ⵉⵥⴻⵀⵀⵉⴷⴻⵏ 34

1 ⵏ ⴷⴰⵡⵓⴷ, ⵓⵎⵉ ⵉⵙⵙⵏⵉⵄⵎⵉⵍ, ⵉⴳⴳⴰ ⵉⵅⴻⴼ ⵏⵏⴻⵙ ⴷ ⴰⴱⵓⵀⴰⵍⵉ ⵣⵣⴰⵜ ⵉ ⵡⵓⴷⴻⵎ ⵏ ⴰⴱⵉⵎⵉⵍⵉⴽ, ⵡⴻⵏⵏⵉ ⵉ ⵅⴰⵙ ⵢⵓⵥⵥⵍⴻⵏ ⴰⵍⴰⵎⵉ ⵢⵓⵢⵓⵔ ⵏⴻⵜⵜⴰ. 2 ⴰⵍⵉⴼ. ⵏⴻⵛⵛ ⵅⵙⴻⵖ ⴰⴷ ⴱⴰⵔⴽⴻⵖ ⵉ ⵙⵉⴷⵉ ⵍⴻⴱⴷⴰ, ⴰⵚⴻⴱⴱⵉⵃ ⵏⵏⴻⵙ ⴰⴷ ⵢⵉⵍⵉ ⴷⴻⴳ ⵓⵇⴻⵎⵎⵓⵎ ⵉⵏⵓ ⴱⵍⴰ ⵇⴻⵟⵟⵓ. 3 ⴱⵉⵜ. ⵍⴻⵄⵎⴰⵔ ⵉⵏⵓ ⴰⴷ ⵉⵚⴻⴱⴱⴻⵃ ⵉ ⵙⵉⴷⵉ. ⵉⵎⵀⵉⵏⴻⵏ ⴰⴷ ⴰⵙ ⵙⵍⴻⵏ ⵓ ⴰⴷ ⴼⴰⵔⵃⴻⵏ. 4 ⴳⵉⵎⴻⵍ. ⵙⴻⵎⵖⴰⵔⴻⵎ ⴰⴽⵉⴷⵉ ⵙⵉⴷⵉ, ⴻⵊⵊ ⴰⵏⴻⵖ ⴰⴷ ⵏⴻⵙⵙⵓⵄⵍⴰ ⵉⵙⴻⵎ ⵏⵏⴻⵙ ⵊⵎⵉⵄ. 5 ⴷⴰⵍⵉⵜ. ⵏⴻⵛⵛ ⴰⵔⵣⵓⵖ ⵅ ⵙⵉⴷⵉ ⵓ ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⴼⵉ, ⵉⴼⴻⴽⴽ ⴰⵢⵉ ⵣⵉ ⵎⴰⵔⵔⴰ ⵉⵏⵏⴻⵅⵍⵉⵄⴻⵏ ⵉⵏⵓ. 6 ⵀⵉ. ⵏⵉⵜⵏⵉ ⵅⴻⵣⵣⴰⵔⴻⵏ ⵖⴰⵔⴻⵙ ⵓⵛⴰ ⵛⴻⵄⵛⴻⵄⴻⵏ, ⵉⵖⴻⵎⴱⴰⴱ ⵏⵙⴻⵏ ⵡⴰⵔ ⴷⴷⵉⴽⴽⵡⵉⵍⴻⵏ ⵣⴻⵡⵖⴻⵏ ⵙ ⵓⵙⴻⴹⵃⵉ ⵄⴻⵎⵎⴰⵔⵚ. 7 ⵣⴰⵢⵉⵏ. ⵍⵎⴻⵙⴽⵉⵏ-ⴰ ⴷⴰⵏⵉⵜⴰ ⵉⵍⴰⵖⴰ ⵓ ⵙⵉⴷⵉ ⵉⵙⵍⴰ ⵖⴰⵔⴻⵙ, ⵉⴼⴻⴽⴽ ⵉ-ⵜ ⵣⵉ ⵎⴰⵔⵔⴰ ⵍⴻⵃⵚⴰⵔⴰⵜ ⵏⵏⴻⵙ. 8 ⵅⵉⵜ. ⵍⵎⴰⵍⴰⴽ ⵏ ⵙⵉⴷⵉ ⵉⵇⵓⵡⵡⴰⵔ ⵙ ⵍⵎⴰⵔⴳⴻⵃ ⵏⵏⴻⵙ ⵅ ⵢⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ, ⵏⴻⵜⵜⴰ ⵉⴼⴻⴽⴽ ⵉ-ⵜⴻⵏ. 9 ⵜⵉⵜ. ⵇⴰⵙⴻⵎ ⵓⵛⴰ ⵅⵣⴰⵔⴻⵎ, ⴰⵇⴰ ⵙⵉⴷⵉ ⵉⵛⵏⴰ. ⵙⵙⴻⵄⴷ ⵏ ⵡⴻⵔⵢⴰⵣ ⵡⴻⵏⵏⵉ ⵖⴰⵔⴻⵙ ⵢⴰⵔⴻⴽⴽⵡⴰⵍⴻⵏ. 