ⴰⵢⵓⴱ 5

1 ⵍⴰⵖⴰ ⵎⴰⵛⴰ! ⵎⴰ ⴷⵉⵏ ⵛⴰ ⵏ ⵢⵉⵊⵊⴻⵏ ⵉ ⵅⴰⴽ ⴷⴷ ⵖⴰ ⵢⴰⵔⵔⴻⵏ? ⵖⴰⵔ ⵎⴰⵏ ⵣⴻⴳ ⵉⵎⵇⴻⴷⴷⴰⵙⴻⵏ ⵉ ⵖⴰ ⵜⵙⴻⵡⴹⴻⴷ? 2 ⵎⵉⵏⵣⵉ ⴰⵅⴻⵢⵢⴻⵇ ⵉⵏⴻⵇⵇ ⴰⴱⵓⵀⴰⵍⵉ, ⵓ ⵜⵓⵙⵎⵉ ⵜⵏⴻⵇⵇ ⴰⵇⵓⴱⴱⴰⵏⵉ. 3 ⵥⵔⵉⵖ ⵉⵊⵊ ⵏ ⵓⴱⵓⵀⴰⵍⵉ ⵉⴹⵍⴻⵇ ⵉ ⵡⴻⵥⵡⴰⵔ, ⵎⴰⵛⴰ ⵅ ⵉⵛⵜ ⵏ ⵍⵖⴻⴼⵍⴻⵜ ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵏⴻⵄⵍⴻⵖ ⵜⴰⵣⴻⴷⴷⵉⵖⵜ ⵏⵏⴻⵙ. 4 ⵉⴳⴳⵯⴻⵊⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵅ ⵓⵙⴻⵏⵊⴻⵎ, ⵜⵜⵡⴰⴷⴷⵣⴻⵏ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⵓⵛⴰ ⵡⴰⵔ ⵜⵓⵖⵉ ⴷⵉⵏ ⵡⵉ ⵜⴻⵏ ⵉ ⵖⴰ ⵉⴼⴻⴽⴽⴻⵏ, 5 ⵓⵎⵉ ⵉⵛⵛⴰ ⵓⵎⴻⵀⵢⵓⴼ ⵚⵚⴰⴱⴻⵜ ⵏⵏⴻⵙ - ⵡⴰⵀ, ⵡⴰⵏⵉⵜⴰ ⵉⵙⵙⵓⴼⴼⴻⵖ ⵉ-ⵜ-ⵉ-ⴷⴷ ⵄⴰⴷ ⵣⴻⴳ ⵉⵙⴻⵏⵏⴰⵏⴻⵏ - ⵓ ⵉⵙⴰⵔⴹ ⵓⵅⴻⵡⵡⴰⵏ ⴰⴳⵍⴰ ⵏⵙⴻⵏ. 6 ⵎⴰⵖⴰⵔ ⵡⴰⵔ ⵉⴵⵉ ⵣⵉ ⵜⵄⴻⵊⵊⴰⵊⵜ ⵉ ⵣⵉ ⴷⴷ-ⵉⵜⵜⴻⴽⴽ ⵍⵖⴰⵔ ⵓ ⵣⵉ ⵜⴻⵎⵎⵓⵔⵜ ⵡⴰⵔ ⴷⴷ-ⵜⵖⴻⵎⵎⵉ ⵜⴰⵎⴰⵔⴰ, 7 ⵎⴰⵛⴰ ⴱⵏⴰⴷⴻⵎ ⴷ ⵡⴻⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵉ ⵜⴰⵎⴰⵔⴰ, ⴰⵎ ⴳⴻⵄⵄⴷⴻⵏⵜ ⵜⵛⴻⵄⵄⴰⵍⵉⵏ ⵏ ⵜⵎⴻⵙⵙⵉ ⵎⴰⵃⴻⵏⴷ ⴰⴷ ⴹⵡⵉⵏⵜ. 8 ⵎⵍⵉ ⵓⴼⵉⵖ ⴰⴷ ⴰⵔⵣⵓⵖ ⵖⴰⵔ ⴰⵔⴻⴱⴱⵉ, ⴰⴷ ⵙⵙⵉⵡⴹⴻⵖ ⵜⴰⵎⴻⵙⵍⴰⵛⵜ ⵉⵏⵓ ⵖⴰⵔ ⴰⵔⴻⴱⴱⵉ, 9 ⵡⴻⵏⵏⵉ ⵉⵜⵜⴻⴳⴳⴻⵏ ⵜⵉⵎⴻⵙⵍⴰⵢⵉⵏ ⵜⵉⵎⴻⵇⵇⵔⴰⵏⵉⵏ, ⵡⴰⵔ ⴷⵉⵏ ⵡⵉ ⵜⴻⵏⵜ ⵉ ⵖⴰ ⵉⴼⴻⵀⵎⴻⵏ, ⵉⵜⵜⴻⴳⴳ ⵍⵎⵓⵄⵊⵉⵣⴰⵜ ⵉ ⵡⴰⵔ ⵉⵣⴻⵎⵎⴰⵔ ⴰⴷ ⵜⵜⵡⴰⵃⴻⵙⴱⴻⵏⵜ. 10 ⵉⵙⵙⴰⴽⴽⵯⴰⴹ ⴰⵏⵥⴰⵔ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ, ⵓⵛⴰ ⵉⵙⵙⴻⴽⴽⴰ ⴰⵎⴰⵏ ⵅ ⵡⵓⴷⴻⵎ ⵏ ⵉⵢⵢⴰⵔⴻⵏ, 11 ⵃⵉⵎⴰ ⴰⴷ ⵉⵙⵙⴳⴻⵄⵄⴻⴷ ⵉⵎⵡⴰⴹⵄⴻⵏ, ⵓⵛⴰ ⵉⵏⵏⵉ ⵉⵛⴻⴹⵏⴻⵏ ⴰⴷ ⵜⴻⵏ ⵙⵙⵓⵄⵍⴰⵏ ⵖⴰⵔ ⵍⴰⵎⴰⵏ. 12 ⵏⴻⵜⵜⴰ ⵉⵙⵙⴱⴻⵟⵟⴻⵍ ⵉⵅⴰⵔⵔⵉⵚⴻⵏ ⵏ ⵉⵃⵔⴰⵢⵎⵉⵢⵢⴻⵏ, ⴰⵍⴰⵎⵉ ⵉⴼⴰⵙⵙⴻⵏ ⵏⵙⴻⵏ ⵡⴰⵔ ⵣⴻⵎⵎⴰⵔⴻⵏ ⴰⴷ ⴳⴳⴻⵏ ⵡⴰⵍⵓ. 13 ⵉⵎⵉⵖⵉⵙⴻⵏ ⵉⵎⴻⵏⵏⴻⵄ ⵉ-ⵜⴻⵏ ⴷⵉ ⵜⴻⵃⵔⴰⵢⵎⴻⵛⵜ ⵏⵙⴻⵏ, ⵉⵜⵜⵡⴰⵙⵙⴱⴻⵟⵟⴻⵍ ⵛⵛⵡⴰⵔ ⵏ ⵉⵃⵔⴰⵢⵎⵉⵢⵢⴻⵏ. 