ⵉⵥⴻⵀⵀⵉⴷⴻⵏ 25

1 ⴰⵣⴻⵀⵀⴻⴷ ⵏ ⴷⴰⵡⵓⴷ. ⴰⵍⵉⴼ. ⴰ ⵙⵉⴷⵉ, ⵖⴰⵔⴻⴽ ⵉ ⴷⴷ-ⵙⵙⴳⴻⵄⵄⴰⴷⴻⵖ ⵍⴻⵄⵎⴰⵔ ⵉⵏⵓ. 2 ⴱⵉⵜ. ⴰ ⴰⵔⴻⴱⴱⵉ ⵉⵏⵓ, ⵏⴻⵛⵛ ⵜⵜⴻⵛⵍⴻⵖ ⵅⴰⴽ. ⴻⵊⵊ ⴰⵢⵉ ⵡⴰⵔ ⵜⵜⵙⴻⴹⵃⵉⵖ, ⴻⵊⵊ ⵍⵄⴻⴷⵢⴰⵏ ⵉⵏⵓ ⵡⴰⵔ ⵅⴰⴼⵉ ⵜⵜⴻⵙⵍⵉⵡⵍⵉⵡⴻⵏ ⵙ ⵍⴻⴼⵔⴰⵃⴻⵜ. 3 ⴳⵉⵎⴻⵍ. ⵡⴰⵀ, ⵎⴰⵔⵔⴰ ⵉⵏⵏⵉ ⵛⴻⴽ ⵉⵜⵜⵔⴰⵊⴰⵏ ⵡⴰⵔ ⵜⵜⵙⴻⴹⵃⵉⵏ. ⵉⵏⵏⵉ ⵉⴳⴳⵉⵏ ⵙ ⵍⴻⵖⴷⴰⵔ ⴱⵍⴰ ⵙⵙⵉⴱⴱⴻⵜ, ⴰⴷ ⵙⴻⴹⵃⴻⵏ. 4 ⴷⴰⵍⵉⵜ. ⴰ ⵙⵉⴷⵉ, ⵙⵛⴻⵏ ⴰⵢⵉ ⵉⴱⵔⵉⴷⴻⵏ ⵏⵏⴻⵛ, ⵙⵖⴰⵔ ⴰⵢⵉ ⵉⵎⴻⵙⵔⴰⵇ ⵏⵏⴻⵛ. 5 ⵀⵉ. ⵏⴷⴻⵀ ⴰⵢⵉ ⴷⵉ ⵜⵉⴷⴻⵜⵜ ⵏⵏⴻⵛ ⵓ ⵙⵖⴰⵔ ⴰⵢⵉ, ⵎⵉⵏⵣⵉ ⵛⴻⴽ ⴷ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ, ⵏⴻⵛⵛ ⵙⵙⵉⵜⵉⵎⴻⵖ ⴷⴰⵢⴻⴽ ⴰⵙⵙ ⵎⴰⵔⵔⴰ. 6 ⵣⴰⵢⵉⵏ. ⵄⵇⴻⵍ, ⴰ ⵙⵉⴷⵉ, ⵅ ⴰⵔⵔⴻⵃⵎⴻⵜ ⵏⵏⴻⵛ, ⵅ ⵜⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⵎⴰⵖⴰⵔ ⴰⵇⴰ ⴰⵜⴻⵏⵜ ⴵⴰⵏⵜ ⵣⵉ ⵍⴻⴱⴷⴰ. 