ⵏⴰⵃⵓⵎ 3

1 ⵓⵛⵜ ⵅ ⵜⴻⵏⴷⵉⵏⵜ ⵏ ⵉⴷⴰⵎⵎⴻⵏ! ⴰⵇⴰ-ⵜⵜ ⴷ ⴰⵅⴰⵔⵔⵉⵇ ⴷ ⵍⵄⵓⵏⴼ ⵎⴰⵔⵔⴰ, ⵜⵓⴽⴽⴰⵔⴹⴰ ⵡⴰⵔ ⵜᵉⵜⵜⴱⴻⴷⴷⵉ ⵛⴰ. 2 ⵍⵃⴻⵙⵙ ⵏ ⵓⵔⴻⴽⴽⵓⴹ, ⵍⵃⴻⵙⵙ ⵏ ⵓⵇⴰⵔⵇⴻⴱ ⵏ ⵜⵊⴰⵔⵔⴰⵔⵉⵏ, ⵉⵢⵙⴰⵏ ⵉⵜⵜⴰⵣⵣⵍⴻⵏ ⴷⴻⴳ ⵡⴻⵏⵏⴻⴹ ⴷ ⵉⴽⴰⵔⵔⵓⵜⴻⵏ ⵉⵏⴻⵟⵟⵡⴻⵏ. 3 ⴰⵎⴻⵏⵏⴰⵢ ⵉⵏⵢⴰ, ⵙⵙⵉⴼ ⵉⵜⵜⵡⴻⵙⵙⴻⴳ, ⴼⵍⵉⵜⵛⴰ ⴰⵇⴰ-ⵜⵜ ⴰⵎ ⵡⴰⵙⵙⴰⵎ. ⴰⵟⵟⴰⵙ ⴷ ⵉⵏⵏⵉ ⵉⵜⵜⵡⴰⵏⵖⴻⵏ ⵓ ⴰⵇⴰ ⴷⵉⵏ ⴰⵄⵓⵔⵔⵉⵛ ⵏ ⵉⵎⴻⵜⵜⴰⵏ, ⵍⵅⴻⵛⴱⴰⵜ ⵡⴰⵔ ⵖⴰⵔⵙⴻⵏⵜ ⵍⵃⴻⴷ, ⵡⴰⵀ, ⵜⵜⴻⵏⵇⵔⴰⴹⴻⵏ ⴷⵉ ⵍⵅⴻⵛⴱⴰⵜ ⵏⵙⴻⵏ. 4 ⵣⵉ ⵙⵙⵉⴱⴱⴻⵜ ⵏ ⵡⴰⵟⵟⴰⵙ ⵏ ⴼⴰⵔⵇ-ⵛⵛⵖⴻⵍ ⵏ ⵜⴻⵎⵖⴰⵔⵜ ⵍⵎⵓⵃⴻⵙⵏⴰ, ⵏ ⵍⴰⵍⵍⴰ ⵏ ⵜⵙⴻⵃⵃⴰⵔⵜ, ⵜⴻⵏⵏⵉ ⵉⵣⵣⵏⵓⵣⴰⵏ ⵍⴻⴳⵏⵓⵙ ⵙ ⴼⴰⵔⵇ-ⵛⵛⵖⴻⵍ ⵏⵏⴻⵙ ⵓⵍⴰ ⴷ ⵎⴰⵔⵔⴰ ⵍⴰⴵⴰⵜ ⵙ ⵓⵙⴻⵃⵃⴰⵔ ⵏⵏⴻⵙ, 5 ⵅⵣⴰⵔ, ⵙ ⵓⵢⴰ ⴰⴷ ⵅⴰⵎ ⵉⵍⵉⵖ, ⴰⵎⵎⵓ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵓ ⵏⴻⵛⵛ ⴰⴷ ⵙⵙⴳⴻⵄⵄⴷⴻⵖ ⵜⵉⵎⵓⵡⵡⴰ ⵏ ⵡⴰⵔⵔⵓⴹ ⵏⵏⴻⵎ ⵜⵉⵡⵡⴰ ⵉ ⵓⵖⴻⵎⴱⵓⴱ ⵏⵏⴻⵎ, ⵓ ⵏⴻⵛⵛ ⴰⴷ ⵙⵙⴻⵛⵏⴻⵖ ⵉ ⵍⴻⴳⵏⵓⵙ ⵜⵓⵄⵄⴰⵔⵢⴻⵏⵜ ⵏⵏⴻⵎ, ⵓ ⵍⴻⴼⴹⵉⵃⴻⵜ ⵏⵏⴻⵎ ⵉ ⵜⴳⴻⵍⴷⵉⵡⵉⵏ. 6 ⵏⴻⵛⵛ ⴰⴷ ⵛⴻⵎ ⵍⴻⵇⴼⴻⵖ ⵙ ⵏⵏⵄⴰⵡⴰⵜ, ⵓ ⴰⴷ ⵛⴻⵎ ⵙⵙⴼⴻⴹⵃⴻⵖ ⵓ ⴰⴷ ⵛⴻⵎ ⴰⵔⵔⴻⵖ ⵉ ⵓⵙⴼⵓⵔⵔⴻⵊ. 7 ⵅⴻⵏⵏⵉ ⴰⴷ ⵉⵎⵙⴰⵔ ⴰⵇⴰ ⵎⴰⵏ ⵡⴻⵏ ⵛⴻⵎ ⵉ ⵖⴰ ⵉⵥⴰⵔⴻⵏ, ⴰⴷ ⵣⵣⴰⵢⴻⵎ ⵢⴰⵔⵡⴻⵍ, ⴰⴷ ⵢⵉⵏⵉ “ⵜⴰⵏⴷⵉⵏⵜ ⵏ ⵏⵉⵏⵡⴰ ⵜⵅⴰⵔⵔⴻⴱ! ⵡⵉ ⵣⵣⴰⵢⴻⵙ ⵉ ⵖⴰ ⵉⵛⴻⴹⵏⴻⵏ?” ⵎⴰⵏⵉ ⴷ ⴰⵎ ⵉ ⵖⴰ ⵢⴰⵔⵣⵓⵖ ⵉⵏⵏⵉ ⵛⴻⵎ ⵉ ⵖⴰ ⵉⵙⵙⴼⴻⵡⵡⵊⴻⵏ? 8 ⵎⴰ ⵛⴻⵎ ⵃⵙⴻⵏ ⵣⵉ ⵏⵓ-ⴰⵎⵓⵏ ⵏⵏⵉ ⵉⵜⵜⵖⵉⵎⴰⵏ ⵖⴰⵔ ⵉⵖⴻⵣⵔⴰⵏ, ⴰⵎ ⴷ ⴰⵙ ⵇⴻⵡⵡⴰⵔⴻⵏ ⵡⴰⵎⴰⵏ, ⴰⵍⴰⵎⵉ ⵍⴻⴱⵃⴰⵔ ⴷ ⴰⵛⴱⴰⵔ ⵏⵏⴻⵙ ⵏ ⵣⵣⴰⵜ, ⴰⵇⴰ ⵍⵃⵉⴹ ⵏⵏⴻⵙ ⵉⴳⴻⵄⵄⴻⴷ ⵣⵉ ⵍⴻⴱⵃⴰⵔ. 9 ⴽⵓⵛ ⵜⵓⵖⴰ ⴷ ⵚⵚⵓⵍⵟⴰ ⵏⵏⴻⵙ, ⵓⵍⴰ ⴷ ⵎⵉⵙⵍⴰ, ⵡⴰⵔ ⵜⵓⵖⵉ ⵖⴰⵔⴻⵙ ⴰⵏⴻⴳⴳⴰⵔ. ⴼⵓⵟ ⴷ ⴰⵢⵜ ⵏ ⵍⵉⴱⵉⵢⴰ ⵜⵓⵖⴰ ⴰⵜⴻⵏ ⵣⴻⴳ ⵉⵎⵄⴰⵡⵏⴻⵏ ⵏⵏⴻⵛ. 10 ⵓⵍⴰ ⴷ ⵏⴻⵜⵜⴰⵜ ⵜⵓⵢⵓⵔ ⴷⵉ ⵍⵎⴻⵏⴼⴰ, ⴷⵉ ⵜⵎⴻⵃⴱⴰⵙⵜ. ⵓⵍⴰ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⵜⵜⵡⴰⵍⴻⴱⵣⴻⵏ ⴷⵉ ⵜⵖⴻⵎⵎⵓⵔⴰ ⵏ ⵎⴰⵔⵔⴰ ⵏ ⵜⴻⴱⵔⵉⴷⵉⵏ, ⵓ ⵅ ⵉⵎⵛⴻⵏⵏⵄⴻⵏ ⵏⵏⴻⵙ ⵏⴹⴰⵔⴻⵏ ⵅⴰⵙⴻⵏ ⵜⴰⵇⴻⴷⴷⵓⵃⵜ ⵓ ⵎⴰⵔⵔⴰ ⵉⵎⵖⴰⵔⴻⵏ ⵏⵏⴻⵙ ⵜⵜⵡⴰⵛⴰⵔⴼⴻⵏ ⵙ ⵙⵙⵏⴰⵙⴻⵍ. 