ⵉⵥⴻⵀⵀⵉⴷⴻⵏ 68

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵏ ⴷⴰⵡⵓⴷ. ⴰⵣⴻⵀⵀⴻⴷ. ⵉⵣⵍⵉ. 2 ⴰⵔⴻⴱⴱⵉ ⴰⴷ ⵉⴽⴽⴰⵔ, ⵍⵄⴻⴷⵢⴰⵏ ⵏⵏⴻⵙ ⴰⴷ ⵜⵜⵡⴰⵔⴻⵢⵢⵛⴻⵏ, ⵉⵏⵏⵉ ⵜ ⵉⵛⴰⵔⵔⵀⴻⵏ ⴰⴷ ⴰⵔⴻⵡⵍⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ. 3 ⵛⴻⴽ ⴰⴷ ⵜⴻⵏ ⵜⴻⵙⵙⵉⴳⴳⵯⴻⵊⴻⴷ ⴰⵎ ⴷⴷⴻⵅⵅⴰⵏ ⵉⵟⵟⴰⵡ, ⴰⵎ ⵛⵛⵎⴻⵄ ⵉⴼⴻⵙⵙⵉ ⴷⵉ ⵜⵎⴻⵙⵙⵉ, ⴰⵎⵎⵓ ⵉ ⵖⴰ ⴼⵏⴰⵏ ⵉⵄⴻⴼⴼⴰⵏⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ. 4 ⵉⵎⵙⴻⴳⴳⴰⴷⴻⵏ ⴰⴷ ⴼⴰⵔⵃⴻⵏ, ⴰⴷ ⵙⵍⵉⵡⵍⵉⵡⴻⵏ ⵙ ⵍⴻⴼⵔⴰⵃⴻⵜ ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ ⵓ ⴰⴷ ⵖⴻⴱⴱⴰⵏ ⵍⴻⴼⵔⴰⵃⴻⵜ. 5 ⵖⴻⵏⵏⵊⴻⵎ ⵉ ⴰⵔⴻⴱⴱⵉ, ⵣⴻⵀⵀⴷⴻⵎ ⵉ ⵢⵉⵙⴻⵎ ⵏⵏⴻⵙ, ⴳⴳⴻⵎ ⵉⵊⵊ ⵏ ⵡⴻⴱⵔⵉⴷ ⵢⵓⵄⵍⴰⵏ ⵉ ⵡⴻⵏⵏⵉ ⵉⵏⴻⴷⴷⵀⴻⵏ ⴷⵉ ⵍⴻⵡⴹⴰ. ⵙⵉⴷⵉ ⴷ ⵉⵙⴻⵎ ⵏⵏⴻⵙ. ⵏⴻⴳⵣⴻⵎ ⵙ ⵍⴻⴼⵔⴰⵃⴻⵜ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ. 