7 ⵅⵉⵜ. ⵡⴰⵔ ⵜⵜⵉⴷⴰⵔ ⵛⴰ ⴷⴷⵏⵓⴱ ⵏ ⵜⴻⵎⵥⵉ ⵉⵏⵓ ⵓⵍⴰ ⴷ ⵉⵅⴻⵟⵟⴰⵏ ⵉⵏⵓ. ⵅⴻⵎⵎ ⵎⴰⵛⴰ ⵖⴰⵔⵉ ⴷⵉ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⴷⵉ ⵟⵟⵡⴻⵄ ⵏ ⵜⵛⵓⵏⵉ ⵏⵏⴻⵛ, ⴰ ⵙⵉⴷⵉ. 8 ⵜⵉⵜ. ⵙⵉⴷⵉ ⵉⵚⴱⴻⵃ, ⵉⵛⵏⴰ, ⵅ ⵓⵢⴰ ⴰⴷ ⵉⵙⵙⵖⴰⵔ ⴰⴱⵔⵉⴷ ⵉ ⵉⵎⴻⴷⵏⴰⴱ. 9 ⵢⵓⴷ. ⵏⴻⵜⵜⴰ ⴰⴷ ⵉⴳⴻⵡⵡⴻⴷ ⵉⵎⵀⵉⵏⴻⵏ ⵙ ⵍⵃⴻⵇⵇ, ⵏⴻⵜⵜⴰ ⴰⴷ ⵉⵙⵙⴻⵍⵎⴻⴷ ⴰⴱⵔⵉⴷ ⵏⵏⴻⵙ ⵉ ⵉⵎⵀⵉⵏⴻⵏ. 10 ⴽⴰⴼ. ⵎⴰⵔⵔⴰ ⵉⵎⴻⵙⵔⴰⵇ ⵏ ⵙⵉⴷⵉ ⴰⵇⴰ ⴰⵜⴻⵏ ⴷ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ, ⵉ ⵢⵉⵏⵏⵉ ⵉⵃⴻⵟⵟⴰⵏ ⵍⵄⴰⵀⴷ ⵏⵏⴻⵙ ⴷ ⵛⵛⴰⵀⴰⴷⴰⵜ ⵏⵏⴻⵙ. 11 ⵍⴰⵎⵉⴷ. ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⵛ, ⴰ ⵙⵉⴷⵉ, ⵖⴼⴰⵔ ⵍⵎⵓⵄⵚⵉⵢⵢⴻⵜ ⵉⵏⵓ, ⵎⴰⵖⴰⵔ ⴰⵇⴰ-ⵜⵜ ⴷ ⴰⵟⵟⴰⵙ. 12 ⵎⵉⵎ. ⵎⴰⵏ ⵡⴻⵏ ⴷ ⴰⵔⵢⴰⵣ ⵉ ⵉⵜⵜⴻⴳⴳⵯⴻⴷⴻⵏ ⵙⵉⴷⵉ? ⵏⴻⵜⵜⴰ ⴰⴷ ⴰⵙ ⵉⵙⵙⴻⵍⵎⴻⴷ ⴰⴱⵔⵉⴷ ⵉ ⵉⵜⵜⵅⴻⵚⵚⴰ ⴰⴷ ⵉⵅⴹⴰⵔ. 13 ⵏⵓⵏ. ⵍⴻⵄⵎⴰⵔ ⵏⵏⴻⵙ ⴰⴷ ⵉⵙⵙⴻⵏⵙ ⴷⵉ ⵍⵅⵉⵔ, ⵜⴰⵔⵡⴰ ⵏⵏⴻⵙ ⴰⴷ ⵜⵡⴰⵔⵜ ⵜⴰⵎⵎⵓⵔⵜ. 