10 ⵢⵓⴷ. ⴳⴳⵯⴻⴷⴻⵎ ⵙⵉⴷⵉ, ⴰ ⴽⴻⵏⵏⵉⵡ, ⵉⵎⵇⴻⴷⴷⴰⵙⴻⵏ ⵏⵏⴻⵙ, ⵎⴰⵖⴰⵔ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ ⵡⴰⵔ ⵜⴻⵏ ⵉⵜⵜⵅⴻⵚⵚⵉ ⵡⴰⵍⵓ. 11 ⴽⴰⴼ. ⵉⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵜⵜⴻⵃⵡⴰⵊⴻⵏ, ⴷⴰⵢⵙⴻⵏ ⵍⴰⵥ, ⵎⴰⵛⴰ ⵉⵏⵏⵉ ⵢⴰⵔⴻⵣⵣⵓⵏ ⵅ ⵙⵉⴷⵉ, ⵡⴰⵔ ⵜⴻⵏ ⵉⵜⵜⵅⴻⵚⵚⵉ ⵡⴰⵍⵓ ⵣⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷ ⵍⵅⴰⵔ. 12 ⵍⴰⵎⵉⴷ. ⴰⵙⴻⵎ-ⴷⴷ, ⴰ, ⴽⴻⵏⵏⵉⵡ ⵉⵃⴻⵏⵊⵉⵔⴻⵏ, ⵙⵍⴻⵎ-ⴷⴷ ⵖⴰⵔⵉ! ⵏⴻⵛⵛ ⴰⴷ ⴰⵡⴻⵎ ⵙⵙⵍⴻⵎⴷⴻⵖ ⵜⵉⴳⴳⵯⵓⴷⵉ ⵏ ⵙⵉⴷⵉ. 13 ⵎⵉⵎ. ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵔⵢⴰⵣ ⵡⴻⵏⵏⵉ ⴷⵉ ⵉⴵⴰ ⵎⴻⵥⵔⵉ ⴷⵉ ⵜⵓⴷⴰⵔⵜ, ⵡⴻⵏⵏⵉ ⵉⵜⵜⴻⵅⵙⴻⵏ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⵃⵉⵎⴰ ⴰⴷ ⵉⵥⴰⵔ ⵍⵅⴰⵔ? 14 ⵏⵓⵏ. ⵎⵏⴻⵄ ⵉⵍⴻⵙ ⵏⵏⴻⵛ ⵣⵉ ⵍⵖⴰⵔ, ⵓⵍⴰ ⴷ ⵉⵢⴻⵏⵛⵉⵛⴻⵏ ⵏⵏⴻⵛ ⵣⴻⴳ ⵡⴰⵡⴰⵍ ⵏ ⵍⵖⴻⵛⵛ. 