6 ⴱⴰⴱⴰⵜⵙⴻⵏ ⵏ ⵉⵢⵓⵊⵉⵍⴻⵏ ⴷ ⵍⵇⴰⴹⵉ ⵏ ⵜⵉⵊⵊⴰⵍ, ⴰⵎⵎⵓ ⵉ ⵢⴻⴵⴰ ⴰⵔⴻⴱⴱⵉ ⴷⵉ ⵜⵣⴻⴷⴷⵉⵖⵜ ⵏⵏⴻⵙ ⵉⵇⴻⴷⴷⵙⴻⵏ, 7 ⴰⵎⵎⵓ ⵉ ⵢⴻⴵⴰ ⴰⵔⴻⴱⴱⵉ ⵡⴻⵏⵏⵉ ⵉⵙⵙⵣⴻⴷⴷⴰⵖⴻⵏ ⵉⵏⵏⵉ ⵡⴻⵃⵃⴻⴷⵙⴻⵏ ⴷⴻⴳ ⵉⵛⵜ ⵏ ⵜⵡⴰⵛⵓⵏⵜ, ⵡⴻⵏⵏⵉ ⵉⵙⵙⵓⴼⴼⵓⵖⴻⵏ ⵉⵎⴻⵃⴱⴰⵙ ⵙ ⵓⴼⵍⴰⵃ, ⵎⴰⵛⴰ ⵉⵎⵖⴻⵡⵡⴰⵖⴻⵏ ⴰⴷ ⵣⴻⴷⵖⴻⵏ ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵙⵙⵛⴻⵎⴹⴻⵏ ⵣⵉ ⵜⴼⵓⵛⵜ. 8 ⴰ ⴰⵔⴻⴱⴱⵉ, ⴰⵍⴰⵎⵉ ⵜⵉⵣⵣⴰⵔⴻⴷ ⵣⵣⴰⵜ ⵉ ⵡⵓⴷⴻⵎ ⵏ ⵍⴳⴻⵏⵙ ⵏⵏⴻⵛ, ⴰⵍⴰⵎⵉ ⵜⵓⵖⴰ ⵜⴻⴳⴳⵓⵔⴻⴷ ⴷⵉ ⵜⵏⴻⵣⵔⵓⴼⵜ - ⵙⵉⵍⴰⵀ - 9 ⵜⴻⵏⵀⴻⵣⵣ ⵜⴻⵎⵎⵓⵔⵜ ⵓⵛⴰ ⵓⵛⵔⵓⵔⴻⵏ ⵉⵊⴻⵏⵡⴰⵏ, ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ, ⵓⵍⴰ ⴷ ⴰⴷⵔⴰⵔ ⵏ ⵙⵉⵏⴰ ⵉⵏⵀⴻⵣⵣ ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ. 10 ⴰⴽ-ⴷ ⵡⴻⵏⵥⴰⵔ ⵉⴼⵙⵓⵙⴻⵏ ⵜⵔⵓⵛⵛⴻⴷ ⵜⴰⵎⵎⵓⵔⵜ, ⴰ, ⴰⵔⴻⴱⴱⵉ, ⵅⵎⵉ ⵉ ⵖⴰ ⵉⵙⵍⴰⵡ ⵍⵡⴰⵔⵜ ⵏⵏⴻⵛ, ⵜⴻⵡⵛⵉⴷ ⴰⵙ ⵛⴻⴽ ⵄⴰⵡⴻⴷ ⵊⵊⴻⵀⴷ. 11 ⵜⴰⵃⵉⵎⴰⵔⵜ ⵏⵏⴻⵛ ⵜⵓⵖⴰ ⵜⵣⴻⴷⴷⴻⵖ ⴷⴰⵢⴻⵙ. ⵙ ⵜⵛⵓⵏⵉ ⵏⵏⴻⵛ ⵜⴻⵙⵙⵡⴻⵊⴷⴻⴷ ⵜⵜ ⵉ ⵍⵎⴻⵙⴽⵉⵏ, ⴰ ⴰⵔⴻⴱⴱⵉ! 