14 ⵙⴰⵎⵉⵅ. ⵍⴰⵎⴰⵏ ⵉ ⴷⵉⵏ ⵏ ⵙⵉⴷⵉ ⵉ ⵢⵉⵏⵏⵉ ⵣⵣⴰⵢⴻⵙ ⵉⵜⵜⴻⴳⴳⵯⴻⴷⴻⵏ, ⵍⵄⴰⵀⴷ ⵏⵏⴻⵙ ⴰⵇⴰ-ⵜ ⴷⵉⵏ ⵎⴰⵃⴻⵏⴷ ⴰⴷ ⴰⵙⴻⵏ ⵜ ⵉⵙⵙⴰⵔⴳⴻⴱ. 15 ⵄⴰⵢⵉⵏ. ⵜⵉⵟⵟⴰⵡⵉⵏ ⵉⵏⵓ ⵍⴻⴱⴷⴰ ⴷⵉ ⵙⵉⴷⵉ, ⵎⵉⵏⵣⵉ ⵏⴻⵜⵜⴰ ⴰⴷ ⵉⴼⴻⴽⴽ ⵉⴹⴰⵔⴻⵏ ⵉⵏⵓ ⵣⵉ ⵜⵔⴰⵛⵛⴰ. 16 ⴱⵉ. ⴰⵔⵔ-ⴷⴷ ⵖⴰⵔⵉ ⵙ ⵡⵓⴷⴻⵎ ⵏⵏⴻⵛ, ⵃⵉⵏⵏ ⵅⴰⴼⵉ, ⵎⴰⵖⴰⵔ ⵏⴻⵛⵛ ⴰⵇⴰ ⴰⵢⵉ ⵡⴻⵃⵃⴷⵉ ⵓ ⴷⵉ ⵍⴻⵖⴱⴻⵏ. 17 ⵜⵙⴰⴷⵉ. ⵍⴻⵃⵚⴰⵔⴰⵜ ⵏ ⵡⵓⵍ ⵉⵏⵓ ⴰⵇⴰ ⵎⵎⴰⵔⵏⵉⵏⵜ. ⵙⵓⴼⴼⴻⵖ ⴰⵢⵉ ⵣⵉ ⴷⴷⵉⵇⴰⵜ ⵉ ⴷ ⴰⵢⵉ. 18 ⵔⵉⵅ. ⵅⵣⴰⵔ-ⴷⴷ ⵖⴰⵔ ⵍⴻⵖⴱⴻⵏ ⵉⵏⵓ ⴷ ⵡⴰⵔⴱⴻⵔ ⵉⵏⵓ, ⴽⵙⵉ ⵅⴰⴼⵉ ⵎⴰⵔⵔⴰ ⴷⴷⵏⵓⴱ ⵉⵏⵓ. 19 ⵔⵉⵅ. ⵅⵣⴰⵔ ⵖⴰⵔ ⵍⵄⴻⴷⵢⴰⵏ ⵉⵏⵓ, ⵎⵉⵏⵣⵉ ⵜⵜⵡⴰⴽⴻⵜⵜⴰⵔⴻⵏ, ⵏⵉⵜⵏⵉ ⵛⴰⵔⵔⵀⴻⵏ ⴰⵢⵉ ⵙ ⵢⵉⵊⵊ ⵏ ⵡⴻⵛⵔⴰⵀ ⵉⵇⴻⵙⵃⴻⵏ. 20 ⵛⵉⵏ. ⵃⴹⴰ ⵅ ⵍⴻⵄⵎⴰⵔ ⵉⵏⵓ ⵓ ⴼⴻⴽⴽ ⴰⵢⵉ! ⵡⴰⵔ ⴷ ⴰⵢⵉ ⵜⵜⴻⵊⵊⵉ ⵛⴰ ⴰⴷ ⵙⴻⴹⵃⵉⵖ, ⵎⵉⵏⵣⵉ ⵖⴰⵔⴻⴽ ⵉ ⵖⴰ ⴰⵔⴻⴽⴽⵡⴰⵍⴻⵖ. 21 ⵜⴰⴼ. ⴰⴷ ⵜⴻⵃⴹⴰ ⴰⵢⵉ ⵍⴻⴽⵎⴰⵔⴻⵜ ⴷ ⵍⴻⵚⴼⴰⵢⴻⵜ, ⵎⴰⵖⴰⵔ ⵙⵙⵉⵜⵉⵎⴻⵖ ⴷⴰⵢⴻⴽ. 22 ⴰ ⴰⵔⴻⴱⴱⵉ, ⴼⴷⵉ ⵉⵙⵔⴰⵉⵍ ⵣⵉ ⵎⴰⵔⵔⴰ ⵍⴻⵃⵚⴰⵔⴰⵜ ⵏⵏⴻⵙ.