11 ⵓⵍⴰ ⴷ ⵛⴻⵎ ⴰⴷ ⵜⴻⵙⵛⴰⵔⴻⴷ ⴰⴷ ⵜⴻⵙⵙⵏⵓⴼⴼⴰⵔⴻⴷ ⵉⵅⴻⴼ ⵏⵏⴻⵎ. ⵄⴰⵡⴻⴷ ⵛⴻⵎ ⴰⴷ ⵜⴰⵔⵣⵓⴷ ⵉⵊⵊ ⵏ ⵍⴱⵓⵔⵊ ⵉ ⵓⴷⵓⵔⵔⵉ ⵣⵉ ⵍⴻⵄⴷⵓ ⵏⵏⴻⵎ. 12 ⵎⴰⵔⵔⴰ ⵍⵇⴻⵍⵄⴰⵜ ⵏⵏⴻⵎ ⴰⵎ ⵡⵓⵔⵜⴰⵏ ⴰⴽ-ⴷ ⵍⴱⴰⵛⵓⵔ. ⵎⴰⵍⴰ ⵜⵜⵡⴰⵏⵀⴻⵣⵣⴻⵏ, ⴰⴷ ⵡⴹⴰⵏ ⴷⴻⴳ ⵓⵇⴻⵎⵎⵓⵎ ⵏ ⵡⴻⵏⵏⵉ ⵉⵅⵙⴻⵏ ⴰⴷ ⵜⴻⵏ ⵢⴻⵛⵛ. 13 ⵅⵣⴰⵔ, ⴰⵇⴰ ⴷ ⵡⴰ ⴷ ⵍⴳⴻⵏⵙ ⵏⵏⴻⵎ, ⴰⵇⴰ-ⵜ ⴷ ⵜⵉⵎⵖⴰⵔⵉⵏ. ⵜⵜⵏⵓⵔⵣⵎⴻⵏⵜ ⵜⴻⵡⵡⵓⵔⴰ ⵏ ⵜⴻⵎⵎⵓⵔⵜ ⵏⵏⴻⵎ ⵇⴰⵄ ⵉ ⵍⴻⵄⴷⵓ, ⵜⵉⵎⴻⵙⵙⵉ ⴰⴷ ⵜⴻⵛⵛ ⵉⵄⵓⵎⴰⴷ ⵏⵏⴻⵎ ⵏ ⵡⴻⴼⵔⴰⵢ. 14 ⴰⵢⴻⵎ ⴰⵎⴰⵏ ⵉ ⵢⵉⵅⴻⴼ ⵏⵏⴻⵎ ⵉ ⵍⴻⵃⵚⴰⵔⴻⵜ, ⵙⴻⵎⵜⴻⵏ ⵍⵇⴻⵍⵄⴰⵜ ⵏⵏⴻⵎ, ⴱⴻⴷⴷ ⴷⵉ ⵜⵍⴰⵅⵜ, ⵄⴻⴼⵙ ⴷⵉ ⵜⴰⵔⵔⵉⵙⵜ, ⵙⴻⵇⵙⴻⵃ ⵉⵥⵔⴰ ⵉⵜⵜⵡⴰⵙⵙⵓⵢⴷⴰⵏ! 15 ⵜⵉⵎⴻⵙⵙⵉ ⴰⴷ ⵛⴻⵎ ⵜⴻⵛⵛ ⴷⵉⵏ, ⵙⵙⵉⴼ ⴰⴷ ⵛⴻⵎ ⵉⵏⴻⵖ, ⴰⴷ ⵛⴻⵎ ⵜⴻⵛⵛ ⴰⵎ ⴱⵓ-ⵡⴻⵍⵙⴰⵃ! ⴰⵔⵏⵉ ⴷⴻⴳ ⵉⵅⴻⴼ ⵏⵏⴻⵎ ⴰⵎ ⴱⵓ-ⵡⴻⵍⵙⴰⵃ, ⴰⵔⵏⵉ ⴷⴻⴳ ⵢⵉⵅⴻⴼ ⵏⵏⴻⵎ ⴰⵎ ⵜⵎⵓⵔⵖⵉ. 