15 ⵙⴰⵎⵉⵅ. ⵃⴻⵢⵢⴻⴷ ⵅ ⵜⵓⵄⴻⴼⴼⵏⴰ ⵓ ⴻⴳⴳ ⵍⵅⴰⵔ, ⴰⵔⵣⵓ ⵅ ⵍⴻⵀⵏⴰ ⵓ ⴹⴼⴰⵔ ⵉ-ⵜ. 16 ⵄⴰⵢⵉⵏ. ⵜⵉⵟⵟⴰⵡⵉⵏ ⵏ ⵙⵉⴷⵉ ⵅ ⵉⵎⵙⴻⴳⴳⴰⴷⴻⵏ, ⵉⵎⴻⵣⵣⵓⵖⴻⵏ ⵏⵏⴻⵙ ⵎⴻⵢⵢⵍⴻⵏ ⵖⴰⵔ ⵉⵖⵓⵢⵢⴰⵏ ⵏⵙⴻⵏ. 17 ⴱⵉ. ⵓⴷⴻⵎ ⵏ ⵙⵉⴷⵉ ⴹⵉⴷⴷ ⵉ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ, ⵃⵉⵎⴰ ⴰⴷ ⵉⴽⴽⴻⵙ ⵍⵉⴷⴰⵔⴻⵜ ⴷⴰⵢⵙⴻⵏ ⵣⵉ ⵜⴻⵎⵎⵓⵔⵜ. 18 ⵜⵙⴰⴷⵉ. ⵏⵉⵜⵏⵉ ⵍⴰⵖⴰⵏ ⵓ ⵙⵉⴷⵉ ⵉⵙⵍⴰ ⵖⴰⵔⵙⴻⵏ, ⵏⴻⵜⵜⴰ ⵉⴼⴻⴽⴽ ⵉ-ⵜⴻⵏ ⵣⵉ ⵎⴰⵔⵔⴰ ⵍⴻⵃⵚⴰⵔⴰⵜ ⵏⵙⴻⵏ. 19 ⵇⵓⴼ. ⵙⵉⴷⵉ ⵢⵓⴷⴻⵙ ⵉ ⵎⴰⵔⵔⴰ ⵉⵏⵏⵉ ⵓⵎⵉ ⵉⵜⵜⵡⴰⵔⵥ ⵡⵓⵍ ⵏⵙⴻⵏ, ⵉⵙⵙⴻⵏⵊⴰⵎ ⵉⵏⵏⵉ ⵓⵎⵉ ⵉⵜⵜⵡⴰⵍⴱⴻⵣ ⴱⵓⵃⴱⴻⵍ ⵏⵙⴻⵏ. 20 ⵔⵉⵅ. ⴰⵟⵟⴰⵙ ⵉⴵⴰⵏ ⵉⴼⴻⵇⵇⵓⵙⴻⵏ ⵏ ⵉⵎⵙⴻⴳⴳⴰⴷⴻⵏ, ⵎⴰⵛⴰ ⵙⵉⴷⵉ ⵉⴼⴻⴽⴽ ⵉ-ⵜⴻⵏ ⵣⵣⴰⵢⵙⴻⵏ ⵎⴰⵔⵔⴰ. 21 ⵛⵉⵏ. ⵏⴻⵜⵜⴰ ⵉⵃⴻⵟⵟⴰ ⵉⵖⵙⴰⵏ ⵏⵏⴻⵙ ⵎⴰⵔⵔⴰ, ⵓⵍⴰ ⴷ ⵉⵊⵊ ⵣⵣⴰⵢⵙⴻⵏ ⵡⴰⵔ ⵉⵜⵜⴰⵔⴻⵥⵥⵉ. 22 ⵜⴰⴼ. ⴰⵇⴰ ⵍⵖⴰⵔ ⴰⴷ ⵉⵏⴻⵖ ⴰⵄⴻⴼⴼⴰⵏ, ⵉⵏⵏⵉ ⵉⵛⴰⵔⵔⵀⴻⵏ ⴰⵎⵙⴻⴳⴳⴻⴷ ⴰⴷ ⵜⵜⵡⴰⵄⴰⵇⴱⴻⵏ. 23 ⵙⵉⴷⵉ ⴰⴷ ⵉⴼⴷⵉ ⵍⴻⵄⵎⴰⵔ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵎⴰⵔⵔⴰ ⵉⵏⵏⵉ ⵖⴰⵔⴻⵙ ⵢⴰⵔⴻⴽⴽⵡⴰⵍⴻⵏ, ⵡⴰⵔ ⵜⵜⵡⴰⵄⴰⵇⴱⴻⵏ.