ⵉⵥⴻⵀⵀⵉⴷⴻⵏ 96

1 ⵖⴻⵏⵏⵊⴻⵎ ⵉ ⵙⵉⴷⵉ ⵉⵊⵊ ⵏ ⵢⴻⵣⵍⵉ ⴰⵎⴰⵢⵏⵓ, ⵖⴻⵏⵏⵊⴻⵎ ⵉ ⵙⵉⴷⵉ, ⵎⴰⵔⵔⴰ ⵜⴰⵎⵎⵓⵔⵜ! 2 ⵖⴻⵏⵏⵊⴻⵎ ⵉ ⵙⵉⴷⵉ, ⴱⴰⵔⴽⴻⵎ ⵉⵙⴻⵎ ⵏⵏⴻⵙ, ⴱⴻⵛⵛⴰⵔⴻⵎ ⵉ ⵓⵙⴻⵏⵊⴻⵎ ⵏⵏⴻⵙ ⴰⵙⵙ ⵅ ⵡⴰⵙⵙ. 3 ⴱⴰⵔⵔⵃⴻⵎ ⴰⵄⵓⴵⵉ ⵏⵏⴻⵙ ⵊⴰⵔ ⵍⴻⴳⵏⵓⵙ, ⵍⴻⵄⵊⴰⵢⴻⴱ ⵏⵏⴻⵙ ⵊⴰⵔ ⵎⴰⵔⵔⴰ ⵍⴻⴳⵏⵓⵙ. 4 ⵎⴰⵖⴰⵔ ⵙⵉⴷⵉ ⴷ ⴰⵎⴻⵇⵇⵔⴰⵏ, ⵉⵙⵙⴷⴰⵃⴻⴵ ⴰⵙⴻⵎⵖⴰⵔ ⴰⵟⵟⴰⵙ, ⵏⴻⵜⵜⴰ ⴷ ⴰⵎⵙⴰⴳⴳⵯⴻⴷ ⵎⴰⵀⵓ ⵎⴰⵔⵔⴰ ⵉⵔⴻⴱⴱⵉⵜⴻⵏ. 5 ⵎⵉⵏⵣⵉ ⵎⴰⵔⵔⴰ ⵉⵔⴻⴱⴱⵉⵜⴻⵏ ⵏ ⵍⴻⴳⵏⵓⵙ ⴰⵇⴰ ⴰⵜⴻⵏ ⴷ ⵍ’ⴰⵚⵏⴰⵎ, ⵎⴰⵛⴰ ⵙⵉⴷⵉ ⵉⴳⴳⴰ ⵉⵊⴻⵏⵡⴰⵏ. 6 ⵜⵉⵙⵙⵉⵇⵜ ⴷ ⵍⵄⴻⵣⵣ ⴵⴰⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ, ⵊⵊⴻⵀⴷ ⴷ ⵡⴰⵥⵔⵉ ⴰⵇⴰ ⴰⵜⴻⵏ ⴷⵉ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ. 7 ⵡⵛⴻⵎ ⵉ ⵙⵉⴷⵉ, ⴰ, ⵜⵉⵇⴻⴱⴱⴰⵍ ⵏ ⵍⴻⴳⵏⵓⵙ, ⵡⵛⴻⵎ ⵉ ⵙⵉⴷⵉ ⴰⵄⵓⴵⵉ ⴷ ⵊⵊⴻⵀⴷ. 8 ⵡⵛⴻⵎ ⵉ ⵙⵉⴷⵉ ⴰⵄⵓⴵⵉ ⵏ ⵢⵉⵙⴻⵎ ⵏⵏⴻⵙ, ⴰⵡⵢⴻⵎ-ⴷⴷ ⵜⴰⵡⵀⵉⴱⵜ, ⴰⵙⴻⵎ-ⴷⴷ ⵖⴰⵔ ⵍⴻⵎⵔⴰⵃⴰⵜ ⵏⵏⴻⵙ, 9 ⴱⴻⵏⴷⴻⵇ ⵣⵣⴰⵜ ⵉ ⵙⵉⴷⵉ ⵙ ⵓⵛⴻⵡⵡⴰⵔ ⵉⵇⴻⴷⴷⵙⴻⵏ, ⴰⵔⵊⵉⵊⴻⵎ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ, ⴰ ⵎⴰⵔⵔⴰ ⵜⴰⵎⵎⵓⵔⵜ! 10 ⵉⵏⵉⵎ ⵊⴰⵔ ⵍⴻⴳⵏⵓⵙ: “ⵙⵉⴷⵉ ⵉⵃⴻⴽⴽⴻⵎ!” ⵏⵉⵛⴰⵏ, ⵍⴻⵅⵅⵓ ⴷⴷⵓⵏⴻⵛⵜ ⵜⴱⴻⴷⴷ ⵜⴻⵎⵜⴻⵏ, ⵡⴰⵔ ⵜⵜⴻⵏⵀⴻⵣⵣⵉ ⵄⴰⴷ. ⵏⴻⵜⵜⴰ ⴰⴷ ⵉⵃⴽⴻⵎ ⵍⴻⴳⵏⵓⵙ ⵙ ⵍⵃⴻⵇⵇ. 11 ⴻⵊⵊ ⵉⵊⴻⵏⵡⴰⵏ ⴰⴷ ⴼⴰⵔⵃⴻⵏ ⵓ ⵜⴰⵎⵎⵓⵔⵜ ⴰⴷ ⵜⴰⵔⵛⴻⵇ, ⴻⵊⵊ ⴰⴷ ⵉⵣⵀⴰⵔ ⵍⴻⴱⵃⴰⵔ ⴷ ⵓⵄⴻⵎⵎⴰⵔ ⵏⵏⴻⵙ, 12 ⴻⵊⵊ ⴰⴷ ⵉⵙⵍⵉⵡⵍⵉⵡ ⵢⴻⵢⵢⴰⵔ ⵙ ⵍⴻⴼⵔⴰⵃⴻⵜ ⵙ ⵎⴰⵔⵔⴰ ⵎⵉⵏ ⴷⴰⵢⴻⵙ, ⵅⴻⵏⵏⵉ ⴰⴷ ⵙⵍⵉⵡⵍⵉⵡⴻⵏⵜ ⵎⴰⵔⵔⴰ ⵜⵛⴻⵊⵊⵓⵔⴰ ⵏ ⵡⴻⵣⵖⴰⵔ 13 ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⴰⴷ ⴷⴷ-ⵢⴰⵙ, ⵎⴰⵖⴰⵔ ⵏⴻⵜⵜⴰ ⴰⴷ ⴷⴷ-ⵢⴰⵙ ⵃⵉⵎⴰ ⴰⴷ ⵉⵛⴰⵔⵔⴻⵄ ⵜⴰⵎⵎⵓⵔⵜ. ⵏⴻⵜⵜⴰ ⴰⴷ ⵉⵛⴰⵔⵔⴻⵄ ⴷⴷⵓⵏⴻⵛⵜ ⵙ ⵜⵙⴻⴳⴷⴰ ⵓ ⵍⴻⴳⵏⵓⵙ ⵙ ⵍⵃⴻⵇⵇ ⵏⵏⴻⵙ.