16 ⵛⴻⴽ ⵜⴻⵙⵙⵎⴰⵔⵏⵉⴷ ⴷⴻⴳ ⵉⵙⴻⴱⴱⴰⴱⴻⵏ ⵏⵏⴻⵎ ⴽⵜⴰⵔ ⵣⴻⴳ ⵉⵜⵔⴰⵏ ⵏ ⵓⵊⴻⵏⵏⴰ. ⴱⵓ-ⵡⴻⵍⵙⴰⵃ ⴰⴷ ⵉⵙⵙⴰⵔⵙ ⵜⵉⵍⵎⴻⵛⵜ ⵏⵏⴻⵙ ⵓⵛⴰ ⴰⴷ ⵉⴹⵡⴰ. 17 ⵜⴰⵔⵡⴰ ⵏ ⵜⴰⵚⵉⵍⴻⵜ ⵏⵏⴻⵎ ⴰⵎ ⵢⵉⵊⵊ ⵏ ⵡⴻⵢⵍⴰⴼ ⵏ ⵜⵎⵓⵔⵖⵉ ⵓ ⵍⵄⴻⵙⴽⴰⵔⴰⵜ ⵏⵏⴻⵎ ⴰⵎ ⵢⵉⵅⴻⵏⴼⵓⵙⴻⵏ ⵉⵎⴻⵇⵇⵔⴰⵏⴻⵏ, ⵉⵏⵏⵉ ⵢⴰⵔⵙⴰⵏ ⴷⵉ ⵍⴻⵃⵢⵓⴹ ⴷⴻⴳ ⵢⵉⵊⵊ ⵏ ⵡⴰⵙⵙ ⴷ ⴰⵚⴻⵎⵎⴰⴹ. ⵍⴰⵎⵉ ⴷⴷ-ⵜⴻⵏⵇⴰⵔ ⵜⴼⵓⵛⵜ, ⵟⵟⴰⵡⴻⵏ ⵙⵙⴻⵏⵏⵉ ⴷⴻⵖⵢⴰ. ⵡⴰⵔ ⵉⵙⵙⵉⵏ ⵃⴻⴷ ⴰⵎⵛⴰⵏ ⵏⵙⴻⵏ. ⵎⴰⵏⵉ ⵔⵓⵃⴻⵏ ⵏⵉⵜⵏⵉ? 18 ⵉⵎⴻⴽⵙⴰⵡⴻⵏ ⵏⵏⴻⵛ ⵜⵜⵏⵓⴷⵓⵎⴻⵏ, ⴰⵢⴰ, ⴰⵊⴻⴵⵉⴷ ⵏ ⴰⵛⵛⵓⵔ, ⴰⵢⵜ ⵏ ⵊⵊⴻⵀⴷ ⵏⵏⴻⵛ ⵜⵜᵉⵟⵟⵚⴻⵏ, ⵍⴳⴻⵏⵙ ⵏⵏⴻⵛ ⴰⴷ ⵜ ⵣⴻⴵⵄⴻⵏ ⵅ ⵉⴷⵓⵔⴰⵔ, ⵓⵛⴰ ⵓⵍⴰ ⴷ ⵉⵊⵊⴻⵏ ⵡⴰⵔ ⵜⴻⵏ ⵉⵙⵙⵎⵓⵏ ⵛⴰ. 19 ⵡⴰⵔ ⴷⵉⵏ ⴰⵙⴳⴻⵏⴼⵉ ⵉ ⵜⴰⵔⴻⵥⵥⵉⵜ ⵏⵏⴻⵛ, ⵉⵜⵜⴻⴽⴽⴻⵙ ⴰⵛ ⵓⵢⴻⵣⵣⵉⵎ! ⵎⴰⵔⵔⴰ ⵉⵏⵏⵉ ⵉ ⵅⴰⴽ ⵉⵙⵍⵉⵏ ⵍⴻⵅⴱⴰⵔ, ⴰⴷ ⵛⵛⴰⵜⴻⵏ ⴷⴻⴳ ⵉⴼⴰⵙⵙⴻⵏ ⵣⵉ ⵙⵙⵉⴱⴱⴻⵜ ⵏⵏⴻⵛ, ⵎⴰⵖⴰⵔ ⵅ ⵎⴰⵏ ⵡⴻⵏ ⵡⴰⵔ ⵉⵄⴻⴷⴷⵓ ⵛⴰ ⵍⴻⴱⴷⴰ ⵍⵖⴰⵔ ⵏⵏⴻⵛ?