12 ⵙⵉⴷⵉ ⵉⵏⵓ ⵉⵡⵛⴰ ⴰⵡⴰⵍ, ⵜⵉⵎⵖⴰⵔⵉⵏ ⵏⵏⵉ ⴷⴷ-ⵉⵜⵜⴰⵡⵢⴻⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵜⵜⴽⴻⵡⵡⵏⴻⵏⵜ ⵉⵊⵊ ⵏ ⵓⴱⴰⵔⵔⵓ ⴰⵎⴻⵇⵇⵔⴰⵏ ⵏ ⵜⵔⴻⵇⵇⴰⵙⵉⵏ. 13 ⵉⵊⴻⴵⵉⴷⴻⵏ ⵏ ⵍⵄⴻⵙⴽⴰⵔⴰⵜ ⵜⵜⵔⴰⴽⴽⵡⴰⵍⴻⵏ, ⴰⵇⴰ ⵜⵜⵔⴰⴽⴽⵡⴰⵍⴻⵏ, ⵓ ⵜⴻⵏⵏⵉ ⵉⵇⵇⵉⵎⴻⵏ ⴷⵉ ⵜⴰⴷⴷⴰⵔⵜ, ⵜⴱⴻⵟⵟⴰ ⵜⴰⴽⴻⵛⵛⴰⴹⵜ. 14 ⵎⴰ ⴽⴻⵏⵏⵉⵡ ⵡⴰⵔ ⵜⴻⴱⴱⵓⵣⵣⵍⴻⵎ ⵊⴰⵔ ⵜⵏⴰⵢⴻⵏ ⵏ ⵜⴰⵔⵢⵉⵡⵉⵏ, ⴰⵎ ⵡⴻⴷⴱⵉⵔ ⵊⴰⵔ ⵡⴰⴼⵔⵉⵡⴻⵏ ⵏⵏⴻⵙ ⵉ ⵉⵜⵜⵡⴰⵍⴻⵃⵃⴼⴻⵏ ⵙ ⵏⵏⵓⵇⴰⵔⵜ, ⵊⴰⵔ ⴰⵔⵔⵉⵛ ⵏⵏⴻⵙ ⵙ ⵡⵓⵔⴻⵖ ⴰⵣⵉⵣⴰ ⵉⵜⵜⵉⵙⵙⵉⵇⴻⵏ, 15 ⵍⴰⵎⵉ ⴰⵎⵣⴻⵎⵎⴰⵔ ⵅ ⴽⵓⵍⵛⵉ ⵉⵙⵙⴰⵔⴻⵢⵢⴻⵛ ⵉⵊⴻⴵⵉⴷⴻⵏ ⴷⵉ ⵜⴻⵎⵎⵓⵔⵜ, ⵉⵛⵛⴰⵜ ⵡⴻⴷⴼⴻⵍ ⵅ ⵚⴰⵍⵎⵓⵏ. 16 ⴰⴷⵔⴰⵔ ⵏ ⴰⵔⴻⴱⴱⵉ! ⴰⴷⵔⴰⵔ ⵏ ⴱⴰⵛⴰⵏ! ⴰⴷⵔⴰⵔ ⵏ ⴱⴰⵛⴰⵏ ⴷ ⵉⵊⵊ ⵏ ⵡⴻⴷⵔⴰⵔ ⵙ ⵜⵇⵉⵛⵛⵉⵜⵉⵏ ⴰⵟⵟⴰⵙ. 17 ⵎⴰⵢⴻⵎⵎⵉ ⵜⵅⴻⵣⵣⴰⵔⴻⵎ ⴰⵎⵎⵓ ⵙ ⵡⴰⵙⴰⵎ, ⴽⴻⵏⵏⵉⵡ ⴰ ⵉⴷⵓⵔⴰⵔ ⵙ ⵎⴰⵔⵔⴰ ⵜⵉⵇⵉⵛⵛⵉⵜⵉⵏ ⵏⵡⴻⵎ, ⵖⴰⵔ ⵡⴻⴷⵔⴰⵔ ⵉ ⵉⵎⴻⵥⵔⵉ ⵉ-ⵜ ⴰⵔⴻⴱⴱⵉ ⴷ ⵜⴰⵣⴻⴷⴷⵉⵖⵜ ⵉ ⵢⵉⵅⴻⴼ ⵏⵏⴻⵙ? ⵡⴰⵀ, ⵏⵉⵛⴰⵏ ⵙⵉⴷⵉ ⴰⴷ ⴷⵉⵏ ⵉⵣⴷⴻⵖ ⵉ ⵍⴻⴱⴷⴰ. 