜⵖⴰⵔⴹⵜ ⵉⵏⵓ, ⴰⴷ ⵜ ⵇⵇⵏⴻⵖ ⵉ ⵓⵣⴻⴵⵉⴼ ⵉⵏⵓ ⴰⵎ ⵢⵉⵊⵊ ⵏ ⵜⵜⴰⵊ. 37 ⵉⵡⴰ, ⴰⴷ ⴰⵙ ⵉⵏⵉⵖ ⵍⵇⴻⴷⴷ ⵏ ⵉⵚⵓⵔⴰⴼ ⵉⵏⵓ, ⴰⴷ ⵖⴰⵔⴻⵙ ⴷⴷ-ⵇⴰⵔⵔⴱⴻⵖ ⴰⵎ ⵢⵉⵊⵊ ⵏ ⵍⵃⴰⴽⴻⵎ. 38 ⵎⴰⵍⴰ ⵍⴻⵄⵔⴰⵚⵉ ⵉⵏⵓ ⵉⵙⵖⵓⵢ ⵅⴰⴼⵉ, ⵉⵄⴻⵢⵢⴰⴷⴻⵏ ⵏⵏⴻⵙ ⴰⴷ ⵔⵓⵏ ⴰⴽ-ⴷ ⵡⴰⵢⴰⵡⵢⴰ ⵎⴰⵔⵔⴰ, 39 ⵎⴰⵍⴰ ⵛⵛⵉⵖ ⵚⵚⴰⴱⴻⵜ ⵏⵏⴻⵙ ⵏⵀⵍⴰ ⴰⵅⴻⴵⴻⵚ, ⵏⵉⵖ ⴳⴳⵉⵖ ⵍⴻⵄⵎⴰⵔ ⵏ ⵉⵅⴻⵎⵎⴰⵙⴻⵏ ⵏⵏⴻⵙ ⵉⴹⵍⴻⵇ ⵉ ⴱⵓⵃⴱⴻⵍ, 40 ⴻⵊⵊ ⵅⴻⵏⵏⵉ ⴰⴷ ⵉⵖⵎⵉ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ ⴷⴻⴳ ⵡⴻⵎⵛⴰⵏ ⵏ ⵢⵉⵔⴷⴻⵏ, ⵓⵍⴰ ⴷ ⵍⴻⵄⵛⵓⴱ ⵢⴰⵔⵚⵓⴷⴻⵏ ⴷⴻⴳ ⵡⴻⵎⵛⴰⵏ ⵏ ⵉⵎⴻⵏⴷⵉ. ⴰⵇⴰ ⴷⴰ ⵉ ⵇⴹⴰⵏ ⵡⴰⵡⴰⵍⴻⵏ ⵏ ⴰⵢⵓⴱ.