14 ⴷⴻⴳ ⵓⵣⵉⵍ ⵎⵎⵙⴰⴳⴰⵔⴻⵏ ⴰⴽ-ⴷ ⵜⴰⴵⴻⵙⵜ ⵓⵛⴰ ⴷⵉ ⵟⵟⵃⴰ ⵏ ⵓⵣⵉⵍ ⵜⵜⴼⴰⴼⴰⵏ ⴰⵎ ⵜⵜⴼⴰⴼⴰⵏ ⴷⵉ ⴵⵉⵍⴻⵜ. 15 ⵏⴻⵜⵜⴰ ⵉⵙⵙⴻⵏⵊⴰⵎ ⵣⵉ ⵙⵙⵉⴼ ⵉ ⴷⴷ-ⵉⵜⵜⴻⴼⴼⵖⴻⵏ ⵣⴻⴳ ⵓⵇⴻⵎⵎⵓⵎ ⵏⵙⴻⵏ, ⵓⵍⴰ ⴷ ⴰⵎⴻⵣⵍⵓⴹ ⵣⴻⴳ ⵓⴼⵓⵙ ⵏ ⵡⴻⵏⵏⵉ ⵉⵊⴻⵀⴷⴻⵏ. 16 ⴰⵎⵎⵓ ⵉ ⵢⴻⴵⴰ ⵍⴰⵢⴰⵙ ⵉ ⵓⵎⴻⵣⵍⵓⴹ ⵓⵛⴰ ⴷⴷⴻⴵ ⴰⴷ ⵉⴱⴻⵍⵍⴻⵄ ⴰⵇⴻⵎⵎⵓⵎ ⵏⵏⴻⵙ. 17 ⵅⵣⴰⵔ, ⵙⵙⴻⵄⴷ ⵏ ⵡⴻⵔⵢⴰⵣ ⵡⴻⵏⵏⵉ ⵉⵙⴻⴳⴳⴻⵎ ⴰⵔⴻⴱⴱⵉ. ⵙ ⵓⵢⴰ ⵡⴰⵔ ⵜⴻⵙⵙⴻⵃⵇⵉⵔⵉ ⵛⴰ ⵜⵜⴰⵔⴱⵉⵢⵢⴻⵜ ⵏ ⵓⵎⵣⴻⵎⵎⴰⵔ ⵅ ⴽⵓⵍⵛⵉ! 18 ⵎⴰⵖⴰⵔ ⵏⴻⵜⵜⴰ ⵉⵙⵙⵢⴻⵣⵣⵉⵎ ⴰⵢⵉ ⵙ ⵉⵊⵊ ⵏ ⵓⵢⴻⵣⵣⵉⵎ ⵉⵜⵜⴻⵇⵇⵙⴻⵏ ⵓⵛⴰ ⵅⴻⵏⵏⵉ ⵉⵜⵜⵛⴻⴷⴷⴰ, ⵉⵛⵛⴰⵜ ⵓⵛⴰ ⵅⴻⵏⵏⵉ ⵉⴼⴰⵙⵙⴻⵏ ⵏⵏⴻⵙ ⵙⵙⴳⴻⵏⴼⴰⵏ. 19 ⴷⵉ ⵙⴻⵜⵜⴰ ⵏ ⵍⴻⵃⵚⴰⵔⴰⵜ ⴰⴷ ⵛⴻⴽ ⵉⴼⴻⴽⴽ, ⴷⵉ ⵜⴻⵏⵏⵉ ⵡⵉⵙⵙ ⵙⴻⴱⵄⴰ ⵡⴰⵔ ⵛⴻⴽ ⵉⵍⴻⵇⵇⴻⴼ ⵍⵖⴰⵔ. 20 ⴷⵉ ⵍⴰⵥ ⴰⴷ ⵛⴻⴽ ⵉⵙⵙⴻⵏⵊⴻⵎ ⵣⵉ ⵍⵎⴻⵡⵜ, ⴷⴻⴳ ⵓⵎⴻⵏⵖⵉ ⵣⵉ ⵜⵉⵢⵢⵉⵜⴰ ⵏ ⵙⵙⵉⴼ. 21 ⴰⴷ ⵜⵉⵍⵉⴷ ⴷⵉ ⵍⴰⵎⴰⵏ ⵣⵣⴰⵜ ⵉ ⵓⵔⴻⴽⴽⵓⴹ ⵏ ⵢⵉⵍⴻⵙ, ⵡⴰⵔ ⵜᵉⵜⵜⴻⴳⴳⵯⴻⴷⴻⴷ ⵛⴰ ⵣⴻⴳ ⵡⴰⵔⴻⴷⴷⴻⴵ ⵎⴰⵍⴰ ⵢⵓⵙⴰ-ⴷⴷ. 22 ⵅ ⵡⴰⵔⴻⴷⴷⴻⴵ ⴷ ⵍⴰⵥ ⵜⵣⴻⵎⵎⴰⵔⴻⴷ ⴰⴷ ⵜⴹⴻⵃⵛⴻⴷ, ⵣⵉ ⵍⴻⵡⵃⵓⵛ ⵏ ⵍⴻⵅⵍⴰ ⵏ ⵜⴻⵎⵎⵓⵔⵜ ⵡⴰⵔ ⵜᵉⵜⵜⴻⴳⴳⵯⴻⴷⴻⴷ, 23 ⵎⴰⵖⴰⵔ ⵜⵇⴻⴹⵄⴻⴷ ⵍⵄⴰⵀⴷ ⴰⴽ-ⴷ ⵉⵥⵔⴰ ⵏ ⵢⴻⵢⵢⴰⵔ, ⵅⴻⵏⵏⵉ ⵍⴻⵡⵃⵓⵛ ⵏ ⵍⴻⵅⵍⴰ ⴰⴷ ⴽⵉⴷⴻⴽ ⴷⴷⴰⵔⴻⵏ ⴷⵉ ⵍⴻⵀⵏⴰ. 24 ⴰⴷ ⵜⴰⵔⴳⴱⴻⴷ ⴰⵇⴰ ⵍⴻⵀⵏⴰ ⴷ ⴰⵇⵉⴹⵓⵏ ⵏⵏⴻⵛ, ⴰⴷ ⵜⴱⴻⵇⵇⵛⴻⴷ ⵜⴰⵣⴻⴷⴷⵉⵖⵜ ⵏⵏⴻⵛ, ⴰⴷ ⵜⴰⴼⴻⴷ ⵡⴰⵔ ⵛⴻⴽ ⵉⵜⵜⵅⴻⵚⵚⵉ ⵡⴰⵍⵓ. 25 ⵛⴻⴽ ⴰⴷ ⵜⴻⵙⵙⵏⴻⴷ ⴰⵇⴰ ⴰⵔⵔⴰⵡ ⵏⵏⴻⵛ ⴰⵟⵟⴰⵙ, ⵓ ⴷⴷⵓⵔⵔⵢⴻⵜ ⵏⵏⴻⵛ ⴰⵎ ⵡⴻⴼⵙⵓ ⴰⵣⵉⵣⴰ ⵏ ⵜⴻⵎⵎⵓⵔⵜ. 26 ⴰⴷ ⵜⴰⴷⴼⴻⴷ ⵖⴰⵔ ⵡⴻⵏⴹⴻⵍ ⴷⵉ ⵜⴻⵡⵙⴰⵔ, ⴰⵎ ⵎⴰⵎⵎⴻⵛ ⵙⵙⴳⴻⵄⵄⴷⴻⵏ ⵉⵊⵊ ⵏ ⵓⵄⵓⵔⵔⵉⵛ ⵏ ⵜⵇⴻⴱⴱⵉⴹⵉⵏ ⵏ ⵉⵎⴻⵏⴷⵉ ⵖⴰⵔ ⵓⵏⴻⴷⵔⴰⵔ ⴷⵉ ⵍⵃⴰⵍ ⵏⵏⴻⵙ. 27 ⵅⵣⴰⵔ, ⵎⴰⵏ ⴰⵢⴰ, ⴰⵇⴰ ⵏⴻⵛⵛⵉⵏ ⵏⴰⵔⵣⵓ ⴷⴰⵢⴻⵙ, ⴰⵎⵎⵓ ⵉ ⵜⴻⴵⴰ! ⵙⴻⵍ ⵖⴰⵔⴻⵙ, ⵙⵙⴻⵏ ⵉ-ⵜ ⴷⴻⴳ ⵢⵉⵅⴻⴼ ⵏⵏⴻⵛ!