18 ⵉⴽⴰⵔⵔⵓⵜⴻⵏ ⵏ ⴰⵔⴻⴱⴱⵉ ⴰⵇⴰ ⴰⵜⴻⵏ ⴷ ⵄⴻⵛⵔⴰⵢⴰⵜ ⵏ ⵍⵓⵍⵓⴼ ⴷ ⵄⴻⵛⵔⴰⵢⴰⵜ ⵏ ⵍⵓⵍⵓⴼ, ⵓⵍⴰ ⴷ ⴰⵍⴻⴼ ⵓ ⵄⴰⵡⴻⴷ ⴰⵍⴻⴼ. ⵙⵉⴷⵉ ⵉⵏⵓ ⴰⵇⴰ-ⵜ ⵊⴰⵔ ⴰⵙⴻⵏ, ⴰⴷⵔⴰⵔ ⵏ ⵙⵉⵏⴰ ⴰⵇⴰ ⵉⵜⵜⵡⴰⵍⴻⵃⵃⴻⴼ ⵙ ⵜⵇⴻⴷⴷⴰⵙⵜ. 19 ⵛⴻⴽ ⵜⵓⵍⵢⴻⴷ ⵖⴰⵔ ⵙⴻⵏⵏⴻⵊ, ⵜⵏⴻⴷⵀⴻⴷ ⵉⵎⴻⵃⴱⴰⵙ ⴷⵉ ⵜⵎⴻⵃⴱⴰⵙⵜ, ⵛⴻⴽ ⵜⵎⴻⵏⵄⴻⴷ ⵜⴰⵔⵣⵉⴼⵉⵏ ⵣⴻⴳ ⵉⵡⴷⴰⵏ, ⵉⵡⴰ ⵄⴰⴷ ⵣⴻⴳ ⵉⵎⵖⴻⵡⵡⵖⴻⵏ, ⵃⵉⵎⴰ ⵙⵉⴷⵉ, ⴰⵔⴻⴱⴱⵉ, ⴰⴷ ⵉⵣⴷⴻⵖ ⴷⵉⵏⵏⵉ. 20 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵉⵏⵓ. ⴰⵙⵙ ⵅ ⵡⴰⵙⵙ ⵢⴰⵔⴻⴱⴱⵓ ⵉ ⵏⴻⵛⵛⵉⵏ ⴷⴷⵇⵓⵍⴰⵜ. ⴰⵔⴻⴱⴱⵉ ⵏⵏⵉ ⴷ ⴰⵙⴻⵏⵊⴻⵎ ⵏⵏⴻⵖ - ⵙⵉⵍⴰⵀ - 21 ⴰⵔⴻⴱⴱⵉ ⵏⵏⵉ ⴷ ⵉⵊⵊ ⵏ ⴰⵔⴻⴱⴱⵉ ⵏ ⵉⵙⴻⵏⵊⴰⵎⴻⵏ ⵉ ⵏⴻⵛⵛⵉⵏ. ⴰⵇⴰ ⴷⵉⵏ ⵉⴼⴻⴽⴽⵉⵜⴻⵏ ⵣⵉ ⵍⵎⴻⵡⵜ ⵖⴰⵔ ⵙⵉⴷⵉ, ⵙⵉⴷⵉ ⵉⵏⵓ. 22 ⵙ ⵜⵉⴷⴻⵜⵜ, ⴰⵔⴻⴱⴱⵉ, ⴰⴷ ⵉⵍⴱⴻⵣ ⴰⵣⴻⴵⵉⴼ ⵏ ⵍⵄⴻⴷⵢⴰⵏ ⵏⵏⴻⵙ, ⴰⵛⴻⵇⵇⵓⴼ ⵙ ⵓⵛⵓⵡⵡⴰⴼ ⵏ ⵡⴻⵏⵏⵉ ⵉⵇⵇⵉⵎⴻⵏ ⵉⵜⵜⴻⵏⵏⴻⴹ ⵙ ⵉⵎⴻⵔⵡⵓⵙⴰ ⵏ ⴷⴷⵏⵓⴱ ⵏⵏⴻⵙ. 23 ⵙⵉⴷⵉ ⵉⵏⵓ ⵉⵏⵏⴰ: “ⵏⴻⵛⵛ ⴰⴷ ⴽⴻⵏⵏⵉⵡ ⴷⴷ-ⴰⵔⵔⴻⵖ ⵣⵉ ⴱⴰⵛⴰⵏ, ⴰⴷ ⴽⴻⵏⵏⵉⵡ ⴷⴷ-ⴰⵔⵔⴻⵖ ⵣⵉ ⵍⴰⴵⴰⵖ ⵏ ⵍⴻⴱⵃⴰⵔ, 24 ⵃⵉⵎⴰ ⴰⴷ ⵜⵃⴰⵔⵔⵛⴻⴷ ⵙ ⵓⴹⴰⵔ ⵏⵏⴻⵛ ⴷⴻⴳ ⵉⴷⴰⵎⵎⴻⵏ, ⵓⵛⴰ ⵓⵍⴰ ⴷ ⵉⵍⴻⵙ ⵏ ⵢⵉⵟⴰⵏ ⵏⵏⴻⵛ ⴰⴷ ⵉⵟⵟⴻⴼ ⵜⴰⵙⵖⴰⵔⵜ ⵏⵏⴻⵙ ⵣⵉ ⵍⵄⴻⴷⵢⴰⵏ." 25 ⵏⵉⵜⵏⵉ ⵥⵔⵉⵏ ⵉⴱⵔⵉⴷⴻⵏ ⵏⵏⴻⵛ ⵎⴰⵎⵎⴻⵛ ⵜⴻⵏ ⵜⵓⵢⵓⵔⴻⴷ, ⴰ ⴰⵔⴻⴱⴱⵉ, ⵉⴱⵔⵉⴷⴻⵏ ⵏ ⴰⵔⴻⴱⴱⵉ ⵉⵏⵓ, ⴰⵊⴻⴵⵉⴷ ⵉⵏⵓ, ⵍⴻⵃⵃⴼⴻⵏ ⴷⵉ ⵜⵇⴻⴷⴷⴰⵙⵜ. 26 ⵉⵎⴻⵖⵏⴰⵊⴻⵏ ⵜⵓⵖⴰ ⴳⴳⵓⵔⴻⵏ ⵖⴰⵔ ⵣⵣⴰⵜ, ⵉⵏⵏⵉ ⵉⵛⵛⴰⵜⴻⵏ ⵅ ⵉⴼⵉⵍⴰⵏ ⴰⵡⴰⵔⵏⵉ ⴰⵙⴻⵏ, ⵜⵉⵄⵣⴰⵔⵉⵢⵢⵉⵏ, ⵜⵉⵏⵏⵉ ⵉⵜⵜⵉⵔⴰⵔⴻⵏ ⵅ ⵉⴱⴻⵏⴷⵉⵍⴻⵏ ⵏⵙⴻⵏⵜ ⴷⵉ ⵍⵡⴻⵙⵟ. 27 ⴱⴰⵔⴽⴻⵎ ⴰⵔⴻⴱⴱⵉ ⴷⵉ ⵜⵎⴻⵙⵎⵓⵏⵉⵏ, ⴰ ⵙⵉⴷⵉ, ⵣⵉ ⵍⵄⵓⵏⵚⴰⵔ ⵏ ⵉⵙⵔⴰⵉⵍ. 28 ⴰⵇⴰ ⴷⵉⵏ ⴱⵉⵏⵢⴰⵎⵉⵏ ⴰⵎⴻⵥⵢⴰⵏ, ⵡⴻⵏⵏⵉ ⵅⴰⵙⴻⵏ ⵉⵜⵜⵚⴻⴵⴰⴹⴻⵏ, ⵅⴻⵏⵏⵉ ⵍⵃⵓⴽⴽⴰⵎ ⵏ ⵢⴰⵀⵓⴷⴰ ⴰⴽ-ⴷ ⵓⴱⴰⵔⵔⵓ ⵏ ⵉⵄⵛⵉⵔⴻⵏ ⵏⵙⴻⵏ, ⵓⵍⴰ ⴷ ⵍⵃⵓⴽⴽⴰⵎ ⵏ ⵣⴰⴱⵓⵍⵓⵏ ⴷ ⵍⵃⵓⴽⴽⴰⵎ ⵏ ⵏⴰⴼⵜⴰⵍⵉ. 29 ⴰⵔⴻⴱⴱⵉ ⵏⵏⴻⵛ ⵉⵡⴻⵚⵚⴰ ⵎⴰⵃⴻⵏⴷ ⴰⴷ ⴰⵙ ⵉⵎⵎⴻⵡⵛ ⵊⵊⴻⵀⴷ ⵏⵏⴻⵛ. ⴰ, ⴰⵔⴻⴱⴱⵉ, ⵙⴻⵊⵀⴻⴷ ⵎⵉⵏ ⵜⴻⴳⴳⵉⴷ ⴷⵉ ⵟⵟⵡⴻⵄ ⵏⵏⴻⵖ, 30 ⵣⵉ ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ, ⵙⴻⵏⵏⴻⵊ ⵉ ⵓⵔⵛⴰⵍⵉⵎ. ⵉⵊⴻⴵⵉⴷⴻⵏ ⴰⴷ ⴰⵛ ⵉⵡⵢⴻⵏ ⵜⴰⵔⵣⵉⴼⵉⵏ. 