ⵉⵥⴻⵀⵀⵉⴷⴻⵏ 138
TTI1 ⵏ ⴷⴰⵡⵓⴷ. ⴰⴷ ⵛⴻⴽ ⵇⴰⴷⵉⵖ ⵙ ⵎⴰⵔⵔⴰ ⵓⵍ ⵉⵏⵓ, ⴰⴷ ⵛⴻⴽ ⵣⴻⵀⵀⴷⴻⵖ ⵣⵣⴰⵜ ⵉ ⵉⵔⴻⴱⴱⵉⵜⴻⵏ. 2 ⴰⴷ ⴱⴻⵏⴷⵇⴻⵖ ⵖⴰⵔ ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ ⵉⵇⴻⴷⴷⵙⴻⵏ, ⴰⴷ ⵇⴰⴷⵉⵖ ⵉⵙⴻⵎ ⵏⵏⴻⵛ ⵅ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ ⵓ ⵅ ⵍⴰⵎⴰⵏ ⵏⵏⴻⵛ, ⵎⴰⵖⴰⵔ ⵛⴻⴽ ⵜⴻⵙⵙⴻⵎⵖⴰⵔⴻⴷ ⴰⵡⴰⵍ ⵏⵏⴻⵛ ⵅ ⵎⴰⵔⵔⴰ ⵎⵉⵏ ⵉⵜⵜⵡⴰⴼⴻⵏ ⵄⴰⴷ ⴷⴻⴳ ⵢⵉⵙⴻⵎ ⵏⵏⴻⵛ. 3 ⴷⴻⴳ ⵡⴰⵙⵙ ⵍⴰⵎⵉ ⵅⴰⴽ ⴷⴷ-ⵍⴰⵖⵉⵖ, ⵜⴰⵔⵔⵉⴷ-ⴷⴷ ⵅⴰⴼⵉ, ⵛⴻⴽ ⵜⴻⵡⵛⵉⴷ ⵊⵊⴻⵀⴷ ⵉ ⵍⴻⵄⵎⴰⵔ ⵉⵏⵓ. 4 ⵎⴰⵔⵔⴰ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ ⴰⴷ ⵛⴻⴽ ⵇⴰⴷⴰⵏ, ⴰ ⵙⵉⴷⵉ, ⵅⵎⵉ ⵜⵜⴻⵙⵍⴰⵏ ⴰⵡⴰⵍⴻⵏ ⵣⴻⴳ ⵓⵇⴻⵎⵎⵓⵎ ⵏⵏⴻⵛ. 5 ⴰⴷ ⵖⴻⵏⵏⵊⴻⵏ ⵅ ⵉⴱⵔⵉⴷⴻⵏ ⵏ ⵙⵉⴷⵉ, ⵎⴰⵖⴰⵔ ⴰⵄⵓⴵⵉ ⵏ ⵙⵉⴷⵉ ⴷ ⴰⵎⴻⵇⵇⵔⴰⵏ. 6 ⵎⴰⵖⴰⵔ ⵡⴰⵅⵅⴰ ⵉⵜⵜⵡⴰⵙⵙⵓⵄⵍⴰ ⵙⵉⴷⵉ ⴰⵟⵟⴰⵙ, ⵄⴰⴷ ⵉⵅⴻⵣⵣⴰⵔ-ⴷⴷ ⵖⴰⵔ ⵓⵎⵡⴰⴹⴻⵄ, ⵎⴰⵛⴰ ⴱⵓ-ⵏⵏⴼⴰⵅⴻⵜ ⵉⵙⵙⴻⵏ ⵉ-ⵜ ⵣⵉ ⵍⴰⴳⴳⵯⴰⵊ. 7 ⵎⴰⵍⴰ ⵓⵢⵓⵔⴻⵖ ⴷⵉ ⵍⵡⴻⵙⵟ ⵏ ⵍⴻⵃⵚⴰⵔⴻⵜ, ⴰⴷ ⴰⵢⵉ ⴷⴷ-ⵜᵉⵜⵜⴰⵔⵔⴻⴷ ⵖⴰⵔ ⵜⵓⴷⴰⵔⵜ. ⵛⴻⴽ ⵜⴻⵙⵙⵡⵉⵥⵥⴹⴻⴷ ⴰⴼⵓⵙ ⵏⵏⴻⵛ ⴹⵉⴷⴷ ⵉ ⵡⴻⵖⴹⴰⴱ ⵏ ⵍⵄⴻⴷⵢⴰⵏ ⵉⵏⵓ, ⴰⴼⵓⵙ ⵏⵏⴻⵛ ⴰⴼⵓⵙⵉ ⵉⵙⵙⴻⵏⵊⴻⵎ ⴰⵢⵉ. 8 ⵙⵉⴷⵉ ⴰⴷ ⵜ ⵉⴽⴻⵎⵎⴻⵍ ⵉ ⵏⴻⵛⵛ. ⴰ ⵙⵉⴷⵉ, ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ, ⵍⴻⴼⵄⴰⵢⴻⵍ ⵏ ⵉⴼⴰⵙⵙⴻⵏ ⵏⵏⴻⵛ ⵡⴰⵔ ⵜⴻⵏ ⵜⴰⵔⴻⵅⵅⵓⴷ.