31 ⵙⵉⴳⴳⵯⴻⴷ ⵍⵡⴻⵃⵛ ⵏⵏⵉ ⴷⴻⴳ ⵓⵖⴰⵏⵉⵎ, ⴰⴱⴰⵔⵔⵓ ⵏ ⵉⴼⵓⵏⴰⵙⴻⵏ ⵉⵊⴻⵀⴷⴻⵏ ⴰⴽ-ⴷ ⵉⵄⴻⵊⵎⵉⵢⵢⴻⵏ ⵏ ⵍⴻⴳⵏⵓⵙ, ⴰⵍⴰⵎⵉ ⵉⴳⴳⴰ ⵉⵅⴻⴼ ⵏⵏⴻⵙ ⴰⵎ ⵉⵜⵜⵡⴰⵍⴱⴻⵣ, ⴰⵎ ⵏⵏⵓⵇⴰⵔⵜ ⵉⴷⴷⴻⵣ. ⵏⴻⵜⵜⴰ ⵉⵣⴻⴵⴻⵄ ⵍⴻⴳⵏⵓⵙ ⵏⵏⵉ ⵜⵓⵖⴰ ⵜⵜⵎⴻⵥⵔⴻⵏ ⴷⴻⴳ ⵓⵎⴻⵏⵖⵉ. 32 ⴰⴷ ⴷⴷ-ⴰⵙⴻⵏ ⵉⵎⵛⴻⵏⵏⵄⴻⵏ ⵣⵉ ⵎⵉⵚⵔⴰ, ⴽⵓⵛ ⴰⴷ ⵉⵙⵙⵡⵉⵥⵥⴻⴹ ⵉⴼⴰⵙⵙⴻⵏ ⵏⵏⴻⵙ ⵖⴰⵔ ⴰⵔⴻⴱⴱⵉ ⵙ ⵜⴻⵣⵍⴰ. 33 ⴰ ⵜⵉⴳⴻⵍⴷⵉⵡⵉⵏ ⵏ ⵜⴻⵎⵎⵓⵔⵜ, ⵖⴻⵏⵏⵊⴻⵏⵜ ⵉ ⴰⵔⴻⴱⴱⵉ, ⵣⴻⵀⵀⴷⴻⵏⵜ ⵉ ⵙⵉⴷⵉ ⵉⵏⵓ. ⵙⵉⵍⴰⵀ. 34 ⵏⴻⵜⵜⴰ ⴷ ⵡⴻⵏⵏⵉ ⵉⵏⴻⴷⴷⵀⴻⵏ ⴷⴻⴳ ⵓⵊⴻⵏⵏⴰ ⵅ ⵎⴰⵔⵔⴰ ⵉⵊⴻⵏⵡⴰⵏ ⵣⴻⴳ ⵡⴻⵛⵃⴰⵍ ⵓⵢⴰ. ⵅⵣⴰⵔ, ⴰⵇⴰ ⵏⴻⵜⵜⴰ ⵉⴳⴳⴰ ⵉⵊⵊ ⵏ ⵍⵃⴻⵙⵙ ⵉⵊⴻⵀⴷⴻⵏ ⵙ ⵜⵎⵉⵊⵊⴰ ⵏⵏⴻⵙ. 35 ⵡⵛⴻⵎ ⵊⵊⴻⵀⴷ ⵉ ⴰⵔⴻⴱⴱⵉ! ⵍⵄⴰⴹⴰⵎⴰ ⵏⵏⴻⵙ ⴰⵇⴰ-ⵜⵜ ⵜⵉⵡⴰ ⵉ ⵉⵙⵔⴰⵉⵍ ⵓ ⵊⵊⴻⵀⴷ ⵏⵏⴻⵙ ⴰⵇⴰ-ⵜ ⴷⴻⴳ ⵉⵙⴻⵢⵏⵓⵜⴻⵏ. 36 ⴰ, ⴰⵔⴻⴱⴱⵉ, ⵎⴰⵎⵎⴻⵛ ⵜⴻⵙⵙⵉⴳⴳⵯⴻⴷⴻⴷ ⵣⵉ ⵜⵉⵣⴰⵡⵉⵢⵢⵉⵏ ⵏⵏⴻⵛ ⵉⵇⴻⴷⴷⵙⴻⵏ, ⴰ ⴰⵔⴻⴱⴱⵉ ⵏ ⵉⵙⵔⴰⵉⵍ, ⵛⴻⴽ ⴷ ⵡⴻⵏⵏⵉ ⵉⵜⵜⵉⵛⴻⵏ ⵊⵊⴻⵀⴷ ⴷ ⵜⵣⴻⵎⵎⴰⵔ ⵉ ⵍⴳⴻⵏⵙ. ⴰⴷ ⵉⵜⵜⵡⴰⴱⴰⵔⴻⴽ ⴰⵔⴻⴱⴱⵉ. *